General Aung San leh Deng Xiao Ping te hong lak makaihzia ~ Khup Lian Thang

General Aung San leh Deng Xiao Ping te hong lak makaihzia ~ Khup Lian Thang

Galpi nihna hun sung 1942kum, Japan leh Kawlte kipawl in, Kawlgam pan in Mangkangte nawtkhia uh hi. Leitung galpi ah Japan te in gal hong lel hiaihiai in, 1945kum ciangin Mangkang te zong Kawlgam ah hong lutkik in Japante nawtkhia leuleu hi. Tua hun laitak in General Aung San leh Mangkang galkap mang ahi Field Marshal William Slim te hong kimu uh hi. Japante in gallel in Kawlgam pan pusuah khit lian hun in akimu uh ahi hi. William Slim in Aung San akimuh pihna ahangpen , Kawl galkapte a akihtak hang hilo in, ahih hangin amau Mangkang te nasepna khatpeuh hong nawgkai sakzo thei ding ahih teh amakai pa tawh kimu in Mangkang te deihna bangin aom na dingun thu apia nuam ahi hi.

General Aung San zong pen a Japante galkap puan mah kithawi siset sa in William Slim kiangah hong pai hi. Aung San ahih leh amah leh amah kiniam khiatzaw hetlo in, William Slim tawh a kikim bangin awmpho sa in thu hong gen hi. Bang hanghiam cih leh amah leh amah Kawl mite tangin apai in ki ngaihsun ahih manin lau hetlo in tangtak in ding ngam hi. Aung San in Mangkang galkap te leh Kawl galkap te ki pawl (Alliance Force) in a kalsuan khopna dingin thu hong gen hi. Tua ciangin William Slim in “ No Kawl galkap te kong kisam kei hi. Hih Japante zong, ko ii thatawh a dong hi lel ung. Nung lam in ko Mangkangte hong nawtkhia in Japan te tawh akipawl ngei na hih na hangin tu mahmah in zong hong man in thong ah hong khia thei ing” ci-in dawng kik hi.

General Aung San in “Tua bangin hong manlo na hihna hong thei ing, banghang hiam cih leh nang pen British u lian kaht na hi hi (British te mi thupi, thuman takin gamta aci nuam hi.) ci-in dawng kik ziau hi. William Slim in zong Aung San lungsim puakzia siangtho leh it huia sa mahmah hi. William Slim mah in “A bangci na hiam, gal a zo ka hihna hanga hong pawlpih nuam hilel lo na hiam?” acih leuleu leh Aung San in, “A gualzo hi kei le uh cin kua hoh hih bangin nang kaingah hong pai ding hiam?”ci-in na dawng kik sawnsawn hi. William Slim in zong Aung San ii lungsim siangthona, agam leh minam ii phattuamna ding ahih nakleh ama dinmun a ngaihsutna khatbek len tentan lo-in, akilawm a kituak in a kalsuan theihna amuh ciangin pilsa, thupi sa in zahtak semsem hi.

1939kum in Communist Party of Burma (CPB) a kiphuat cil-in amakai leh apan khia sungah Aung San zong kihel hi. Bek thamlo in CPB ii amasa pen General Secretary zong amah mah hi lai hi. Tua laitak in Kawlgam a dingin Communist ki-ukna tawk kalsuan leng hoih pen leh kituak pen ding cih um ahih manin tua tawh kipan khia ahi hi. Ahih ahangin suahtakna la dingin mualtung mite tawh gamkhat in dinkhop ding hong hanciam ciangin Communist ki-ukna tawh kalsuan ding pen gen-in neinawn ta dello hi.

Federal Democracy tawh kalsuan dingin hong vaihawm hi. Tua mah bangin zong ama om nawnloh, suahtakna ngah tak ciangin zong Federal tawh ahih loh hangin Democracy ki ukzia tawh Belpawl gam a kalsuan nangin khaici na khia zo veve hi. Tua ahih leh Aung San in Communist ki-ukzia hoih a sa nawnlo hiam? 1940kum in Gamvai kalsuan akikhel nang ngimna tawh mundang gamdang pai in, tua sungin a tuahkhak thute hangin Communist ki-ukzia hoih asa nawnlo hiam? Hoih sa veve mah ta leh, Kawlgam ii zia tawh kituak nawnlo dingin mu ahi hiam?

Bangbang ahih zongin akician mahmah khat ah, hun khat lai-in thuman asak leh hoih asak ama ngaihsutzia dinmun (Ideology) pen, khuahun leh kim le pam tawh kituak in a khel thei makai khat ahihna ki lang a, ama sialsa Democracy mah bulphuh in aki kalsuanna hangin, hun tawmvei sung mah Belpawl gam pen leitung ah gam nuam khat dinmun tunpih zo hi. (1962kum khitteh galkap ten thuneihna la, tua hangin tuni dong gam zawng pen suak)

1949kum pan in Sente makaipi Mao Ze Dong in Communist ki-ukzia tawh Sengam kalsuan pih-a, ahih hangin ama deihna leh ama ngaihsut zia bek bulphuh tentan in amakaihna hangin Sengam pen khangto theilo in gam zawng mahmah khat suak uh hi. 1976kum in Mao Ze Dong hong sih ciangin Deng Xiao Ping leh alawmte hong thahat in, Sengam kikhel na ding, tua azatsa uh ki-ukzia leh sumbawl zia te, lem sa lo in lamthak hong sial in hong kipan uh hi. Sengam pen a gam lah zai mahmah in mimal zong tam mahmah uh hi.

