Kilemlohna le Khantohna (Conflict and Development) ~ Pau Sian Lian

Kilemlohna le Khantohna (Conflict and Development) ~ Pau Sian Lian

Rwanda, Uganda, Ghana, Mozambique, Argentina, Chile, Northern Ireland, South Korea le Singapore. Hih gamte’n bang kibatna nei-uh hiam? A sawt lua nailo-hun lai-in, hih gamte in gamsung buaina, tualgal, kilemlohna, ki galbawlna, gam vai-in gamlum gawpnate hangin lamet omlohna gamte ahihkeh a kitambaih (fragile) gamte uh a hihi. A nungkik, a nungleh ding gamte-in kiciamteh hi. Tun a hihleh, tua gamte vekpi phial-in kilemlohnate nawkkhia zo-in, “a dai hithiat mahmah gamte” cih dinmun tungto zo uhhi.

Ni dangin Malaysiate’ khut nuai-ah khua mengno kha a hi Singapore-in gamkhangto pen khat hong suakta hi. South Korea gam zong setvan bawlna lamah ngalkuahang mah abang hi ta-in, Norththern Ireland zong bomb puakkhap ding patauh sang, sumlepai bawlna tawh buaizaw uhhi. Mi tampi-in Uganda gam siatna pan kilam kikna dingin khang tampi mah sawt dinghi, Rwanda gamzong minam khatlekhat kithahna pan kum tampi mah hun la-in kipuah kik kul ding cih a ngaihsut uh hangin tua gamte a manlang takin ki lamto mengmengin khantoh suak nading a hanciam kik hi zaw ta uh hi.

Hih gamte’n bang a cihuh leh hong khangto kik-in, a dang kilemlo gamte’n bang hihkhial uh hiam? cih pen a lunglut huai mahmah thu hong suak hi.

Hih dotna tawh kisai a kan dingin World Bankte’n July kha 2009 kum-in mipil honkhat Africa, Europe, Latin America, Asia nisuahna saklam a om gamte, Pacific gamte, Afaghanistan gam le Nepal gamte ah kumnih sung bang khahkhia in kilemlohna, patauh venna le khantohna thu va kansak uhhi. A muhna uh thu kicing takin a thei nuamte’n World Bankte’ hawm World Development Report (2011) ah kisim theih hi.

Tua laibu sungah World Bankte’ thupit sak diakin, “Mipite patauh venna (security) nei sakin, thuman lohnate (injustice) puahpha-in, nasep (jobs) te zonsak theih na dingin hanciam huai masa pen hi. Ki-uksiamna le ki-ukna innpite tak suah sak-in (institution legitimate)a khauhpai ding kul dinghi. Hih mipite’ kisap nate kinbawl kha kei le hang gamsung buaina, kilemlohnate om tawntung dinghi”, cihhi.

Tua bek thamlo, gamsung ah ngongtatna (violence) om loh na dingin a thupi pen mahmah khatin, mipite’n thu manlohna (injustice), diklohna (unfairness) le nawlkhin pampaihna (exclusion) cihte tawh kisai muhna (perception) a neihloh nading uh thupi hi. “…..kei hong
ki nelhsiah, nawlkhin, pampaih, simmawh pha diak.” cih bang ngaihsutnate mipite’ sungah omloh ding thupi dinghi. Thumanna (justice) le dikna (fairness) ngah na dingin “thu khensatna’ panmun” (rule of law) hong thupi dinghi.

Tua ahih manin, gamkhat kilemna a om theih an dingin, “all inclusive” cih mikhem peuh kihel theih sak ding hong thupi hi. Kawlgam zawnna a hang zong kilemlohna pan hi a, gam vai nasepna ah “kihelkimna” ih kisam hi. Tua ahih manin, U Thein Sein le Daw Aung San Suu Kyi in zong, kibatlohna te nawlkhin-in, kibatnate tungah dingin (common ground) na semkhawm ni, cih thukimna hong nei uhhi. Gamvai a kiman mite zong kikhah khia toto ta hi.

Aung San Suu Kyi-in zong a thugenna-ah U Thein Sein um ing, kawlgam ah democracy a hat na dingin galkapte’ lawptakin kihelna thupi hi, mah ci tangtang hi.

Tu ta dihin thukin huai mahmah khat-in galkapte le gam minam neu tuamtuamte kilem ding hita hi. “all inclusive” cihmah bangin galkapte, kumpite leh partyte (NLD phadiak a kipan) a ki thutuah ngeingai phial uhhang, gam sung a om minam (ethnic) tuamtuamte hong thusim kei uhleh cik mahin ih gam ah kilemna om ngeilo-in, ih gam khangto ngeilo ding hi. Kawlgam a dingin Rakhine le Kachin vaite ah thuman takle pilvang takin hong van dinguh thukin a hihi.

2012 kum ai Gam Kisiatheite Kigualhna (Failed States Index) ah Kawlgam pen a tunglam nambat (21) na-ah kiom teutau lai-in etcik laiding (critical) cihtawh kiciamteh hi.

