Kineu muh luakha ka hiam ~ Lian Tuang

Kineu muh luakha ka hiam ~ Lian Tuang

Zangkong khuapi a Pope Francis missa piakna VIP kitelzia ka muh ciangin Tamu a, ka tuahkhak thu khat ka phawk sansan hi. 2006 ciangciang Tamu khuabup ah Phone line 4 bek om a ahih manin sumzuak sumlei nasemte, kumpi nasemte le mipite phone zang nuam khempeuh ko kiangah ong pai den uh ahih manin meltheih ka hau zezen hi.

Zogam lenggahtui

Ka meltheih lakah Store lianpi khat anei numei khat zong kihel hi. A sai ah nek theih tuamtuam van tuamtuam ban ah gamdangzu tuamtuam zong zuak hi.

Khat vei Store nei nu tawh ka kihoho leh “ Maymyo, Tuanggyi cih te pan lenggahtui ( wine ) ong pai den hi. No Zogam pan wine piang lo hiam” ong ci laizang hi. Ko kiangah Wine piang peuhmah ei, cidamna tawh zong kituakin kilim nek zezen hi ven ka ci kik hi.

Bangmah beilo

Tualeh na vai kha in. Ken ong tansawn ning. Ka sai ah koih nuam ing. Ong ci ahih manin tawl 30 khawng ka vai kha hi. Tedim myoma veng Zoheisa ( U Zamdal te ) kiang pan hi a, thawl khat 500 ks ahi hi. Tua laitak ka khasum 930 ks ahi hi. Sia Kamdal te mawtaw Tamu ong pai ding tawh kituak sawnsawn ahih manin tua tawh ong kikhak pah hi.

Tamu ong tun ciangin a puakman bangzah kongpia tam ka cih leh kul kei e, a kituakkha hi lel ong cih san hi.

Kideihlo vetse

Store nei nu kiangah” Tedim Wine ong tung ei” ka cih leh “ aw aw nuam ing ei. Thawlkhat bangzah a ong pia ding na hia” ong ci kik pah hi. Ka dawgkik thei vat kei hi. 500 ks a lei in a puakman beilo cileng, bangzah ka ci tam ci in kei le kei ka kihoho hi. 600 akl 700 ks khawng cileng ahoih lel tam maw ci kawmkawm in Tamu Store saipi khatah Zogam wine a kizuak ding zong ka lungdam mahmah pong hi.

Atawpna ah aman zong a sinna ding hi pan aih teh ka leina zah mah in pia ning ci in ka khentat a ” 500 ks a kalei hi in ka leina zah thawl khat 500 ks mah tawh ong pia ning. Thawl 30 hi ” ka cih leh ong en lemlam in ong nuihsan daldal hi. Tua khit ciangin “ Thawl khat 500 ks bek man aih leh ken ong la dah ning. A sum bel ong pai veve ning. Kei sai ah van a hoihte bek a koih hi veng” ong ci hiau hi.

Letsong piakna

Kei zong ka mai lah zum ka heh lah suak in ka mai san biaibuai hi. Na deih keileh a sum zong ong pia dah aw leh ka ci mai hi. Ka lupna khan ah ka koih teltal hi. Hih thawl 30 pen vai gik ka sa peuhmah hi. Ka lung ong gim sak mahmah hi. Kua ma theihloh in pai mang lel ning ci in ka gelgel hi. Ka pai sam kei hi.

Tua bangin kha nih sung khawng ka koih cip hi. Tua khit ciangin ulian lengla ka neih ciangin Zogam wine na ciam nuam uh hia ka ci zel hi. A deihte thawl khat ta ka pia pah lianlian hi. Tua bangin mi 10 khawng ka piak khit ciangin Store sai nei nu’n ong hopih leuleu hi.

Ahoihte kideih

“ Nang wine a lim mahmah nei ci lo a hia” ong ci leuleu hi. Nei mah ing ei ka ci kik hi. Nunga te bel hi sam kei maw ong ci lailai hi. Hi kei a dang hi, tu a te bel thawl khat 2000 ks hi ka cihleh aw hi maw, na neih zahzah ong la ning ei ong ci hiau hi. Ka kep laiteng ka puakpah hi. Thawl 17 pha hi. Ka lungsim ah bel ka kisuang giugeu veve hi.

Sumbawlna ah hih dan vive aihleh a ngap hetlo hi mai ing ei” ci in tuni dong sumbawl ding ka kihta suak mai hi.

Mikhempeuh thupi

Zangkong a Pope missa piakna VIP telna ah pawlpi ading le biakna ading thatang tawh mapangte zong khat in na kihel citciat hi. Mi a tamzaw in a thupi ngiahsut kholloh penpen hi bilbel hi.

Lenggahtui vai ah zong kei kihelna akl kei thaman ding ka thupi ngaihsutloh manin ka van nangawn ong kideihsak lo a, kei thaman ding ka hel ciangin ong kideihsak kik pan hi mai hi.

Tua hi a, eima mun tek ah mi khempeuh a thupi hi a, mi khempeuh VIP i hi mai hi. Ahi zongin ama hihna a ultungsak luate leh ama hihna a kineu muh luate pen manneilo peuh suak zawsop thei tawh kibang ka sa hi. Lian Tuang