Kipaktawng sak kei in ~ Tdkhen

Kipaktawng sak kei in ~ Tdkhen

1. Thu nengnengte hangin kiselsel, kiphunphun kei un. “Ak-ta mang kuan kitutu” ci hi.

2. Na Nu na Pa khasia sak kei in. “Khuamial sunga mei kivak lai sukmit na bang ding hi” ci hi.

3. Huaiham duhhop lua kei in. “Akta duhgawl kilawhkhuh” ci hi.

4. Na lawhcinna-ah kipak pah nai kei in. “A bepal-pak’ om thei” kici hi.

5. Gamtat kampau’ kidawm in. “Tui buasa kiluak kik theilo” kici hi.

6. Na nasep a hoihna na tel’leh lungkia kei in. “Bui a phakkuan-in tawp” cih om thei hi.

7. Na thuphabawlnate hong kithuk pah dingin lamen tuan kei in. “Ciimnuai-a sa kibah Geeltui-ah kithuk” cih na om hi.

8. Na tunga hong tungding na deihlohte gengen kei in. “Thallam cilsiat ei’tung tu” ci hi.

9. Midangte’ hoihloh, cihlohnate koko kei in. “Ih ko’te kisun thei” kici hi.

10. Na pil, na siam, na hatnate suang lua dah in. “Ngalta muanhuat’ kitan thei” ci hi.

11. Ciamnuih gualnopna-ah kidawm in. “Ciamnuih gal suak thei” kici hi.

12. Na dinmun ki-entel lo-in deih teel lua dah in. “Deihteel singteel a val thei” kici hi.

13. Na zi, na pasal, na lawmte laihlaih kei in. “A masa val om kei” kici hi.

14. Na lawm na gual lakah kidawm mahmah in. “Dek lam tuktum zong gal suakthei” kici hi.

15. Na lawm na gual leh midangte eng’lua dah in. “En’ sawn bei mawh” kici lel hi.

16. Haksatna khat peuh kitheihmawhbawl’in pumpelh sawm dah in. “Gallu kihta gallu tuak” kici hi.

17. Gim leh tawl zawh nung hitaleh hanciam teitei in. “Matutkuan leh galphawnkuan” kici hi.

18. Hoih na sak khatpeuh kipakpih lua dah in. “Hakai pahtak lungvei thei” kici hi.

19. Na neihlai-in kiphal lel in. “Hawmsem nungta, nebum si” kici hi.

20. Bangbang hitaleh na u na nau mah en masa hamtang in. “Inngua hahlo gamgua hah” cih, mawhsakna om hi.

21. Banghun banghunah kamsiam ding hamciam in. “Kamsiam sial lei sangg, kamsia sial liau” cih na om hi.

22. Zindo leengdo hahkat in. “Kawl zong tuidamin kiho” ci hi.

23. Nau leh ta na hau zongin kimuanpih lua kei in. “Kom Kiim zong tapasal sagih nei nawkik” kici hi.

24. Haksatna nathuakleh patau lua kei in. “Khuapiguahzu satang hal” kici lel hi.

25. Leei batloh theih ding hanciam in. “Leiba leh sakha nuainung” kici hi.

26. Muh baih, hauh baih, tun baih sawm lua kei in. “Lamnai tawn nuam behiang kumin tunglo” cih leh “Buah in ka mei tung hen a cihleh heulawh” kici hi.

27. Letsong hong kipiapia, ci-in lungdam lua dah in. “Langbawm a ek-ah awk” cih om thei kici hi.

28. Na it na ngaihte tawh na kitotleh sialo hi. “Kam sunga pokhawm leii leh ha zong kipet thei” cilel hi.

29. Ih kiseelseel hangin mite’ upmawh kibaang thei veve hi. “Meimalo-ah tho tulo” kici hi.

30. Heh baih, nuak baih lua kei in. “Meingong lung leh sazantaa” ci-in gitnatlohna lam genna a om hi.

31. Na paallai am’ inla, ahi zongin kimuanpih lua kei in. “Mihing leh papo” cih a om hi.

32. Na mothakna-ah kidawm in. “Mothak zummawh zasankuang kai” kici hi.

33. A nununglam sangin a masa lam tuh zaw in. “Mual khawl masa teek tang” kici hi.

34. Na hihna zah sangin uangtat lua kei in. “Mui zanglua kipeisat” kici hi.

35. Na gensa, na hawmsa thu-ah awk ngam in. “Ngal hapaaksa tum kik ngeilo” kici hi.

36. Nangmah mah kitodelh sawm ngiat in. “Numei in a maa khuat, sumkuang in a li khuat” kici hi.

37. Na melhoihna kisaktheihpih kha kei in. “Numei in paal’lai nei, balpi in to lai nei” hunno khat sung bek a cihna hi.

38. Na kihtakte sim gensiatsiat kei in; mi meidawite’ zia hi. “Tapkual han” kici hi.

39. Na sungh, na pu dem’bawl kha kei in. “Pute leh lamsak kineh zo lo” (Pute kizo ngei lo; Pute’ ngau’ kilel thei; ) a ci hi.

