Gamvai leh Biakna vai khenzia ~ Pu Thangboi

Gamvai leh Biakna vai khenzia ~ Pu Thangboi

Tuhun teh Zomi te’n Gamvai leh Biakna vai lumletkha pahpah ih hih man in ih minam sungah buaina tampi om hi. Tua ahih man in Gamvai leh Biakna vai khenzia ding tawm lungngai khawm leng hoih ding hi.

Hih mun ah Gamvai kacih ciang in kawlpau in Naingnganyee, mikang pau in Politics akici pen hi. Biakna vai kacih ciang in Christian (tapidaw) Biakna bek ahi hi. Biakna dangte tawh kisailo hi.

– Gamvai ih cih pen leitung leinuai aa akimu thei (visible) khempeuh ahi hi. Biakna vai bel akimu theilo (invisible) khempeuh hi.

– Gamvai pen gam thukhun (constitution) tungtawn in ki vaihawm aa Biakna vai zong biakna thukhun ahi Laisiangtho tungtawn in ki vaihawm hi.

– Gam thukhunte pen mihing te’ bawl hi aa leitung aa gam thukhun a upa penpen USA te’ thukhun ahi hi. Tu kum 2016 kum September kha in kum 229 pha ta hi. A upapen nihna 1814 kum aa kibawl Norway ta hi aa athumna pen 1831 kum aa kibawl Belgium ta hi.

– Biakna thukhun (LST) bel kum 1500 val sung phial mi tuamtuam 40 kiim bang in agelh hi aa agelh khit zawh uh kum 2000 bang phata hi.

– Gam thukhun in gam khat sung aa akimu thei teng bek huam aa biakna thukhun in leitung leh vantung aa akimuthei leh akimu theilo khempeuh avek in huam hi.

– Gam thukhun pen adiak in mihingte’ zuihding aa kibawl hi aa biakna thukhun pen mihing, akimu thei akimu theilo na khempeuhte leh Pasian mahmah in azuih ding aa abawl ahi hi.

– Gam thukhun pen agam mite in adeih kei nak leh kilaih thei aa biakna thukhun pen leitung mihing khempeuh in adeih kei phial zong in kilaih thei tuanlo ding hi.

– Gam thukhun khatpeuh ih palsat hang in mi khat teiiteii in hong muh hong theihpih khak kei leh mawhna omlo in kisim hi. Biakna thukhun bel kua mah in hong theihpih khak sese loh hang in ih palsat nak leh akimawh hipah hi.

– Gam thukhun azuite bang mah kicih lo aa biakna thukhun azuite’n hamphatna leh pahtawina tampi ngah hi.

– Gam thukhun in mawh hi hong cih nak leh thuum theih om nawnlo aa mawhna thaman thuak loh phamawh hi. Biakna thukhun in mawh hi hong cih hang mawhna thaman thuakloh theihna lampi om hi.

– Gamvai ah thukhun zui in gam-uk ding kilaih zel aa biakna vai ah bel a Ukpa kilaih ngeilo hi.

– Gamvai ah atungnung ding kituh kul aa biakna vai ah anuainung ding kituh kul hi.

– Biakna vai ah Zeisu theih bek tawh pianglo aa neih zong kul hi. Gamthu ah bel suahphet aa neihsa hizaw aa theih loh phamawh hi. Ih theih kei leh gamvai kisem theilo hi.

– Gamvai ah theihna tawh kikal suan. Biakna vai ah neihna tawh ki kalsuan.

– Gamvai ah mipite’ deihna zuih kul aa biakna vai ah Pasian’ deihna zuih kul hi.

– Gamvai in biakna vai tung ah thuneihna nei zolo hi. Gtn in leitungbup aa kumpi teng kikai khawm in “Tukum guah zusak lo ding; huihnung sak lo ding; misi sak lo ding” cih bang khen tat theih omlo hi. Ahih hang in biankna vai Ukpa’ khentatna khempeuh gamvai in azuih loh pha mawh vetse hi. Gamvai tung ah biakna vai in khupnelh hi.

– Gamvai pen akimu thei teng bek ahih man in tuaval bangmah kantan zolo hi. Biakna vai bel akimu theilo teng ahih man in akimu thei te’n khaktan theilo hi.

– Gamvai in gamgi nei aa biakna vai pen tua gamgi te’n khaktan theilo hi.

