Kidawm inla Ngaak in

Kidawm inla Ngaak in

Zomi Laaizomte,
Zogam kiteelna akizo hita-a, mipi’ meé-tawh Zogam-ah I’ minam party-in tutphah tampen hong ngahthei-hi. Mipi’ tung-ah I’ minam party upate’ lungdam kohna nangawn akizaak ma-in abangmahlo mi maaivil meipeek velvel pawlkhatte’ kampauna-in minam luankhop theih nading lampi-ah ling leh so phahphah khin liang uhhi. Mimal-a bangmahlo pipi a-ulianpi bangkhat-a, “kahong muak-hi, kahong lumdam pihhi, …..” cih nengneng-tawh matla meetla khenkhatbang kimu-a tualniamna paizia-in minam vukcip laai-hi.

Kidawm In (Be Cautious!)

Zomi party-in kiteelna meé-tang tungtawn-in azota ahihi. Kawlgam buppi kiukna thuneihna NLD’ khut-ah abuppi-in aki-ap mateng bangbang party-in zo-in lel taleh gamtaang thei kiuhkeuh lo-hi. Tua ahihman-in mi nih leh thum’ gimneihna leh muhdahna thalawh leltak-in min zongkhial kei un, kisiik lozaw thamding hihang.

NLD’ khut-ah thuneihna kipiakhia ci-ni. Tu-a Zomi party aneituam bang-a party dang-ah apang mite a-eengcihcih mite-in mimal-in phattuamna ngah kiuhkeuh loding, party upate inzong mimal phattuamna bawlsak loding uhhi. Tua ahihleh mi nih leh thum’ muhdah leh gimneihna thalawh leltak ding-in mawk ciakciak keizaw lehang kisiik lozawding hihang.

NLD’ khut-ah thuneihna akipiakkhiat takpilehzong tu-a mimal kidawk nuam-a ZCD pumgup bang-a aciakciakte-in mimal hamphatna ngahlo ding-a, ZCD upate’nzong tuabang mimal hamphatna pialo dinghi. Apiakleh minam huam-a mapang hilo, Constituency huam-a mapang hilo, township huam-a mapang hilo pahding ahihman-in mipi-tawh sawtpi tonkhawm loding muhsa hipah-hi.

Maantak-a thuneihna kipiakkhiatna a-om takpi lehzong mipi’ lungdeih thusung ding leh mapang ding-a akiteel party upa makaaite-in amau mimal ki-elna, kimaainopmawhna, taanglaai-a akitotpih akiseelpih cihte-a kipan mimal-tawh kisai vaai nengnengte tua mapanna-ah hongken peuhmahleh minam-tawh sawtpi tonkhawm lodinghi. Political Party cihciang-in amau’ meékuang luuina mun buppi huam-a mapang ding-a kiciamna ahihi. Meipeek velvelte’ lamet bang-in thu piang ngeilo ding-a, apianleh minam kisia hidinghi.

Ngaak Un (Wait!)

Tua ahihman-in, “thuneihna kipiakkhiat hun” ngaak un. Minam minpua kipawlna dangte, khua dangte, pawlpi dangte-peuh biibii naaikei phot un. Kawlgam thu avomding akaangding kitelcian naai tuanlo-a, khimkhua ziinding leh taikhua vaalding kigensiang thei naailo ahihman-in ngaak hiit-hiat lelzaw un. Taikhua hong vaalleh ziingvaai kihawm ding-a, khimkhua hong ziinleh laaikhun kizuan dinghi.
Taangthu tomno: Zotui kipawlna-in minam ngeina cialpite bawl tawntung-a, tua-ah puteek Pa Maang kihel den-hi. Kum 10 khit takciang-in Zotui makaihna-tawh ngeina cialpi akibawl ngei bang-in hongbawl-a, Pa Maang-zong akihel ngei bang-in hongpai khiamkhiam-pen Zotui kipawlna-a upa aseem thak khat (nidang-a tua cialpite-ah akihel ngeilo khat Phucil cipak ni)-in, “Nang hongpai thei, lungdam mahmah-ei,…. nuam nasa-hia,… hihbang bawlkiik lehang nong’ siim laaidia,…….” cih-a kipan akuul hetlo leh akilawm hetlo dotna-tawh muak-hi.

Pa Maang ding-in kibulh lecin, nangbangci vei (feel) dinghiam? Ataktak-in, Phucil-in tanu nasep aseem-bek hi-a, Pa Maang innteek mahmah zawtham-in asungthu-zong telcian zawtham-hi. Pupate-in, “Mualkhawl masa-zong kizahtaak” ci-a athuciin uh-tawh kilehbulh-hi. Kilehbulh ahihteh asia hipah-hi. Sia ahihlam I-theihleh pelhding ahihi.

Phucil hilecin tuabang innteek zahtaakbaang khat na-koici muak dinghiam? Kei hileng, “Dammaw Pa Maang, cinglo taaklo pipi-in nana buai phangphang ung-ei, kisapna a-omleh hong kawkmuh ziauziau unmaw,.. mapan akisin tawmtawm hihang-in nomau’ lamlahna lo-in masawn zokei ni-ei.” kaci zawding-hi. Ahizong-in mihing kibang lo-a, Pupate-in, “Vokkhial gaai-in ateek suan” ci-in thuciin nana-nei uhhi.

Bangmah hinaai kei-hang!
“Pianna Zotuunnu zuang hongthawh ni ciang’n lungdeih nihthum liibang cingmahleh,
Ngalliam von lungdeih tuailaai nihthumte tua ni ciang’n liibang I-cing diam-aw! (Lamka, Ellim Veeng, Bambino Cottage-ah 1999 kum-a ka’ laphuak: Lasiampi Pu Lengtong Pauno-in hihla draft-in Aizawl-ah Hollow Guitar-tawh akhum khit khat-hi) I-ci theih beekding lungsim saankhaan ciatding deihna-tawh,

Zomi Pasian’ Thupha!

Zokhai