Covid hangin innkuan pihte in hong nutsiat khitteh ~ Lia Cing Van Kim
အဆဲတောင်းပို့စ် khat ong gelh lai ning. Ngaihsutna a kibat keileh mawhsakna khempeuh ken tang ning ei. COVID hangin i innkuan pihte in hong nusiat khitteh, lungsim pumpi kigim mahmah hi. Cina kepteh a cina te zong thukhat a kemte zong lungsim pumpi a gimsa ahi hi. Si nungah lengla do zong baihlo hi. COVID a ngahkha a om leh zong COVID dokawm, lenglo dokawm baihlo zaw lai hi.
Zoom tawh kitut pihna i neih leh, ni 3-4 kan a khengval lohding hoih ka sa mahmah hi. I ki it/phawk nate kisuutsuut nuam mah a, hun zekai thei hi. Tua in inntekte burden piapia suak thei hi. I ki it lohman hilo a, inntekte i khualna ahi hi. Tutpihna service zong nainih kaan kheng keileh hoih kasa hi.
Inntek te in bel hong nial ngamlo, hun sau lua hong ci ngamlo ding uh hi. Inntekte in lengla hong do zolo/ong join zawh kei leh zong telsiam ni. A diakin Covid hun sungah lungsim pumpi tawlngak ngiat ding kisam ahi hi. Phone call nangawn i san thadah lai hi. Tua hinah, en i thapiak nopna pen a thabei nading uh ahih khak ding lungngaih huai ka sa hi.
Ka pa in hong nusiat teh:
A vuina ah tavuan nei biakna siate longal hong pailo hi. Ko zong a positive hi napi, PPE level 3 silh sitset in ka pai uh hi. Siate tawh zong ka omkhawm kei uh a, siate in han ah hun a bawl pakna video pan bek ka en uh hi. Tua a man khitteh siate ki hem a, ko ka pai pan uh hi. Tua pen ka lungdam hi.
Dah pihna sumte mobile banking pan vive hong kipia/vaihawmsak ahih manin ka lungdam hi.
Kha 2 sungbang lengla kuamah sanglo, zong hong kipailo hi. Ka pa’ first cousin te nangawn kha 6 khitteh hong hawh pan uh hi. Tua pen ka lungdam hi.
Gamdaihna hotel khat ah ni 3 sung ka tawlnga ngiat a, annek le ihmut lian bek kisem hi. Nitak teh Zoom tungtawnin hong kitutpih a, tua bek lian hipah hi.
An zong a baihsa mah ka vaikhak ziau uh hi. Anhuan in zong i tha beisak mahmah hi. Meltheih ulenau a damte in an minsa in innmai ah hong koihsak ziau uh a, ka lungdam hi.
Supna nungah dahna (grief) tuah laitak ka tuah bangbang ka gen theih pawlpi siamah khat nei bek thamlo, prayer partner nei ka hih manin ka lungdam hi.
A tawpna ah, hong nusia ka pa pen koiteng tung ding cih tel sinsen ka hih manin ka lungdam a, ka lungmuang hi. Tua in lungsim hong daai hong kizo sak penpen hi.
More: Genloh a phamawh ta thu ~ Cing Van Kim
Tua ahih manin mimal kimciat i kha ading khamuanna nei sa-in om ni. Tua banah hong nusia a om leh a innkuan pihte gim a pia beh lodingin pilvang takin geelsiam, thapiak siam ni. Lungsim pumpi tawldam nading tawlngak kisam a, tawlngak theih nading a daai hithiat mun le hun space kisam hi. Tua banah i sih nungah i kipahtawina pat sangin i kinuntakpih lai kipahtawi appreciate diamdiam theih ding zong thupi mahmah ka sa hi. Lia Cing Van Kim
Comment piaknop aomleh...