– Gamvai tawh akilam mihingte’ nuntak khuasakna sung ah biakna in na asep theihna ding in gamvai in kong hong leh hoihpen hi.

– Gamvaite gamvai zia leh tong tawh kituak in vaihawm ding hi aa biakna vai zong Ukpa’ zia leh tong zuih ding ahi hi.

– Gamvai tawh kisai kipawlna khatpeuh phuat ding ciang in mihingte’ gelsiamna leh ngaihsut siamna ahoih pente gawmkhawm aa phuat ding ahi hi. Biakna vai bel a Ukpa’ cih bangbang manh ding hilel hi.

– Biakna pawlpi khawng gamvai dan aa mihingte’ hoihsak thu tawh phuat ziauziau ding hilo aa a Ukpa dot phot ding ahi hi. Pasian’ thukim pihna omlo pi aa pawlpi khawng mawk phuat ziauziau ding hilo hi.

– Gamvai pen pilna siamna tawh deihtak kidemh ding hi aa biakna vai ah bel itna masuan in kiniam khiat tak in mi khempeuh tawh kiho theih kul hi. Biakna vai ah gal omlo hi.

– Gamvai ah angal hat tata, mitam aukzo tata gualzo in ki ngaihsun aa biakna vai ah akiniam khiat tata, mitam ahuhzo tata gualzo in ki ngaihsun hi.

– Gamvai ah ei mahmah in ihsep kul aa biakna vai ah Ukpa’ sepsa upna muanna tawh zuih hiathiat ding ahi hi.

– Gamvai ah gam khat luahna ding in khua-ul sisan tawh lei kul aa biakna vai ah bel tawntung gam luahtheihna ding in Zeisu in abuak khiat a khua-ul a sisan te tung ah upna muanna tawh kingak hithiat ding hilel hi.

– Gamvai ah thuneite vahuh in va panpih leng pahtawina kingah aa biakna vai ah bel Ukpa ihva huh kul sese lo hi.

– Gamvai ah uliante tawh kimuh khak ding hamsa mahmah aa biakna vai ah bel ut hunhun in Alianpen Pa kihopih thei ziauziau hi.

– Gamvai ah pilna, siamna, hauhna, cidamna leh hanciamna te thupi mahmah aa biakna vai ah bel Ukpa in akicing in aneihsa hi aa tuate khempeuh ih nuntakna ah hong luankhiat theihna ding in Ama’ zia leh tongte zui in amah tawh kikholh det kul hi.

– Gamvai khempeuh mihingte’ khutsung ah Pasian in a apsa hi aa biakna vai khempeuh Pasian in atawntung in len gige hi. Gamvai ah thuneihna Pasian in mihing’ tungah apiaksa ahi hi.

– Biakna vai pen vantung pan kivaihawm aa gamvai pen leitung pan kivaihawm hi.

– Gamvai ah gualzawhna leh lawhcinna pen akimutheite tawh kiteh aa biakna vai ah bel akimu theilote tawh kiteh zaw hi.

– Pasian a umte in “Vantung ah na deihna akicin mah bangin leitungah kicingta hen” a cih theih ding kisamh hi.

Gamvai leh biakna vai pen kibangh hetlo napi kizom gige hi. Kawlgam bang ah gamvai hong kihon teh biakna vai nasepna zong nakpi in mazang pah hi. Zomi te’n biakna leh gamvai helzau nawnlo in ama’ zia leh tong tek tawh kalsuan thei hile hang ih minam hong cidam mahmah pah ding hi.

Gamvai nasem te’n gam thukhunte hoihtak theih kul aa pilna siamna tawh kop akul mah bang in biakna nasem te’n zong biakna thukhun ahi Lai Siangtho sung ah nakpi tak in kibual in Pasian tawh hoihtak kilawm tatna nei in Pasian’ zia leh tong zui in a kalsuan theih ding uh kisamh mahmah hi.

Tu aa kipan gamvai leh biakna vai te ama’ zia leh tong tawh kituak in sem setset leng Zomite ih nahlawh hong pek ding aa mite’ mai leh Pasian’ maipha ngah ding ih hih man in minam lian khat manlang tak in ih suak ding hi.

Hih lai nasim kawmkawm in Pasian’ Khasiangtho in hong lawng in athuthuukte hong hilh ngiatna ding in thu kangen hi. Amen! Lungdam, Mung Laan Thang (Tawmvei USA)