Kimawhsak ding hilo ~ Hau Za Cin

Kimawhsak ding hilo ~ Hau Za Cin

“Hihkhialh pen mihing ngeina hi a, khialhna khatpeuh midang ngawh pen mihing ngeina hizaw kan hi,” ciin Bob Goddard in na gen ngei hi. Mihing ngeina ah khialhna khatpeuh a om ciang in midang mawhsak ding, midang khat ngawh ding a baih mahmah hi a, a haksa hetlo pianpih sisan sungah a kiphum ahi hi. Ahi zongin a mawhsak ma, midang a kawkma in a ngaihsun man lungsim pen a ciim a pilvang ngaihsutna ahi hi.

Khialhna a om ciangin midang kawkpah, kei mawhna hi kei, a khialhna uh tuabang hi ciin awtawng ah kiko pah pen a haksalo ahi hi. A khialte selpho leh minsiatsak ding lawppen in a nei bang kek in a manlang zong om theih hi. Nang khialhna a hihloh lam zong gingtak, ngaihtak in na gen thei mah hi. Ahi zongin tua bang aw ngaih, awging in a kikhial khatpeuh a bawlpha hiam? A khialte khialhna a bawlpha hiam? Bawlpha lo hi. Bawlpha cih thadah a khialhna hanga ngaihsutna tuamtuam kimawhsakna lungsimte puangsak hi. Koi mun peuh ah hibang a om ciang midang na mawhsak leh, na gen khiat pah leh, na kamlawk luat leh nang leh na kim na kiangate tawh na kizopna susia zaw hi.

Tua ahih manin khialhna a om ciang tukhawm in kikum in banghanga hih bang thu piang hiam, banghang a khialhna piang hiam, bangzah siatna hong tung thei hiam, bangci bawlpha kik ding ihi hiam, bangci leng mailam ah hih bang piangkik nawnlo ding hiam cihte tangtak, siangtak in kikup ding hizaw hi. A mi i gen sangin a khialhna gen leng thupha manawhzaw hi.

Tuhun tawh kituak dingin gentehna khat gen leng. Gentehna in na computer hong sia hi. Na laigelhsa khempeuh mangthang hi. Na maan kep khempeuh mang hi. Na laikhak khempeuh zong kisim thei nawnlo hi. Tua hun tak ciang na computer na mawhsak ding baih mahmah hi. Na nasepna ah na thugen ding na bawlsa khempeuh mangthang lailai hi. Na bawlkik na dingin hun om nawnlo a, na thugen ding kicing kei leh na boss pan in na lu tungah meikhul ding hita hi. Bangcih ding? Na computer siat thu a thei peuhmah in hong hehpih in, hong hehnem uh hi. Ahi zongin hehpih leh hehnep tawh a sia kibawlpha theilo hi.

Hih thu khempeuh a pianma in nang mahmah in computer pen a sia thei hi cih na telsa hi a, na lai bawl khempeuh a back up na bawl ding kisam hi cih na theihsa hi. Tua back up (a siat khak leh a kizang thei ding na vante mun dangah kepna) bawllo na hih pen na hih khialh hi cih na tel ding hi. Nidang in zong bangmah ci ngeilo hi na ci kha ding hi. Ahi zongin a piang thei thu ahih manin na kikepkholhloh pen khialhna hi. Na khialh ciangin na computer mawhsiat in hehgawp cih bang hileh hoihlo hi.

Tua sangin mailam ah hibang a om kik nawnloh nadingin back up ka koih kisam hi ciin ngaihsun siam lecin tua khialhna khempeuh a phatuamsak ahi hi. Kua mahin nong huh loh uh, kuamah in hibang ding hong gen kei uteh ciin na seppihte, na innkuanpihte mawhsak, na lawmte mawhsak lecin na khialhna bawpha tuanlo in siahuai sak zaw hi. Tua manin a siatna hang thei ding, a siat theihna te pan bangci kikep ding cih ngaihsun zaw ding. A sia khin pen it huai, pammaih mah hi, ahi zongin tui buasa kiluak kik theilo bangin a siasa bawlphat theihloh tungah hehna thangpaihna lah ding hilo a, mailam adingin pilvang huai thute phawkna in neih ding ahi hi.

