Kisam sa veng Aw ~ Dong Mung

Kisam sa veng Aw ~ Dong Mung

1). International Zomi Literary Society – Leitung kiuli dongah akizel Zomite i laigelhzia kibangin akhantoh nadingin International level in Zolai zuun pawl nei a, i kalsuankhop ding kisam sa ing. Tua kipawlna huhau in kum 1 khatvei conference nei in, Zolai khantoh nading hanciam mapang khawm leng, i Zolai hong manpha semsem dinga, Zolai gelhzia tawh i minam sungah kigawmna, kithutuahna hong khang ding hi. Zomi sunga lai uukte le laigelh siate nuntakna hong nuam tuam zawdeuh kha ding hi.

Hih kipawlna tungtawnin i laibute Zomite omna mun khempeuh ah kizelin tungkim thei henla, tua tungtawnin mikimin Zolai simkha hileh i Zolai pen Zomi khempeuhin sim thei in, gelh thei dinga hong manpha mahmah ding hi. Tua bek hi loin hih kipawlna tungtawnin Zomi sungah laibu hoihnono hong tam semsem dinga, i minam sungah khantohna hong kibehlap kha ding hi.

2). International Zomi Music Uplift Society – Leitung kiuli a om Zomi sunga Music uukte kigawmtuah in kalsuan sawma, ma lak ding ahi hi. Tua tungtawnin i musicte’n quality hong nei semsem dinga, hong manpha semsem ding hi. Tua bangin Leitungbup level a nasepna tungtawnin Music siamte nuntakna hong khangto dinga, sep tha man, hanciam tha man hong om dingin ka lamen hi.

3). International Zomi Singers Association – Pasian thupha tawh Zomite pen la sak siam, aw hoihte ihi hi. Tua Topa hong piak i siamnate tu a sangin a manpha zaw semsem le i hamphat lawh theih nadingin Sungers te kipawlkhopna nei in kalsuan khop ding kisam mahmah hi. Tu ciangciangah eimau san ciat panin hanciamin kikalsuan a, khui khat i bawl nangawn pen a zuakna ding kibuai mahmah mawk hi.

Cihnopna ah meltheih hau in hong zuakpih ding ahaute’n khui bawl leh gam khempeuh, mun khempeuh tung zo a, ahamphat lawh kei phial zongin suplawh samlo cih dan hi. Ahi zongin meltheih nei mello khatin hong bawlin hong zuak ciangin ahuh, a panpih ding omlo ahih manin ama tunzawhna ciang bek mah ah zuak thei a, suplawh dikdek thei hi. Kipawlna kician nei in tua tungtawnin zuak hileng, kisuplawh lua samlo ding hi.

4). International Zomi Culture Uplift Society – Leitung khantohna tawh kizui-in i omna mun zui-in kigamta, ki nungta ahih manin i ngeina hoihte kipaisan kha thei hi. Tua kipawlna in i ngeina hoihte manphatzia, kepcin huaiziate khangthakte tungah hong hilh, hong hawmsawn ding uh a, tua tungtawnin khangthakte’n i ngeina hoihte kithei, kitelin kikemciangto thei ding hi. Tua banah i zui dinga, namdangte lakah Zomi ngeina hoihte kipholak thei ding hi.

A omsa kipawlnate ka hawmthawh man hi zenzen lo a, Leitungbup ah omta ihih manin leitungbup level in kalsuan ding hoih ka sakna a gen bek ka hi hi. A omsa Zolai zuunnate, Music Lapsannate, Ngeina Kemcing pawlte thupi in zahtaak huai mahmah uh hi. Kipawlna thak phuanin a masate nusia in, langpan ni, a cinuam ka hikei a, a omsate mah tawh khut kilen khawm, mapang khawmin International Level in kalsuan zoleng tu a sang i khangto zaw kha tam, tu a sang i sep tha man, i gim i tawl tha man a om zaw tam, cih ngaihsutna ahi hi.

Tuciangciang la khui bawlte, laibu bawlte sungah i haksatna pen a zuakna lam ahi hi. Meltheih hau in, a deihsak a panpih ding haute bekin sep tha man ngah zawdeuh/met lawh zawdeuh hileh kilawm a, meltheih neilote bel bangzah takin a la khui hoihin, a laibu ahoih phial zongin inn ah ciang vinven tam zaw pian hi. A tunga i gen Leitungbup Level in kipawlna nei in, a munmun, a gamgam ah kizom dimdiamin mapang khawm hileng a semte adingin sep tha man om dinga, a tawl uh diam tuam ding hi. Tua bek hi loin Zomite aa dingin zong manpha dinga hamphatna i ngahlawh thei ding hi.

Tuhun ciangin a etlawm i ngeina niik le puan, kizep kipuahnate pen aleh alotengin kisilh kiteeng ta a, designer te’n zong amau thangah dandanin hong khui gawp, hong bawl gawpta uh hi. Tuate ahang ngaihsun leng a zat dingzia le a manphatna telcian loh man zong hikha thei hi. Tua ahih manin Zomite’n i ngeina hoihte zahtaak siamin, amau munciat le amau hun tekah i zatsiam theih nadingin i kihilh, i kigenpih kisam hi. Tua ahih manin a tunga i gen kipawlnate khawng om a, tuate a munmun, a gamgam ah ma i lak ding kisam mahmah ta hi. Tua ahih manin kuama’n nong teklhialh loh nadingun hong thuum nuam ing….. Thakheh Zomi…. Dong Mung