Interview: Lianpi -Zolengthe tawh ki holim pakna

Interview: Lianpi – Zolengthe tawh ki holim pakna

ZomiDaily :: Tukal ZomiDaily website ah Zomi Stars te sungpan “Weekend Special” suahsakding in Lianpi tawh kaki muthei uhhi. Lianpi pen 2004 kum in a lawmte pawlkhat tawh Modrenkidz cihleh 2005 kum in Blankpaper cihte ong phuankhia khat ahihi. Tua banah ei Zomi lasiam lakpan Modern Rock a sa masapen leh ong phuankhia masa penkhatzong hipah hi.

Lianpi pen “Zolengthe” cihtawhzong akithei mahmahkhat hi a, tua Zolengthe cihpenzong ama ii Album Title khatmah hipah hi. Lianpi onggenna ah Zolengthe lapen Khual Tawng in aphuaksak hi a, Music zong amau unau tengmah in atumsak ahihlam ZomiDaily tungah onggenbeh hi. Lianpi’ sak Zolengthe la na ngaihnopleh YouTube panin ki ngaithei dinghi.

Lianpi pen lasiam leh la ukmahmahkhat ahih mahbangin mawk om hetlo a, nungdeuh inzong Album thaksitset khat ongbawlkhia hi. ZomiDaily in Lianpi’ Album thak abawlkhiat thu katheihdan uhpen lunglut huaikik zawzen hi.

Tukum August 06, 2011 ni-in Lianpi in ZomiDaily ii Facebook Group link ZomiDaily’ Facebook Group tungah lakhat ngaihtheih dingin ong Post khia a, hong ngaihsak un maw ongci ahih manin kana ngaisakpah uhhi. Hih la na ngaihsak un aci mawkmawkbek ihsakleh nahideklo in, lawmpa’n Album thakkhat anabawl khinkhian nahi a, tua Album Title minding in “Hong Ngaihsak Un Maw” anaci nahimawk hi. Album Title dingzong ngaihsutsiam leh gelsiam kasa citciat mahmah uhhi. La a uk ciangbek hihetlo, Zolapi tezong kepcing nopna lungsim aneikhat ahih mahbangin “Hong Ngaihsak Un Maw” cih Album Trailer sungahzong Zolapi kiza ciaiciai dinghi.

“Hong Ngaihsak Un Maw” Album sungah Zolengthe Band te in nasiatak in tumsak ziahziah uhhi. Zolengthe Band pan Music tumsiam aki helkhateng hih anuai abang ahihi.

• Guitar : Thawnpi
• Bass : dozo Tuangpi
• Drum : Nangkim
• Keyboard : Khualtawng

Ih zakzaksa leh ih ngaihngaihsa ahi “Laimai Thak” Album ahzong Lianpi hanciamna tampitak ki muthei hi. Tuabek thamlo Zomi Album tampitak sakpih ngeikhin a, aki helkhak Album tawmcik theihpakding in hih anuai ah konggualsuk uhhi.

• ZOMUS 2008 Malaysia
• Senlai Ni – Deih Mang & Suih Lun
• Kabelh Suanpi – Cinpi Idol
• Na Ma Hong Vang Ding Hi – ZCF Malaysia

Nungdiak mahmah inzong USA Tulsa khuapi aom iZomi Group tetawh “Siatuation” cih la hoihmahmah dawngkhat sakhawm uhhi.

Lianpi kiangah Album thak adang nabawl baihdinghiam cih kadot uhciang in tulaitak “Hong Ngaih Sak Un Maw” cih Album adingin MTV kabawl uhtawh buaisan laitak kahih manin adang Album thak bawlpak loding cih ZomiDaily tungah onggen khia hi. Tuaban ah “Laimai Thak” Album ading inzong VCD asawtlo in ki ngahtading cihzong Lianpi in onggen hi.

Lianpi :: Zolengthe tawh ki holim pakna

ZD: Modern Rock banghang in deihnahiam cih nonggen theidia?

LP: Rock Music pen ka neutung akipan kadeih mahmah khat hi. Tuaban ah tulai khangthak Music tuamtuamte zong hoihsa mahmah ing. Ahi zongin Modern Rock mahin ka lungsim onglazo penpen sa ing.

ZD: Modern Rock bangkum akipan deih nahiam? Modern Rock nazak, nasak ciangin bang Feeling neicihzong nonggen theidiam?

LP: Modern Rock kadeih pen 2005 kumpawl hi-in teh. Modern Rock kazak kasak ciangin tha ngah leh suakta kisa ngiat ing.

ZD: Leitung lasiam sungpan Modern Rock lasa siam leh Album nadeih penpen e leh?

LP: Breaking Benjamin te Phobia Album hoihsa mahmah ing.

ZD: Nang ngiat in la nagelh aom naihia?

LP: Pawlkhat ommah.

ZD: Zomi, Kawlmi lakpan lagelh siam nasak penpen nonggen theidia?

LP: Kawlgam pan tu ciangciang lagelh siam kasakpen Raymond (idiots) hiven.

ZD: Banghang?

LP: A lamal te hoihban ah a Melody zong hoihsa ing.

ZD: Lasiam minthang khat cileng State tungkhawng la nasakciang haksatna aom ngeihia?

LP: State tungah Rock la sa in ka dianziahziah laitak anuai ah mipi pawlkhat in hong ihmutsan mahmah hamsa sapenpen ing…lol

ZD: Na lungsim ong nawikai sakthei thukhat?

LP: DHS Reject laimah thuak hamsa sapen ingei.

ZD: Hun awng naneihciang bangkhawng hihtheipen nahia?

LP: Music ngai

ZD: Zawlla nasak banah lawmngaih zong nei cileng 🙂 Love acih nang adingin akhiatna?

LP: Love = Lungkimna

ZD: Na Crazy mahmah nakhat?

LP: Guitar

ZD: Na ut mahmah, na lunggulh detna munkhat?

LP: Jerusalem

ZD: Naneu akipan na sungmang?

LP: Lasa siam

ZD: Ihki hotheih leh hun manpha tampi nongpiak manin lungdam mahmah ungei.

LP: Hihbang in ZomiDaily pan hopihna nong neihtheih uh keizong lungdam peuhmah ingei.

Presented by ZomiDaily/ DeihMang