Leitung ah akum tampen in akiciamteh kum 117 apha piteeknu sita

Leitung ah akum tampen in akiciamteh kum 117 apha piteeknu sita

Leitung ah tulaitak akum tampenpen dingin aki ummawh piteeknu pen Saturday ni in sita cih Italian Media te’n genkhia uhhi. Tua piteeknu minpen Emma Morano kici a, Italian gammi ahihi. Italy gamsung, Verbania City ateenna ah Saturday ni in hongnusia ahihi.

Amahpen kum 117 phakhinta a, leitung mihing lakah akum atampenpen “World’s Oldest Person” in aki ciamteh ahihi.

Emma Morano pen 29 November 1899 kumin asuak hi a, Northern Italy gamsung ah ateeng ahihi. Leitung ah vanleng piankhiat nadingin apankhia Wright Brothers te unau in huihlak ah vanleng asinma 4 hunlai in Emma Morano suakkhinta hi.

Emma Morano pen unau laiguizom 8 lakah a upapenpen ahihi. Amah a upapen ahi hangin a sanggamdang tengin sihsankhin uhhi.

Emma Morano pen akum tamna ahang akikan ciangin aguizui in akumtam hiding kici hi. Apianna anuzong kum 91 nungta cihi. Apianpih asanggam tezong kum 100, Centenary khat acingpen pawlkhat om kici hi.

Emma Morano pen 1899 kumin asuak himawk ahih manin, 18 Century, 19 Century, 20 Century cihbangin Centuries thumbang nawkkha hi. Leitung galpi First World War leh Second World War cihtezong anihmah in na nawkkha hi.

Italy gamsung ah akhangkhia ahih mahbangin Italian Governments zong 90 valbang akilaihtoh phukha ngei hi.

Kum tampi anungta Emma Morano ii neklehdawn aki kancian ciangin thupi hetlo sawnsawn hi. Nisim in aktui tang 3 ta neden cihi. Tua aktui tang 3 lakah tangnih pen asial in neden cihi. Kum 90 sungbang tuabangin aktui tang 3 ta neden cihi.

Hih piteeknu akem Doctor khat ahi Carlo Bava kici ii genna ah Emma Morano pen zingsanglam in aktui asial in tang 2 ta nezel in, sun ciangin aktui tangkhat sathau tawh kangin Omelette in bawlin nezel cihi. Mehteh leh Singgah “Vegetables or Fruit” cihbang ne ngeilo cimawk hi.

More: Italy gammi khat Buddha Tattoo hangin Kawlgam pan ki hawlkhia

Italian News Agencies ANSA and Agi te genna ah hih piteeknu sita hi ci’n a innkuanpih leh alawmte’n genkhia uh cihi. ZD Sawltak #zomidaily