India gamsung aom Doctors te’n pasal luzangbawk golpikhat atkhiatsak

India gamsung aom Doctors te’n pasal khatin aluzang abawk golpikhat atkhiatsak

India gamsung aom Doctors te’n Thursday ni in pasal khat ii adekzang ah abawk golpi khat atkhiat sakthei uh cih AFP pan kiza hi. Tuapa ii aluzang ah abawkkhia pen “Brain Tumour” kici a, aomngei Brain Tumour khempeuh lakah agolpep agik penpen “heaviest recorded” kiciliang hi.

Indian Surgeons te’n hihpa ii alupen Operation abawlsak uh hi a, nai 7 sungtak abawlsak, a atsak khitciangin mansiang theipan cihi.

Tua alu abawkgawppa pen amin Santlal Pal kici a, kum 31 aphakhin khat ahihi. Amahpen saingak “Shopkeeper” nasep asemkhat hi a, aluzang ah abawkkhia ii agihna pen 2 kg bang pha ciliang hi.

India, Mumbai khuapisung aom BYL Nair Hospital ah Operation akibawl hi a, Doctors te genna ah alubawk Brain Tumour pen gollua mahmah ahih manin, hihpa pen lu 2 anei, lu 2 akithuap tawh kibang cihi.

BYL Nair Hospital panin Neurosurgery makaipi ahi Trimurti Nadkarni in agenna ah hih Brain Tumour atkhiatsak, Operation bawlsakpen hamsa mahmah leh buaihuai mahmah cihi.

Operation hunsung bekbek nai 7 sungbang hunbei in, sisan Blood zong 11 Units bang kisam cihi. Cinapa in khua aphawkkik khitciangin Research kabawl uhciangin leitungah Tumour agikpen cih kamukhia uhhi ci’n genbeh hi.

More: India zato sung aom MRI kizaihna in pasalkhat hupcip in sisuak

BYL Nair Hospital panin Statement akhahkhiatna ah aki atkhiatsak Brain Tumour pen agihna 1.87 kg (4 lb) hi a, leitungah agikpenpen “world’s heaviest tumour” hiding ci uhhi. Cinapa pen bangmah nawngkaina omlo in kizosiang in, damsiangding cihi. Anzong hoihtak netheita in, lamzong hoihtak paithei cihi.

Abeisa in hihbangin Brain Tumour aki atkhiatsak, anungta lakah agikpenpen in akiciamtehpen 1.4 kg ahihi. Sawltak #zomidaily