“Siatna khat peuh, khialhna khat peuh a pian ciangin a nuihmai thei lailaite in a mawhsak theih ding khat nei gige uh hi,” ciin Robert Bloch in na gen ngei hi. Bang acihna hiam? Siatna khialhna khat peuh a pian ciangin a ngaihsutna a kicingzaw khat in a khial, a siasakte tungah kimuanna leh patauh lohna dingin lungsim guan thei uh hi.

A khial khat khialsak phot ding hi. A khialhna pan a kisin ding thute ahih leh pulak kik ding hi. A khialhna pan a theih thute in a mailam ah khialsak nawnlo dingin makaih thei hi, makaih ding hi. Ahi zongin khialh den cih bang kisangtheilo ding hi. Makai khat hi in, ulian khat na hih leh mite khialhna ah mawhsak pah lo in khialhsak phot, siasak phot ding phal ding hi. Tua a khialhna pan a khialhloh nading lampi na lak ding makai, boss na hihna hi.

Mite khialhna gen khiat, pulak, tangko a siatna omlo a, ahi zongin a khialpa, a khialnu mawhsak nopna hilo zaw in a khialhzia lahnopna leh a khialh kik nawnloh nadingin lamlahna hileh hoih hi. Khialhna a om ciang a mi i kikawk leh thuhoih ding kimlai thusia kibehlap hi. A mi genlo in a thu gen leng kikep dan ding, bawlphat dan ding, puahphat dan ding leh mailam kalsuan dan ding te mit tawh muhtheih in i mai ah hong kilak deudeu hi.

Khatveivei mawhsak loh theihloh hun om hi. Mawhsak loh theihloh hun ciangin zong na mawhsakna pen a mi minsiatsaknopna (character assassination) hilo in a khialhna leh a khialhdan, a sepzia pan a mawhdan pulakna hi ding a, tua bang nasepna a tawpsan nading, a kibawlphat, a kipuahphat nading ngimna tawh deihsakna thute hiding hi. Mimal kicihna leh kikona te hilo in a sepzia pan a sia ding limlim a sem, a khial ding limlim leh amah hiam midang kua hiam bek phattuamna dingin a sem ahihna cihte pholakna ahih ding thupi hi. Tua pholakna in mailam ah a gamtat, a sepzia a bawlpha ding deihsakna ahih ding thupi hi.

Khialhna, mawhna a kigen limlim ciang tua bang khialhna leh mawhna bekbek a kigen den ding deihna a hihloh ding thupi hi. Khialhna a om limlim leh thuthak bang om thei cih ngaihsutna a pian pahpah ding ahi hi. A khialhna ah ngaihsutna leh thu tampi beisak ding hilo hi. Tua mun pan bang thuhoih kimu thei, sepzia thak bangte kingah cih ngaihsut pah ding ahi hi. Pukna pen dinkikna ding hi a, khialhna pen khialh nawnlohna dinga pilvangna ding hi.

Hih bang thu i gen ciangin siatna khialhna mawhna khat peuhpeuh in hong zawhlohna ding deihna ahi hi. Tua ahih manin siatna, khialhna hauzacinkhat peuh a pian ciangin, “Kei khiallo. Amah khial” ciin mite kawk pah kei in. Mite mawhna ciamteh in pulak in pholak pah kei in. Na aw gingsak lua dah phot in. Banghang hiam cih leh tua bang a awging, awngaih, kamtam leh mite mawhsak dinga kam manlang hi ci-a mite hong theih ding, hong ciamteh ding utlo ding hiteh. Tua bang a hoihlo pulak a manlang ci-a mite in hong etteh ding zong deihlo ding hiteh.

Tua ahih manin kimawhsak ding hilo a, a thu in genkhop ciauciau ding hizaw hi. Mailam ah bangci pilvang ding, bangci kikep ding i hiam cih kikup ding hizaw hi. Hau Za Cin