Xmas or Christmas? ~ David Mung

Xmas or Christmas? ~ David Mung

Christmas tomlakna in ‘Xmas’ ih zatpen manlo hi ci’n pawlkhat in a gen ka zak tamsim sim ta hi. Pawlkhat in ‘X’ pen Satan etsakna ci. Pawlkhat in ‘X’ pen Zeisu engkona ci uh. Pawlkhat in Zeisu min langpanna, galdona ci uh. Pawlkhat tapidaw te’n ‘Christmas’ kammal pan Kris cih kammal a lakkhiatnop man uh hi aci zong om leuleu. Khat le khat ih kinohset ciang, lungdam bawl laitah ih suan ciang, zumlai tuamtuam ih gelhciang, ‘Merry Xmas’ ci’n zatvetloh ding ci’n, a uang gen mahmah pawlkhat zong om lai.

AD 1977 in America ah New Hampshire Governor Meldrim Thomson in Journalist te ading laikhat gelh a, ‘Xmas’ a tom in zat loh ding na gen hi. Tua le hih laimal ‘Xmas’ kuan ong zang masa in, hong kizel toto ahia le?

Bernard Ward’s History of St. Edmund’s college, Old Hall (originally published circa 1755) laibu in ‘Xmas’ cih kammal Manglai in na zang masa hi. Tuama diak AD 1551 hun lai in, “X’temmas” ci’n a kizangkhin kammal laang khat zong omlai hi. AD 1100 hunlai pekin hih kammal mah “Xpes mæsse” ci’n Anglo-Saxon Chronicle khang tangthu laibu sung ah na kizang hi. “Xmas” cih tomlakna kammal lian pen George Woodward in AD 1753, Lord Byron in AD 1811, Samuel Coleridge in AD (1801), Lewis Carroll in (1864) cih bang dan in na zang uh hi.

America ah leuleu, Oliver Wendell Holmes, Jr in AD 1923 in a laikhakna khat ah na zang masa hi. 1800 kum beilam pawl ciang, Mangpau kizatna gam kimphial ah hih Xmas cih kammal na kizel khinta hi. Canada gam aa kigelh laibu tuamtuam te ah hih ‘Xmas’ cih kammal a ki lakkikna tam simsim kimu thei hi. Australia le Caribbean gam tuamtuam te ah zong tuni dong mah kizang zang lai hi. UK gam ah bel, Blackbum aa Church of England bishop asem Alan Chesters in ‘Xmas’ ci’n tomlak loh ding in a naseppihte na hanthawn ngei hi.

Tualeh ‘Xmas’ ci’n ih zatciang Khris kiphiat suak maw le? hisam lo hi! “Xmas” ih cih pen “Christmas” a tomlakna ahi hi. Khat veivei teh /ˈɛksməs/ kici hi. Hihpen khut tawh lai ih gelh teh, tom zaw le vaibaih zaw ahih manin a kizangzang ongsuak hi. ‘X’ ih cihpen Greek kamal ‘Chi’ pan a kila hi a, Mangkam ‘Christ’ ih cihpen Greek kam in Χριστός kici hi.

Oxford English Dictionary (OED) and the OED Supplement te ah “X-” ahihkeileh “Xp-” pen “Christ-” acih na hi ci’n AD1485 masa lam in na kigelh hi. Tapidaw (Christian) pen “Xpian” le “Xtian” in na kizang hi. Tapidawbiakna (Christianity) a cihna in, “Xtianity” ci’n hih OED in AD 1634 in nazang khin lai hi.

Merriam-Webster’s Dictionary of English Usage ii genna ah hih kammalte pen Greek kamsiam Mangkang mipilte tungpan hong kipan hi, na ci hi. Tuahimawkle, ‘Xmas’ pen 666 Satan numbat hi aci ci tengbel Greek lai theilo ong suak mawk uh hi.

Tanglai Tapidaw laibute ah, χ and χρ pen Zeisu’ min tomlak na in kizang hi. ih Laisiangtho Thak (NT) ii tanglai Savun Laisiangtho tuamtuam te ah, Χ pen ‘Khris’ tomtakna in na kizang hi. Gentehna, Greek kam ah X pen kammal ki patna hi a, C pen a tawpna a hihi. IC le Mangkam Jesus bang Greek kam in kiteh kak thei hi.

‘X’ kammal a zang mituam tuam zong na om khin lai hi. Gentehna, Christina pen Xtina ci’n kigelh thei hi. American lasasiam Christina Aguilera bang Xtina ci’n tamveipi mah na kigelh hi. Khazih ih cih “Christ” pen tanglai pek in ‘X’ bek hilo lai, “Xt” ci’n na kitom lak khin zo hi.

Ih genthu teng khilkhawm kik leng, “Xmas’ kammal tomzat man le manlo pen ih lungsim tung le ei sandan pomdan tung tampi tak kinga gige hi. (Reference: Wikipedia)

David Mung