Kampau mukpau siam a thugen siam i cihte

Kampau mukpau siam a thugen siam i cihte

Mihingte khat le khat i kibatlohna a thupi deuh pawlkhatte sungah kampau mukpau a siam le a siam lo zong kihel dingin ka um hi. Midangte tawh kizop siamna le thugen siamna i cih pen Pasian hong piak pianpih hamphatna tawh a kibat hangin sin theih hi a, a sin zote siam pah lel uh hi. Mipi kikhopna le biakpiak kikhopna sungah thugen a siam mahmahte gen nei kei ni. Mimal khat le khat kizopna , thu le la khatpeuh kikupna ah kampau mukpau a siam deuh mi pawlkhat om uh hi.

Tua bang mite in bang hangin midangte sangin thugen siamzaw uh hiam cih leh amaute nuntakna sungah midangteh a kibat lohna uh zia pawlkhat om ahi manin, mi tawh kizop a siam uh ahi hi.

1. Mi tawh kizopdan siam a kici mite in , midangte thugen kampau limtakin ngaihsak uh hi. Mi pawlkhat in a langa te thugen a ngai tawh a kibat uh hangin a dawnkikna ding zong ngaihsun pah lian uh ahi manin, a langa te in thu a genkhit phet-in ama hoihsak bangin dawng kik ziau thei uh hi.

2. Ama hoihsak thute bekbek gen loin midangte zaknop ding le midangte theihnop thute gen uh hi. ( Biakinn sungah mite hoihsak thute bekbek gen ding cihna hi loin, mimal kizopna gennopna hi zaw hi. )

3. Thu a gen ciangin a neng a tawngin gensiang lo uh a, a thupi lote gen loin koih uh hi. ……. Tua ni pen nipi zawh ni li ni hiam ni nga ni hiam thei tel lian keng. Tua ni zingsang nai sawm hiam nai kua pawl hiam khat hi-in teh ka gualsilh pen hih ahi lo a dang khat hi-in nei mai ing, cihte pen gensuak lai le teh na thugen hong ngaihsaktrading cimtak huai lua mhamah kha ding hi.

4. Thu khat agen ciangin a gensa kammal zang kikkik lo uh hi. (Tua pen a taktak a hi dan ahi ve / Lawmte cih dan leh / Thu khat ah hi dan hi, cihte pen thungaite in thudangte sangin tua munte ah lunglut-in nuihzakhuai-sa zaw thei uh hi.

5. Thugen siam a mi tawh kizop a siam mi khat in thu a gen ciangin sianglimtakin thugen uh hi. Thugen siam mi a tamzawte in dawnna khatpeuh a dawn uh ciangh, midang khat tawh thu a gankhop uh ciangin a gen ding thu bek lungngai loin a zat ding a kammal mahmah zong lungngai uh hi. A langa te in a thugen za hiam za lo hiam cih tel lo zah liang dingin thu a gen khualkhual mi pawlkhat om uh a, midangte a thupi sim lo tawh kibang uh hi.

6. Tut khop khawlkhopna khatpeuh ah thu a gen uh ciangin amau bekbek in thu gen lo uh a, midangte tungah dotna hoih nono dong thei uh hi. (I gennop mahmah thu khat hong kidong le tua mi tungah muanna le itna kinei pah zo phial hi.)

7. Lungsim kibat lohna munte ah a langa te deihna nial ding bek ngaihsun lo uh hi. (Tua na gen pen dihsa mahmah ing. Ahi zongin lampi dang khat ngaihsun lai le hang keima muhna ah hi bangdan hi leh bang aci zaw diam, ci thei uh hi.)

8. A hun zui-in pahtawina le phatna kammal zangthei uh hi. Phatna le pahtawina i cih pen kampi bek ahi zongin a hun le a mun om ahi manin, pilvangtak a zatsiam ding zong kisam mahmah zel hi. Job Cinpi (Zomi Laisim Nuamte)