Lamka Laizom Zomi te tha piakna leh khohna
THU MASA:
Tu laitak thupiang te hangin i omna ciat ah ilungsim hongsu kha mahmah hi. Kawlgam hitaleh Gam tuamtuam pan hitaleh lainatna kinei mahmah hi. Thu omdan teng ka et et ciangin anuai a bangin thu pulaakna leh thu ngetsakna kong neinuam hi.
MAKAI TE TUNGAH THA PIAKNA:
Makai sem te in limtakin thu hongngaihsun unla, Mipi te lunggulh leh ngaihsutna limtakin hongdin pih sawm un. Khialhna sa aomleh zong mawhmaina ngen unla , Pasian tung leh mipi te tungah thumna nei un. Makai te in mipi tawh kalsuan khop theih ding hong lungngai pha mahmah unla, Kumpi lam ah phulding gending aom leh hangsan takin hong ding khia ta un. Moses leh Joshua te bangin hangsan unla, ideihna leh ilunggulhna te pulaak khia ngam un. Mipi te na sak luatna te limtak in thupi sim mahmah un. Thu hongngetsak ung.
MIPI TE KHOHNA:
Mipi te in ideihna aomte hoih takin genkhia , sungkhia ni, siattatna , suksiatna tawh kal isuanluat leh denciangin Pasian mawhsakna lianpi hongtung ding hi. Ideihna kumpi tungah atangtun nadingin asun khiatdan , apulaak khiat dan siam ni. Heh mahmah na tawh khut khial kha kei ni. Ei leh ei sungah mailam teh mangngilh ngeiloh ding thu lian hongpiang mawk leh ilungtup thu te hongtang tung thei lo ding hi. Mipi ten limtakin ingaihsut kei leh , denciangin iveng ten hong awi mahmah ding uha, eisungah khantawn in kilung sim neihna hongom leh apualam gal ido do sangin eisungah gal hongpian ding lauhuai mahmah hi. Mipi leh adiak in Nupi ten khat vei vantung lam hong en to kik unla, na lungsim uh Bible kisiansuah sak un. Den ciangin ithungetna Topan hongdawn nawnloh khak ding kong laupih mahmah hi. Khat leh nih ahehluat leh zong ahehdanding gensiam ni, hehsim in nongsiat tatmawk uh leh koi ci bangin thu hongngetsak ding kahi uh hiam? Agen thei te adingin thungetsak nuam a, asiattat leh akhut khial khial te adingin thunget sak ding hamsa mahmah thei hi. David bangin Biakinn lam khuan ingah nawnloh khak ding kidawm mahmah ni. Ideihna ngen ni, ideihna pulaak ni , ahizongin ihehna leh ithangpaihna te gahsuah sak kei ni , tangthu hoih lo igelh khak ding kidawm ni. Topa mintawh hong khoh ing.
THU KONG NGETSAK DAN DING HAMSA KASA HI:
India gam adiakin Manipur state sungah om Laizom te pen kong khual mahmah uh a, no aitangin Washington DC India Embassy zumpi mai a kipan gam tuamtuam ah lungpho na leh thusunna te kinei kawikawi hi, ahizongin na gamtat dan uh leh na hehluatna uh nagahsuah sakna te ka et kik kik ciangin Christian te adingin valdeuh khadingin ka um hi.Kong hehpihna leh konglainatna lungsim alian mahmah kimlai tu in kong thungetsak danding ka tel zo nawn kei phial hi.
MIPI MIN PAULAM A SUK SIATNOPNA LUNGSIM ANEI TE KHOH KUL DING HI.
Hibang hehna hun a, athukhual zaw deuh aom mah bangin thukhualna anei zonawnlo leh mailam ading thungaihsun nawn mello pawlkhat om thei ahih manin mipi sungah mipi paulam a siattatna lungsim anei te ikhoh kul ding hi, tua hi kei leh mipi sungah denciangin ngaihsutna tuamtuam hongpiang ding a, ilampi kikhial ding hi.
I LUNGTUP PI PEN BEK LUNGNGAI KHAWM NI:
Tulai takin ilungtup lian penpen :
1. Bill 3 teng adeihlo ihi masa hi.
2. Separate administration angen nuam ihihi.
3. Separate State angen nuam lai ihihi.
Hih thulian mahmah teng atangtun nadingin , eisung kisuksiatna tawh bangmah hongpiang hetlo ding hi. Kipumkhat mahmah leng zong abaih pak naiding thu te hilo hi. Thukhual leh lungsim pilvang takin kipumkhat in mai inawt leh ilunggulh te hongtang tung bek ding hi.
THU KHUPNA:
Lamka leh adiakin Manipur gamsunga om Laizom te aw kong thungetsakna te anuai abang ahihi:
1. Anungta Pasian kammal tawh a kituak in gamta un.
2. Na lungsim uh kiniam khiat unla na mawhna uh Topa tungah sut un.
3. Na heh luatna uh ahoih lo in gahsuah sak kei un.
4. Den teh Biakinn pai kik nuam ding nahih lam uh mang ngilh kei un.
5. Christian te gualzawhna sang pen in mawhmaisakna ahih lam zong mangngilh kei un.
6. Topa Pasian in ageelna khat omding cih lungngai den un.
7. Na khuk uh kham sak kik unla Topa maipha zong un.
Topa aw ka kalsuan dan dinguh honghilh in ci zaw un,
IIKhang 7:14 .
Note adingin alung himawh mahmah ,
Rev. Pau Khan Khai.
Zosiam Gospel Ministry.
Louisville, Kentucky
USA.
Comment piaknop aomleh...