Myanmar, Rakhine, Maungdaw sungpan khakhat sungin mi 84 kithatlum

Myanmar, Rakhine, Maungdaw sungpan khakhat sungin mi 84 kithatlum

Myanmar, Rakhine State sung aom Maungdaw District sungah 2016 October leh 2017 September kikalsung bekbek in mi 163 kithatlum hi ci’n Myanmar Information Committee te’n Wednesday ni in Statement khahkhia uhhi. Tua asi te banah adangzong mi 91 bang mangthangcip cimawk hi.

Tua mi kithat leh mimangcip tepen Muslim Militants kici migilo te’n Kawlgam gamgi encik “border police posts” te asim, adona panin thupiang ahihi.

Adiakdiak in tukum August 25 leh September 26, khakhatsung bekbek inzong akithatlum mi 84 bang phakhin hi. Tua aki thatlum tepen Muslims, Hindu, ethnic Arakanese, Daignet, Mro leh security forces te ahi uhhi. Tuahunsung mahin mimangcip pen 44 bang pha ci’n Statement ah genkhia uhhi.

Nung Sunday ni inzong Myanmar Security Forces leh Hindu khuasungmi te’n misiluang akiphum luang 28 tak leisung panin mukhia uhhi. Azingciang inzong adang luang 17 muhbeh leuleu uhhi. Hih misiluang tepen Northern Maungdaw Township, Yebaw Kya leh Kha Maung Seik khuageinai aom gamsung panin aki mukhia ahihi.

Tua misiluang tepen ARSA kici “Arakan Rohingya Salvation Army” te thahlup hiding hi ci’n Myanmar Government in genkhia hi. Hihtenglo adangzong misiluang akiphumsim omlaiding in ki ummawh ahih manin, kumpi thunei te’n azonsan laitak ahihi.

Union Minister for Social Welfare Dr. Win Myat Aye, Rakhine State Chief Minister U Nyi Pu, members of the National Human Rights Commission, senior military officers cihte honkhat Monday ni in tua misiluang kiphumna aphual ah a ending in pai uhhi. Tuaban ah asi te ii innkuanpih tetawh ki muhkhopna zong nei uhhi. Tuciangciang tua misiluang te lakah 25 pen Hindu innkuan sungpan hi ci’n ki theician khinta hi.

More: Myanmar, Rakhine State sungah akiphum Hindu misiluang 28 kimukhia

Maungdaw Township Public Health Department officials te’n hih misiluang te Forensic Inspections hoihtak bawl uh a, kanciansan laitak uh cih kiza hi. Tulaitak leitung gamtuamtuam te’n hih Rakhine State sung buaina hangin Aung San Suu Kyi leh apawlte amawhsak mahmah laitak uh hi a, hih Hindu misiluang te aki muhkhiatna tungtawn in amuhzia uh themkhat aki lamdang zawdeuhleh kilawm hi. Tuciangciang hih Hindu tepen Rohingya migilo te’n athahlup hiding kici a, tuahileh leitung in Myanmar Gorvenment amuhzia tampi kilamdangthei khading hi. Sawltak #zomidaily