Kum 20 gual numeikhat Phone enkawmkawm in apaileh lei tungpan kia in si
Northern China, Anhui Province sungah numeikhat lei tungkhat ah buaituak mahmah in, a Phone enkawmkawm in apai laitak tuksuk in kikhuksuksuak ahih manin sihlawh cih Chinese Media te’n pulakkhia uhhi.
Anhui Province sung aom Suzhou City sungah nungkalsung in thupiang ahihi. Tua numeinu akiatsuk laitak khuasung lamzikpi te ah akithuah CCTV panin ki Record kha hi.
Tua CCTV panin aki etkik ciangin tua akiasuk numeinu pen akiatma in lamzikpi kantanna Overhead Bridge kici khetawh lamkan nadingin akibawl lei tungah a Phone enkawmkawm in paipai hi.
Tualaitak in kahlei sikkhial in, tuksuk a, anuai dongah ki khuksuksuak mawk hi. Ageinai ah amukha Eyewitness khatin Anhui Television tetung agenna ah tua numeinu pen kum 20 gualpawl hiding cihi.
Lei tungah apai kawmkawm in a Phone limetlua in, tualaitak in kahleikhak sikkhialkha in aki khuksuk hi ci’n genkhia hi. Tuaciang in anuai ah kikhuksuksuak a, alu tatkhagawp in khua phawknawnlo cihi.
Amanlang in Hospital kipuakpah himahleh anuntakna ki honkhiazo nawnlo in, sisuak mawk hi.
Video: Woman in her 20s busy looking at her phone falls down flight of stairs in China and dies
Hihbangdan Smartphone hangin buaina pen China gamsung ah kiza zelzel hi. Nung April khasung inzong Fujian Province sungah mawtawhawl khatin Phone kiho kawmkawm in mawtawhawl ahih manin, naupangno kum 2 aphapan pasal khat taihlumkha cihi.
Leitung gamtuamtuam ahzong Smartphone hong omkhitzawh tuahsiatna tampi kibehlap kici hi.
US gamsung ahzong Smartphone zatna hangin khetawh khuasungvak “Pedestrians” asi tammahmah cihi. Abeisa March khasung in United States Governors Highway Safety Association (GHSA) te’n pulakna khat neikhia uh a, 2016 kumsung in Pedestrian asi mi 6000 pha cimawk hi. Kumkhat sungin tuazahzah asipen omngeilo a, abeisa kum 20 sungah atampenpen cimawk hi.
Related: Australia ah sangnaupang numei khat ii aphei tungpan Phone puakkham
Khuasung vakciangin khetawh ihpai zongin, mawtaw ihhawl zongin Smartphone te limzatluat lohding leh lungsim pumpi ngaihsutna khempeuh Phone sungah tunsaklohding kidop huai mahmah hi. Sawltak #zomidaily
Comment piaknop aomleh...