40. Na mailam ding khualin kampau, gamta kidawm in. “Sakhi in a tat nading kuamkua khual” cibuang hi.

41. Kidawm takin nungta in. “Bui leikei zong khua ngai” cibuang hi.

42. Pi’sawm’ vet ding cithapai kei in. “Sakhi that lo, ngaltang tum” kici hi.

43. Kinungsikna na lua cih thei inla, ngaihsun masa lo-in kampau, gamta kha kei in. “Sial tat zawhnung sialdai kai” kici hi.

44. Tate itlua-in ngeknawl’ lua kha kei in. “Tapa hawmthawh tualgal suak” kici hi.

45. Zo nai lo-in nuambawl masa kei in. “Tu nai lo, khekhuang nuam” kici hi.

46. Kikem denin kigalging den in. “Va-ak cinghkam sakhau taw-ah kipua lo” kici hi.

47. Sepding khat peuhpeuh kinelhsiahsiah sak kei in. “Vai nunung guahsia in lap” cih om thei hi.

48. Na vang neihna kem siam in. “Vaphual tang sa, va-ak tang” cih om thei hi.

49. Gul bangin pilin, vakhu bangin migi in. “Zawlthu kalah sial thawl thei” ci hi.

50. Na nisim nuntakna-ah kidawm in. Nisim ciaptehna(notebook) nei gige in. “Zawng nek ngau in thal puk lawh” kici hi.

51. Nangmah ki-entel lo-in na lawmte mat lala kei in. “Zawng in ama’kheng mu lo-in, a lawmte’ kheng ko” kici hi.

52. Zuauthu leh hong kivetkik thei ding thuhoihlote-ah kidawm in. “Zuau in a khap tawn” ci hi.

53. Kiliansak, kihausak, kitungtuangsak lua kha kei in. “Kibalbut, lutuk, a gah lel” cih om thei hi.

54. Na guallelh, na maizum, na zawn na ngau’nate sutsut kei inla, na manphatna lam tuattuat zaw in. Ngaihsun phapha inla, pilvang takin nungta in. “Mi’bawlin i mang kei; ei leh ei kibawlin i mang hi” kici hi.

55. Mite’ neihsa tungah tatsia kei in; mite’ khasiat nadingin om kha kei in; hong kiphulkik thei-in, hong kihamsiat thei hi. “Ei leh ei kituisa buah” cih a om hi.

56. Unau pata kiveeng dah un; “Ankhingthu” ci-in cihtak’lo khat hang’tawh kitelkhial thei ci hi. Sum leh paai-ah kizom kei un; “Sum-a ki-unau om lo” na ci hi.

57. Kivangkhualnate, kisim-gin gige-nate, sikseh nuntaknate nei gige in. Muh peuhpeuh nek pahpah, zatbei pahpahna pen “Vangsel, vang kiam, vang bei” kici a, “Khuaitangdep banga zu neilo” kici hi.

58. Mite’ khasiat nading, mite’ sinmuat lungmuat nadingin om kha kei in. “Mipi’ ngau pualah” ci-in sihsia, natsia kituak thei kici hi.

59. Pasian’ nasem pawlkhatte in zong amau’ siamlohna hang tawh gensiat, bawlsiat a thuak om thei ding hi. Amau’ siamlohna hang mah tawh mite in a kamsiatlawh zong om thei ding hi. A kam panun a khum a kha a luang thei ahi hi. Khris in, “Kei’hangin bang na thuak” hong cih laitakin, “Ka thuaknate thei in” i ci-ngam ding hiam?

60. Mite’ mawhna na maisakleh mawhna hangin a siding khat a honkhia na hiding a, na maisak keileh misi ding khat a kemkem na hiding hi. “Midangte’ mawhna na maisakleh nang’mawhna zong hong kimaisak ding hi.” (Mt 6:14). Tdkhen