September Kha 21, nipen Leitung bup Kilemna Ni (World Peace Day) hi-in, ih gam sungah kilemna taktak tu dong ih nei naikei hi. Ih gam sungah kilemna taktak kumpite’n a deihleh, Kawl mite le minam dang tuamtuamte’ kikal ah “injustice, unfairness, exclusion” cihte a neihloh dinguh thupi hi. Hihte a om keileh, kitot kidona om denin gamdang sumbawlte’n hong nehngam lo dinguh a, gamsung sumbawlte’n lah noptak gamta thei lo dinghi. Gammi tampitak galtai-in tuatawh ki nitum den dinghi.

Thant Myint-U (UNO a secreatary semngei U Thant’ tupa) gelh “The River of Lost Footsteps” (kawllai-in kilet khin) laibu sungah,

“Kawlgam’ tualgal pen leitung bupah a sawtpen ki dona hi-in, Kawlgamah suahtakna a kingah khit a kipan tu dongmah dan tuamtuamin ki dona omom lai hi. Kawlgam pen tudong mah Galpi II na a om laina gam kici theihi . . . . tualgal hangin mi awn khat bang sikhin dinghi. Mi awn tampi galtai uhin, sumbawlnate kiam mahmah a ….” ci-in na gelhhi.

Kilemna (peace) omlohna ah khantohna (development) om theilo hi. Kilemna ngahtheih nading lampi tuamtuam om a, Kawlgam kilemna ding kikup huai honpi khat mah omhi. Hih thului-ah tuate sang, ih kilemlohna hangin a kisumte, a ki beilawh, zawnlawhnate ih kikum dinghi.

Kidona, kilemlohna om leh gamsung sumpiangteng thauvui thautang leina in kizangin gam zawng semsem hi. Gentehna-in, M16 thau khat-in $586 man hi. Dollar 586 tawh a nuai-ate kilei theihi.

• Kialtun na-ah an neek 1, 503 kivak zohi.
• Tuikhuk siangtho 1 ki nei zohi.
• Khangham khua munawnlo mi 18te khuamuh kik nading kibawlsak thei hi.
• Galtai mi 167te zattheih puanzapi (blanket) ki leisak zo hi.

Galtaite’n puanza puaman tangtang lo uhhi.

• Thopuan 63 kilei zo dinghi. Kumsim mi awn 2 (2 million) ngetphia natna (malaria) tawh si ziahziah denhi. A tamzaw pen kum 5 nuai naupangte hi.
• Naupang 18te natna pan ki kemcingthei hi. Naupang khat a sisak ziau thei natna gil 6 (diphtheria, whooping cough, measles, polio, tetanus, tuberculosis) pan kikem zo dinghi.
• A gah nektheih singkung kung 63 ki suanzo dinghi. Singah in pumpi cidam sakin a zawngte’ ading an himawk hi.
• Ngasa siahna ngen (net) 52 kilei zo dinghi. Naupangno khat, nupi khat hih ngen pia lecin, a innkuan bup nek ding an zong zo uhhi.
• Ak 21 kilei zo hi. Aktui pan protein kingah a zatui hipah hi.
• Ak thumte’ tuite gawm lehang innkuan khat vakzo hi. Akno zong kingah lai dinghi.
• Cidamna tawh kisai nasemte’ a ding tentan (training) 52 vei kibawl zo hi. Hih tentante’n cidam na ding kikep kikhoina ciang hih thei-in Siavuan omlohnate bangah kizang thei mahmah hi.
• Sang naupang 15 te sang sabuai le sangvan kisamte ki leisak zo hi. Sabuai khatta, laibu, khedan le ball pente kileisak zohi.
• Naupang no lamsiau theilote’ ading peinei leng (wheelchair) 2 kilei zo hi. Wheelchair tawh suakta takin sangkah thei uhhi.
• Tui sitna (water filter) 52 kilei zo hi. Tui sitna neihloh manin, natna lungno tampi om tui mah nisim a dawndawn mi tampi om laihi.
• Setbing (bicycles) 9 kilei zo hi. Naupangte nisim sangkah thei pah dinghi.
• Tuinek siangtho ngah theih na dingin Chlorine tablets 58, 600 kilei zo dinghi.

Kilem kei le hang Pasian longal midang, gam dang a dah lua taktak om khollo hi. Gam tuamtuamte’n ih kilem lohna pan meetna a ngahna dingun hong encik simden uh a hihi. A tunga kigelh suplawhnate pen supna tam pi lakpan tawmkhatbek ahih lam ih theihkim teksa a hihi. Muhtheihloh supna-ah ki-itna, kimuan na, kithutuahna, lungnopnate kisum hi. A sih lawhte, a khate-uh pammaih danbel gen theihloh hi.

Tua ahih manin, “Topa aw, ka gam uh hong cidam sakin” (Lord heal our land) ci-in, Pasian tokhom mai-ah ih thumthum ding a hihi. Pau Sian Lian