Kuala Lumpur khuasung sanginnkhat meikang in mi 25 si, 3 liam

Kuala Lumpur khuasung sanginnkhat meikang in mi 25 si, 3 liam

Malaysia, Kuala Lumpur khuasung aom Jalan Datuk Keramat ah sanginn khat meikang ahih manin mi 25 in sihlawh cih theStar pan kiza hi. Tua sanginn pen biakna sanginn “Religious” khat ahihi.

Kuala Lumpur City Fire and Rescue Department te genkhiatna ah tua Religious (tahfiz) sanginn pen tuni Thursday zingsanglam 5:15am hunpawl in meikang kipan cihi. City Fire and Rescue Department te tungah zingsang 5:41am hunpawl in kizasakpan cihi.

Zingsang 8am hunpawl in meikatna aphual ah meiphelh mawtaw Fire Engines 9 bang om cihzong kiza hi.

Tuciangciang Information akizakna ah hih sanginn meikatna hangin sangnaupang leh sangsia akigawm in mi 25 si cihi. Asi aluanghawm khempeuh Kuala Lumpur General Hospital ah kipuak cih NST pan kiza hi.

Meikatna ahangpen koipan kipan cih kitheician nailo a, kumpi thunei te’n akanciansan laitak kici hi.

Hih meikatna biakna sanginn gei ah aomte genna ah zingsangtung in huhna ngenin akapkap kiza ci uhhi. Tuaciang in tuavengsung aomte’n a enkhiading in apai uhciangin Tahfiz Darul Ittifaqiyah sanginn pen meikuang ziahziahta cihi.

Hih sanginn pen dawlnih “two storey building” hi a, sangnaupang tepen Dormitory sungah lupna double-decker beds tawh alum uh ahihi.

Fire and Rescue Department panin meiphelh Firefighter te atunciangin meikuangpen huaisialua mahmahkhin ahih manin, bangmah hutkhiat theihding omnawnmello cihi.

Asi mi 25 lakah sangnaupang 22 kihel uh a, sangsia pen mi 3 kihel uhhi. Tualo adangzong mi 3 limliam mahmah cih kiza hi. Athu ala aki kancian laitak hi a, Information akicianzaw in akitheihbeh aomleh hongki Update kikding hi.

Abeisa August khasung in Fire and Rescue Department te’n Private Religous School te ah Fire Safety hoihtak kibawllo ci’n alunghimawhna uh pulakkhia hi. 2015 kum khitzawh biakna sanginn tuamtuam pan meikang vaitawh kisai in buaina 211 veibang omkhin cihi.

More: Malaysia, Cheras vengsung ah Motorcycle 30 val meikanggawp

Kuala Lumpur khuasung ah meikang pen omtheizel, kiza zelzel a, ahi zongin sihkhatin mi hizahzah asi pen kiza ngeilo ahih manin, mulkimhuai phadiak hi. ZD Sawltak #zomidaily