Kei kuate, kua minam?….. Nang e?
Kei pen kapa Tuithang, Kanu Tonzang (galpi nihna khit a Tedim, Leilum ah teng ) hi a, kanu leh kapa a kiten khit ciang Tedim, Lawibual ah a teng kahi uh hi. Tedim, Lawibual ah a teng kahih uh hang ka inn neihna mun uh hi a, kanu leh kapa kumpi nasem uh ahihman in, kei’ pian’khit Kapteel, Suangzang, Anlun cihte ah kum tampipi ka om uh hi.
Ka sangkahna leuleu takciang Leilum ( Tedim ), Suangzang, Anlun, Lawibual (Tedim), Tonzang, Mualpi, SHS 1 Sakollam ( Tedim ) leh Yangon (RIT /YIT) cihte hizel hi. Hih khuate khempeuh ka khankhiatna khuate ahi hi.
Bangbang ahi zong in, Lawibual (Tedim) pen ka phualpi leh adang teng (sawt omzaw phial kahih hang ) pen vai khatpeuh tawh ka om kawikawina munte ong suak hi. Tu in ahih leh Singapore ah innkuan a ka omna uh kum 25 bang cingta hi. Sawtpi om kahihman un Singaporean/Singapore mi (or) Singapore gammi hi tuanlo zel hi ung.
Tua ahihman in,
- Tedim ah ka om ciang khualui Tuithang, Lawibual a teng.. Lawibualte (or) Tuithangte
- Tedim kheng, Kawlpi, Tamu, Tonzang… etc lak ah … Tedimte
- Chin state huam sung ah Tedimte (Tonzang incl. & Kawlpi, Tamu kamphen kullo teng)
- Kawlgam bup ah… Chin/Zomi
- Leitung mundang/gamdang ah Myanmar (Burma/Burmese) hilai
- Western or continent dang tung lehang Asian (Asia minamte)
Tua aih leh nang, Zomi nahihna a khiam tuanlo ahih hang mite’ ong theihna ah kuate/kua(bang) minam nahiam cih na omna mun in ong sai zaw suak hi.
Kei’ lampang pan ka it ding leh kakhual, kahuai, ka aituam neih a ka masak den ding bel Zomite… (midangte’n nang kua nahiam ongcih tawh kisai lo). Aban ah amun, ahun leh kei’ dinmun zui a zaitoto ding… ahi hi.
Ka tate bel amau le amau Zomi bek in kithei uh. Adang a tuamtuam hilh beh bualbual tuan se keng.
Kua kahia? Kuate kahia? Kua minam kahia?.. Nang e? (dawnna kisam lo dotna hi). Pau Khat Suan
Comment piaknop aomleh...