Lungdambawl thu ~ Rev. Lian Za Nang

Lungdambawl thu ~ Rev. Lian Za Nang

Lungdambawl hun hong tun simin biakinnte le i tenna innte a hoihpen ding le a kilawm thei pen dingin i zepna ahang pawlkhat le a kizang nate thu pawlkhat theih huai sa ka hih manin a tomkimin hih lai tawh kong suaksak hi.

AKSI
Jesu a suah hunin Bethlem khua tungah aksi khat a tanna limlahna hi. Aksi pen Pasian kammal etsakna hi a, Pasian sungah khamuanna le lungmuangtak a om theih hithiatna limlahna zong ahi hi. Mipilte aksi in lam a Iah mah bangin tuhun piang­thak thu umte lam a lak aksi pen Pasian’ kammal ahi hi.

MEGI mipilte (wise men)

Lai Siangtho sungah mipil 3 to cih a kigelhna mun om lo hi. A suak naungek Jesu letsong nam 3 pia uh ahih manin mipil 3 pha ding hi cih upmawhna tawh a kigen hi. Tua hunin mipilte khual a zin uh ciangin a tawmpen 100 pan 150 clang pha uh hi. Banghang cih leh tuhun bangin vanleng meileng tawh pal ziau theih hi lo a, aksi paina enin gammang tulak, a mual a guam nawkin pal uh a, gamsate gulpi gilote lau­huai ahih manin a honin khualzin uh hi.

Megi mipil cih kammal pen Mus­teflon (GK) kammal pan hong pal hi a, Pasian bawl sa nate pianzia a sin, a zong, a kan, thuthuk thusim a theite cihna hi. Amau “a simtham kipawina” (Fraternity)nei uh hi.

Jesu bia ding a pal mipilte pen hih kipawina sungah a kihel mipil pawlkhatte hi. Kuamah in amau sung thu thei lo uh hi. Greek mipilte in hih bang kipawlna nei uh a, Ganan (Maths) pilna le khuahun pianzia theihtheih na pilna cihte nei uh hi. Ni, kha, aksite enin bang hunin tuipi tung khualzin Ie’ng huihpi le tuihualte tawh kipelh ding cihte a kipan mailam thupiang ding pawlkhat muhkholhtheihna nei uh hi.

Lai Siangtho Iui hun sung Pasian mizat khat ahi Daniel pen hih kipawina sunga kihel megi mipil khat ahi hi. Tu hun piangthakte khathu ah vantung tawh kizopna nei uh ahih man ci leh sa ngaih­sutna tawh a kithei zo lo mailam thupiang dingte muhkholhtheihna nei uh hi. Jesu hun lai a “Megi mipilte” pen tuhun “piang­thakte” etsakna zong ahi hi. (mt.2:10)

Inn (The house)

Megi mipilten Jesu a biakna mun pen Jesu suahna bawngbuk sung le a ki­sialna bawng annekna kuang hi nawn lo hi. Mite teenna innium lolum sungah kituah khin zo a hihna hih Lai Siangtho in hong lak hi. “Inn sungah a lut uh leh naupang leh a nu Mary a muh uh ciangin kham le paknamtui le mirrah a pia uh hi”. (Mt.2:11)

Daak (bell)

Daak sat pen Spain gam pan hong kipankhia hi. December 24 ni, zankim laitak Jesu suak hi cih thu daaksatna tawh mite tungah tangko hi. Tua hun a kipan daak­satna ngeina hong kipan hi. AD kum zalom 4 hunin kumpi Constantine in Bethlem khua ah daaksatna tausangpi khat lamsak a, Christmas a tun sim tumsak hi, kici hi.

Christmas Card

1834 kumin London khuapi pan Sir Henry Cole a cihpa in Christmas a phawk­na-in a lawmte tungah card khak ding ngaihsutna thak khat nei a, khak kipan pah hi. Tua Card tungah tuni dong gelh loh theih loh ahi “Merry Christmas and a happy new year”cih lai kigelh hi.

Tinsel

Lungdambawl hun a tun simin khuam tungah kham mel khauzang neu, a teselsel kikhai hi. Joseph, Mari le Jesu galte khut sung pan maimomkhau tawh a suahtakna lim lahna hi.

Lungdambawl singkung Minas tree)

Germany pan hong kipankhia hi. St. Wifred pen England gam pan Germany ah AD kum zalom 8 hun a tung sangmang khat hi. Milim biakna pen Jesu biakna-in hong laih hi.

Letsong (Gifts)

Pasian in tapa khat bek a neihsun leitung mite hong pia hi. (717,3:16)Tua mah bangin Megi mipilte in amau neihsa sung pan thupi a sakpen uh vante tawh nau­ngek Jesu bia uh hi. Tuate tungtawnin let-song piakna ngeina hong kipatcilna hi a, a kimu thei lo Jesu tungah piak bangin ngaihsutna tawh a kimu thei mi khat le khat letsong a kipia ahi hi.pen naungek Jesu biakpiakna limin hong zang hi.

Christian la (Carols)

Latin kammal pan hong pai hi a, AD kum zalom 4 pawlin Lungdambawl Ia hong kipankhia hi. Tua hun a kipan Christ­mas lasa in mun khat pan mun khat a pai kawikawina uh pan mun khempeuhah kizel hi. Carol lasa a pai kawikawina deihna in Jesu a thei nai lo miten Jesu pen Pasian’ tapa a hihna le Gumpa le Tanpa a hihna thei a, a san theih nading uh ahi hi.

Thu khupna:

Mipilten hong suak naungek pen kumpite’ Kumpi pa ding hi ci-in kham tawh a biak uh mah bangin zahtakna tawh bia ni. Siampipa hi ci-in paknamtui tawh a biak uh mah bangin ama hong sepsak sate umin muang ni. Gimna a thuak dingpa ci­in mirrah tawh a biak uh mah bangin a liamma hanga damna, a zawngkhalna hanga hauhnate kei ading hi ci-in upnatawh la ni. Rev. Lian Za Nang