Koi uang zaw ~ Evan. Suangh Dal

Koi uang zaw ~ Evan. Suangh Dal

Covid thu kigen na lau zah, na awlmawh zahin Lungdamnathu ka gente uh awlmawh-in lau hi zawpeuh le uhcin tua ci lau lo ding hi uhteh.

“Topa hoih hi kei” tungah bek hi loin “Topa heh hi kei tungah” cih na kitheih sitset masak kul hi. Topa’ hehna thu i tel sitset ciang bekin mawhna pan kisik ding kikan pan hi.

Covid kilawh theihna gulhik cil geh bangin kanin na lau liangzah-in Pasian’ hehna kan zaw lecin na nahlawh pek zaw ding hi. Pasian hehna i thuak khit teh tua launa pen na pasian hong suak khak ding zong lauhuai sawnsawn hi.

Pasian hehna i thuak khit ciangin kidop ding gengen sangin, Pasian hehna hong kibuak ma-in mihing kilaitat i biakpiakziate, i Nipi ni zatziate, i kimaikaih zia, i kipattah ziate, i tawnziate kidop ding hizaw hi.

“Mihingte in a mawhna le a gitlohna hangin Pasian’ thumaan seelcip uh ahih manin van panin a hehna hong kilang sakin a gimpiakna dingzia hong kilang sak hi” (Rom. 1: 18).

Tu-a i launate tawm no cik hong kilang hi pan hi. Gen tham nai lo hi. Tu-a i Covid-19 pen lau bel lau mah hi hang. Ahi zongin Topa’ Nipi khawng nute’ pate ni dingin na vaihawm ngamte uh kei lauzaw hing. Kamdang khatin gen lehang Covid na lau mahmah uh sangin Nipi ni khawng nute’ ni pate ni na cih ngam uh keimaw lauzaw hing ei.

I lau kibang lo na himawk. Pasian a laute in hih leitung thute lau lo-a, Pasian lau ding a kin lote in hih leitung thupiangte nak lau pha mahmah deuh ding uh hi.

More: Covid hangin innkuan pihte in hong nutsiat khitteh ~ Lia Cing Van Kim

Pasian kihta-a kidop nam pen uang lua cih om ngei lo-a, leitung nate kihta-a kidop pen uang lua den hi. Evan. Suangh Dal