Chin State, Lailenpi khua ah vanlengtual bawldingvai Press Conference kinei

Chin State, Lailenpi khua ah vanlengtual bawldingvai Press Conference kinei

Myanmar, Chin State sungaom Lailenpi khua ah vanlengtual aneukhat kilamding cih akigeelsa hi a, tuavai tawh kisai in tuni Friday ni in Yangon ah Press Conference bawlna nei uh cih kiza hi. Lailenpi khuapen Chin State, Matupi Myone sung aom khuakhat ahihi.

Kikawmna ahamsatna, khuaneu khuata “Remote Areas” te ah khantohna aomtheih nading, vaiphamawh vaikin “Emergency” khatpeuh aom ciangin amanlang in kikawmtheih nading cih ngimna leh deihsakna tawh hih vanlengtual akibawlsak ahihi.

Hih Lailenpi khua ah akibawlding vanlengtualneu “Airstrip” vaitawh kisai in tuni 23 February 2018 ni inzong Yangon aom Novotel Yangon Max ah gencianna Press Conference kineikhinta hi.

Hihvai tawh kisai in avaihawm ahi MAF Myanmar Country Director asemlaitak ahi Mr. Chad Tilley in agenna ah Lailenpi khua ah akilamding vanlengtualneu “Airstrip” pen US$2.2 Million bei in kibawlding ci’n genkhia hi.

Hih vanlengtual bawltheih nadingin apanpih pen MAF akici “Mission Aviation Fellowship” NGO te’n avaihawmsak uh ahihi. Chin State sungah akiphuan “Health and Hope” kici thunget kipawlna Prayerful Community tetawh Partnership in aki vaihawmding kici hi.

Hih Lailenpi khua ah vanlengtual bawltheih nadingin abeisa 2017 July khasung in kumpi tungpanin phalna aki ngahkhin hi a, tukum 2018 January khasung inzong vanlengtual bawlnading leitang sitcianna kineikhin hi.

Vanlengtual “Airstrip” naseppen hongtungding September khasung in kipan tading a, ahi zongin kikawmna lampi hamsatna tuamtuam tammahmah ahih manin, 2020 May khawngciangin mansiang theipanding cihi. Vanlengtual amansiang ciangin vanlengneu 3 khawng kilengsak dinghi ci’n Mr. Chad Tilley in genkhia cih kiza hi.

Abeisa kumsung inzong hih Lailenpi khua ah vanlengtual bawlvaiding tawh kisai in U Henry Van Thio (Vice President of Myanmar) inzong aphual ah phangeikhin hi.

Hih vanlengtual bawltheih nadingin sumlepaai panpihna apia ahi MAF kici “Mission Aviation Fellowship” te ahihi. Hih MAF tepen Christian Organization khat hi a, kikawmna ahamsatna “Remote Areas” aom te’n Technology lamsang pilna asintheih nading, kizopna Communications leh vanlengtawh kizopna Aviation cihte apanpih mahmah NGO lianpi khat ahihi.

MAF te’n Major Operational Centers 3 nei uh a, tua Center tepen USA gamsung aom Idaho, Nampa City, United Kingdom gamsung ah Ashford City, Australia gamsung ah Cairns City cihte ah omkawikawi hi.

More: Tedim Khuapi Vanlengtual ding lemlo

Hih Center lianpi mun 3 panin Americas, Africa, Asia Pacific Region sung aom Program tuamtuamte panpihna nei uhhi. MAF pen vanleng lamsangtawh kipawlna ahih mahbangin vanleng Aircraft 130 nei uh a, 2010 kumkhatsung bekbek inzong gam 55 ah nasemin Passenger akigawm in mi 201,710 bang vanlengtawh panpihthei uhhi. Sawltak #zomidaily