Lasiam Esther Cing San ii anu Pi Vung Khaw Niang in Australia ah hongnusia

Lasiam Esther Cing San ii anu Pi Vung Khaw Niang in Australia ah hongnusia

PI VUNG KHAW NIANG (Kum – 89) :: Pu Ngul Cin (Laingek beh) leh Pi Luan Man ( Thawmte beh ) sungpan in Hnahlan khua Mizoram India ah 01/01/1929 ni-in piang hi. Gamlai khua Pu Lut Thang ( Gualnam beh) leh Pi Cing Ngai ( Naulak beh ) te tapa upa pen (L) Rev. Joshua Tun Za Kap tawh 04/01/1960 kum in pumkhat suahna nei uh hi.

SUAHPIH LAIZOM TENG

• 1. Pu Tawng Za Go (L) Pi Sang Luai
• 2. Nu Cing Za Ning (L) Pu Sang Zual
• 3. Nu Man Ciin (L) Pa Ngin Thang
• 4. Pu Cin Do Thang (L) Pi Cing Ngaih Man
• 5. Nu Man Khan ( Kolasib Mizoram India ) Pu Lalsangzuala

SUAN LEH KHAK:

TA NUMEI 6 LEH TA PASAL I NEI UH HI

• 1. Nu Ngai Go Mang ( Pa Nang Khan Thang Shoute beh ) Buankhua, Tedim ah teng
• 2. Lia Man Suan Cing, Tedim ah teng
• 3. Nu Ning Deih Lun ( Pa Zam Khan Suan Tawmbing beh ) Suangphei khua, Melbourne Australia ah teng
• 4. Nu Melody Sen Gualnam ( Pa Mang Za Lian Munzo beh ) Valung khua, Falam ah teng
• 5. Tg. Thang Khan Kam ( India ) ah om
• 6. Nu Ciin Neih Kim ( Pa Cin Suan Kam Songput beh ) Kapteel khua, Tedim ah teng
• 7. Nu Don Lam Niang ( Pa Ngun San Oo Mara ) Matupi

TU (22) TUSAWN (8) LEH MINTAP (6) NEI HI A MIN PHUAH TENG:

• 1. Niang Ngaih Man
• 2. Niang Ngaih Zen
• 3. Niang Suan Paal
• 4. Niang Suan Nuam
• 5. Niang Sian Len
• 6. Niang Tan Zau

A LA DEIH: A sangnalam kakahto hi

AZIA LEH TONG:

Ka Nu uh pen mi nunnem, a kiniamkhiat, a nuak theilo akhasia thei bek, hehna ciamtehlo, khasiatnate thuk kik sawmlo in cillum tawh valhsuk ding ci aa, a mah mah in zanghpah in, a tate zongh tua mah tawh hong hanthawn den hi. Nat leh sat hi zahta thuak mah ta se leh thumlo tau ngei hetlo hi. Nasep kizen leh a thahat mahmah khat zong hi aa, Pasian nasem a pasal a dingin zongh thungetna leh ahih theih sunsun tawh ma panpih in tu leh ta suan leh khak ading ban ah minam leh gam ading Pasian nasemte ading upna hang aa bawlsiatna thuakte ading, damlo zawng khal leh thong kia genthei hatsatna thuakte adingin zongh ahih theih tawp in thunget sak in thupha apia den Nu manpha mahmah khat ahihi.

A NATNA LEH HONG NUSIAT DAN

2007 kumpan kipan in zunkhum sikhum natna a neih lam kithei khia aa, Tedim ah a kibawl hangin siahuai zaw ahih manin lupnatung ngak in tho khia zo nawnlo hi.. 2011 kum ciangin Malaysia ah a tanu Nu Lunbuahte innkuan tawh gam 3na lung gulhna tawh zin hia uh hi. Pasian hehpihna leh atanu Nu Lunbuah leh a pasal Pa Suannote innkuan kepsiamna tawh hong noptuam in ciangkhut khunsa in inn sung khawngah tawmtawm pai thei kik aa, ka lungdam mahmah laitak un kamsiatna tawh 2015 kum in innsungah ciangkhut khunsa aa, apailaitak in kituk kha ahih man in aphei guh kitan hi. Ampang zatopi ah lumin a tuahkhit teh amah leh amah tho khia kik zo nawnlo in phot leh sial dinmun hong tung to hi.

Tua khit ciangin nat leh sat in buak beh toto aa, 2017 kum teh zunkhum, sikhum, sikhangte ban ah a pumpi tungah meikatna cipol dan dimin bawk venvan tawh thuah sawnsawn aa, Pumpi tang thei nawnlo (stroke) din mun ciang hong tungto hi. Tuateng hang mah tawh Kuala Lumpure, Malaysia kumpi Zatopi tuamtuam leh tungshin specialist hospitalte ah Emergency tawh 8 vei bangna tung hi. Vanglian Pa PASIAN hehpihna leh a tanu thumna ahi Nu Lunbuahte innkuan kep siamna hang tawh hong noptuamto zel in, lungtup gam minthang gam 3na Australia Melbourne leitang 19th April 2018 ni-in hong sik thei hi.

Melbourne hong tun ni-in maitai tak leh tawm- tawm kam kisang theiin akua mapeuh maitai siusiau sa in na dawn tuah thei himah tase leh Northern Helth Epping Zatopi ah lut suak pah in, Gam lian gam thupi ah tungta Zatui zaha kibawl dan zongh thupi mahmah ding ahih manin kanu uh hong hoih hanhan ding leh hong dam kik ding nakpi takin lamen aa kaom ngiungeu laitak un kolamet na tawh hong kikelki mawk ahih manin a it angaih atu atate leh amipihte nusiain sihna leh natna gimna tawlna om nawnlohna mun, hong tanpa Zeisu leh apaisa it leh ngaih teng ii laitual lenna kham khuapi ah Wednesday 9th May 2018 sun nai 12:45pm hunin hong ciahsan ta hi.