Communist Party khat bek tawh dinguh ahih manin a gam a zawng zenzen hangin thakhauh mahmah leh leitung bup in kikihta veve khop dinmun ahi hi. Bek thamlo in leitung ah a khangto masa, ahau masa, apil masa minam cih bangin ki sialhpih ki phatsak pih ding tangthu hoih tampi anei minam te ahi uh hi. Kum tul tampi tampi anei minam leh gam khat a hi hi. 1976-78kum pawlin a gam mimal pen 900million val bang pha hi. A langkhat ah Singpore in abeisa tangthu hoih tangthu limci bangmah neilo hi. Hunkhat lai in Sengam pan sum thalawh dingin gamdang akuan khia Sen mite kituahna gam neu ciklik khat ahi hi. 1978kum pawl in Singapore mimal pen 2.3 million bek pha hi.

Abei sa tangthu tuanthu te ah bangbang ahi zongin, tu laitak in ahih leh Singapore te khantohna zia amuh ciangin amau tungpan pilna lak dingin Sengam makaite in khensat uh hi. Sengam makaipi Deng Xiao Ping in, Singapore te khantohzia te a kan dingin mi tampi tak 1978kum pan ki pan in paisak ziahziah hi. Amah mah in Singapore te makaipi Lee Kuan Yew tung pan in pilna ngaihsutna hoihte tampi la in, Sengam akhantohna dingin hancaim hi.

Hih ci et leng hih zahtak-a alian mahmah Sengam Sen kumpi ten, gamneu mahmah khat ahi Singapore (Sengam mite in amau Sen mite makaih gamdang gamte – (Singapore, Hongkong, Macau, Taiwan) pen en pi vetlo, amau Upi aa kituat den uh hi) te tung pan ngaihsutna la,sumbawl paibawl zia te et-teh , Singapore te tungpan pilna sin dingin a pai ngiat uh pen a lamdang mahmah ahi hi.

Ki hihsakna ki phatsakna te om vet lo in, a theizaw a pilzaw a khangto zaw te tungpan in sin ding kan ding pen haksa sa vetlo hi. Lungsim siangtho taktawh ki niamkhait sa in, Singapore makaite tung pan in ngaihsutna ngen ngam lel hi. A gam uh a zawng a khangto hetlo ahihna zong sianggen gam lel a, ahi pen ahi bangin sang thei hi. Amau upi hihna, amau leh amau thupi aki saknate, nidang lai-in leitung ah gamhau pen leh apilpen gam khat ahihna, cihte gengen selo in tu laitak adinmun uh ki thei mahmah uh hi. Sengam ii mailam ding bek en in, a kisam bangbangin akikhel theih ding haksa a salo makai hoih a neih na hangin , ong khangto henhan in tu in leitung ah gamhau pen nihna hita ziau hi. Kum 30 val sungin na tampi kikhel ziau hi.

Zomi makai nautang mimal kim ciat in zong, a makaih kipawlna or pawlpi , gam leh minam makai in a om lai takin, a tunga General Aung San leh Deng Xiao Pingte bangin

1) Lungsim puakzia te tangin a siangtho sitset ding thupi mahmah hi. Gam leh minam pihte’, a pawlpi mite’, a innkuan pihte’ mailam nuntak khuasakna akhantohna ding ahih nak leh lungsim siangtho sak in ki niamkhiatna mah bulphuh in a kisam bangbang in ma anawt ding uh thupi ding hi.

2) Sen makaite in kum kul tampi tangthu aneihna uh, hun hat lai in leitung ah ahaupen apilpen ngeite ahih na uh, agam zaina ami tamna uh, cihte tungah kisak theih pih dihdih lo hi. Tu laitak amau dinmun amau hihna, a zawnna panin a suahtak na dingin pilna siamna akisapna pen ki niamkhait tak in sang thei uh hi. Amau dinmun leh amau muhna bek ah om tentan se lo in, a gam mite a mipite mailam khantoh phattuam na ding lianbek mitsuan in nei lian uh hi. Zomite in pilna in laktheih ding thupi mahmah hi.

3) Sente makaite in in Singapore makaite’ ngaihsut piaknate leh Singapore te tungpan in pilna la-in tua tawh agam uh akalsuan pih mah bangin, Zomi makaite, kipawlna pawlpi leh innkuan lutang te in kisam bangin kiniam ngiat ding thupi mahmah hi. A thei a pil a siamte tungapn pilna la in, amau lamlahna tawh a kalsuan theih dinguh thupi mahmah ding hi. Mihing in kicinna anei hetlo namte hi in, na khempeuh a theithei namte hilo ihih manin, ahoih zaw ding ahih nak leh a tawntung in a kikhel thei mi khat na hih ding thupi mahmah hi. Lungdam, Khup Lian Thang