LUNGDAM KOH NA

1. Melbourne hong tunni un Airport ah mawtaw tawh hong muakpih in a zin tunna uh Motel Reservoir ban ah azatopi dong hong kha, hong zuisuak khempeuh tung leh tuni tan ciang kisapna bang aa mawtaw tawh hong puasuk/to kawikawi khempeuh tungah.

2. Northern Health Dr. leh Nurse, Staff khempeuh tun- gah

3. Thu hong ngetsakin sum leh pai leh nek ding dawn ding Motel leh Zato ah hong puak khempeuh tungah

4. Nu tung tangah Biak Piak Kikhop hun sungaa, nek leh dawn hong vai hawmsak leh agim atawl khempeuh ban ah thusa hong sepsak khempeuh tungah.

5. Hanthotna hong nei Pasian zat siampite leh lasakna tawh heh hongnem ahi lasa siam khempeuh leh music tumte khempeuh tungah

6. Media lam leh Bulletin akipan akisam bangbang mun ah a na buai den Pa Mangpute nupa leh a lawmte teng tungah.

7. Ka Nu uh hun sungaa, an hong vaak innkuan mimal bup tungah

8. Tedim Innpi ah sagawhna a va nei Pa Mang Za Lian ( Melody Sen Gualnam Pasal ) te innkuan tungah leh Valung khua pan a vadelh ta nau 8 te tungah

9. Han vai hong vaan pih/buai pih Ps. Do Dal te nupa, Pa Pau, Pa Hang ( Ko U Hang Ci ) te tungah

10. Nu tung tangah hun hong bawlpih Australian Myanmar Evangelical Fellowship ( AMEF ) Ps. Nicholas Pawlpi, Malaysia Zomi Christian Assembly (ZCA ), Tedim Evangelical Baptist Conference (EBC) te ah hunbawlna leh suun na sih daak ki tum. India Mizogam Kolasib khua ah ka nunote Biak Inn ah ka nuno leh ka punote ki tuah khawm in hunbawl khawm cih danin mun tuam2 gam tuam2 ah Melbourne aa hun nunung tawh kituakin hun hongbawl sak sawm khempeuh tungah

11. Pawlpi min in sum tawh hong gaal aa maitang mahmah honglak ngiat ahi Melbourne Chun Church Pastor Pa Sai leh a chairman pa tungah

12. Nu zato om sungin Pawlpi min in sum tawh hong veh a thu hong ngetsak Zomi Mission Church (ZMC) Sia Piang leh Pawlpi Makaite tungah

13. Nitak hun hong bawlpih aa ong uap ahi. MBCC, Gamlai khua kipawlna leh ZYA Melbourn te tungah

14. Biakinn hong zangsak in vai khempeuh ah tavuan hong laksak MBCC Pastor Do Dal leh Pawlpi mi khempeuh tungah

15. A diak in Korea ah khual zin dinga sawm Air Ticket a leikhin sa ahi MBCC Pastor Do Dal leh Syamah Thangite nupa in a vailian khat uh cancel liangin kadahna uh hong puakpih, hong gimpih hong tawlpih hong suplawh uh ahih manin Siapate nupa tungah leh a tungaa kiat khempeuh tungah lungdamna lianpi kongko uh hi.

NB: hih pen BulletIn kibawl nuamta ahih manin tuni ciangciang kaphawk khak tantan uh konggualh suk uh ahih manin, A thupi mahmah a kipulaak khalo zongh om kha ding ahih manin nong telsiamna ding un hong thum ungh. Han tan ni teh nu ni nung siah thuthak om bangbang hong update toto lai ding hi ungh.

Vekpi tunngah lungdam ungh. Ih biak vanglian Pa PASIAN in mimal innkuan kim tungah a kiciangtanlo van thupha lei thupha hong buaksuk ta hen. Amen – A nusiat innkuanpih khempeuh laikung pan

FENURAL PROGRAMME

• Date : 14th April 2018
• Time : 12:00pm
• Venue : Melbourne Burmese Christian Church (MBCC)
• LMC Old Melbourne road,
• Chirnside park VIC 3116

HUN GELNA

• Chairman : Pa David Khai
• Patnala : Aw Gam Nuampi
• Mangpha khakna : AMEF Innteek thungetna :
• Mangpha khakna la : Innteekte tung pan Kipawlna tuamtuam pan
• Lasakna : Esther Sian
• Lasakna : MBCC
• Sermon : Pastor GinDo Dal
• Tawpna la : Innpha bel ah ipai ding
• Tawpna thu ngen : Pastor Gin Do Dal

HANMUAL

Lilydale Hanmual ah sun nai 1:00 pm in kipan ding hi. Address : 126-128 Victoria Rd, Lilydale VIC 3140

ZYA MELBOURNE PAN DAHPIHNA LAI

PI VUNG KHAW NIANG

A kimanghilh nonlo ding leitungbup Zomite ading a mimanpha mahmah ahi Melbourne Zomi Innkuanpih Pi VUNG KHAW NIANG pen Zomi Lasiam minthang masa Dorcas unaute ii pianna Tuunu in Tawntung Pa kiang hong ciahsan ta ahih manin, ZOMI YOUTH ASSOCIATION MELBOURNE in zahtakna lian pen pia-in, A tu atate tawh akibangin dahpihna hih lai tawh kong pulak uh hi.

Mathai 5 : 4 Dah in athum atau mite Pasian in a maute hehnem ding ahih manin thupha ngah mi ahi uh hi.

Info. & Publicity Department
ZYA Melbourne