Bukna hoih ~ Tdkhen

Bukna hoih ~ Tdkhen

1. Et et ding na ut keileh mite’ lakah om zaw in; a om tuamte ki en en hi. = Mite’ lak-a om’na in mi batna ahi hi.

2. Na lung a kham’leh mite’ lakah om in; a malin om leng lungzuan sang sawnsawn hi. = Holimna ah lungkhamna in mun ngah lo hi.

3. Thupha na ngah nopleh mihon lakah om in; a mal-a omte keu baih hi. = A hon omna munah an kitah hi.

4. Makai na suah nopleh mihon lakah om in; a mal-a om’na ah mimal lungsim bek a om hi. = Makaite in mipi lak nuam a sa mi ahi ding hi.

5. Na mailam na khualnopleh tangtat kei in; a maldinte in kinanpih ding nei lo hi. = Mipi lakah lawmhoih a om hi.

6. Na guallelhleh kihepbawl’ kei in; a kidaaithah mi kinopneh hi. = Mipi lakah lungmuanna om hi.

7. Na khasiatleh a kawcik lam a zuanzuan na hi hi. Na cillum tawh valh taitai in; galte dongin a takhop thei huang zaipi na nei ding hi. = Khasiatnate um’cipna in nin honpi muat sak a, a tungah singno suanna tawh kibang hi.

8. Na heh a suahleh sehtaak lam a zuanzuan na hi hi. Thuak keikai lecin a lipi in hong huup kik lel ding hi. = Mite’ hong hehsakna kitheihmawhbawlna in minthanna leh pahtawina hong pia hi.

9. Na ngah nading mun khatah hamsia kisa-in na lungngaingai hiam; thu hoihlo hon in mun hong la kha ding hi. Tuate nialin nang na kimangngilhbawl’leh na ngah sunte khaici hong suak ding hi.
= Hamsia kituhna munah hamphatna a om hi.

10. Na lung a kim thei kei hiam; tua in nang hong nene ding hi. Lungkim nading zong in; tua in nang hong vaak kik ding hi. = Eimah kipi’ngaihsutloh lelna ah lungkimna a om hi.

11. Na minsiatleh kidaaithah kei in; a tuam-omte kilang tektek hi. = Mipi bek in hong liah zo ding hi.

12. Na minthan nopleh tuam-om’ kei in; mimal-a om a minthang om ngei lo hi. = Mipi lakah mithanna om hi.

13. Na buk nopleh taikhia kei in; a taikhiate kilang semsem hi. = Mipi lak mah bukna hoih pen hi.

14. Na khialhleh a khiallo bangin om lel in; tatdan namkhatin ngaihsun in. = Mipite in a hiding mah sa ding hi.

15. Langpanna na thuakleh langbawl’ kei zaw in; pawlbawlna in bukna hoih khat ahi hi. = Galte itna zong ahi hi.

16. Minphatna na ngahleh ki-angtang sak lua lei in; ki-angtansakna in mimal lungsim ahi hi. = Mipi lak bekah pahtawina a om hi.

17. Nau leh ta na hauhleh na kha a muang ding hi; ahi zongin mipi behlap bek na hi hi. = Mipi behlapna in Pasian’ nasepna ahi hi.

18. Nau leh ta na neih keileh nathupi na sem thei ding hi; tagah tampite’ nu leh pa na hithei hi. = Pasian tawh ma na pang khawm ding hi.

19. Thu umlo na lawm sangin na zawn zawkleh thanem kei in; a ma’ hamphatna tua teng bek mah hiding hi. = Eite in Van Thak leh Lei Thak i ngak hi.

20. Lametbei pi-in na om ngei hiam; na lamet a bat keileh na tha a neemneem ding hi; na tha neemleh a omsa na thahatnate a kiamkiam ding hi; na tha kiamkiamleh na lungsim a neu tektek ding hi; na lungsim neu tektekleh lametbei-in na om ding hi; lametbeina in khuamial sungah hong hawlhawl ding hi; khuamial sung lutna in manthanna gam ahi hi; manthanna gamah ei leh ei hong kisuun lum sak nuam hi; hong kisuun lum sak bang pen hiam; lamet tak’lopite i lamet khak hang ahi hi; lamet kikna a om thei ding hiam; lamet dingpa lametna ah lamet kikna om thei hi; tua in kua ahi hiam; eite’ deih khempeuh a piangsakpa ahi hi; tua mah ee kua; Hongit hong deihsak ngiat Pasian ahi hi!!!

(Ih lungsim a batloh ciang peuh, i khasiat ciang peuh, i minsiat ciang peuh, i manawh ding i maingaploh ciang peuh, hun haksa tuamtuamte hangin i lung a kiat ciangin i nuntakna tawh tuate kitehkak kha pahpah thei hi. I nuntakna a khekkhia zo ding vai haksa leh na lian khat beekbeek, nuai simlei leh tung thangvanah om mahmah lo hi. Kisikna teng panin a lian pen, a kibawl kik thei nawnlo khutkhialhna tawh, a hehpihhuai i nuntakna, lunglel kawlkil ah i sawnkhia thei mawkmawk hi).

• Inn leh lo ka neihloh hangin leitungin a teh zawhloh a manpha penpen ka zi ka tate tawh ka innsapna sungah hau ka kisa mahmah hi!
• Ta ka neihloh hangin leitung khempeuh sangin a manpha zaw zi ka nei hi!
•  Kei bek ka hih hangin innkuan khat a ompihpa mah in kei zong hong ompih hi!
• Damlo, kumzawnin laikhun tungah silhpuan bangin ka kisia zongin, hongit ka Pa’ mel ka en thei a, ka hopih thei hi!
• Khut leh khe nei lo-in, bilngong mittaw ka hi zongin, a bawl’sa leitungah kei ka zalzal thei lai hi!
• Mite in hih leitung tawh kilawm hong sa nawn kei zongin, ka Pa taktak in kilawm hong sa lai tadih hi.
• Leitungah ka lamet ding khat beek om kei ka cih laitakin, hong piangsakpa in lametna hong neihsak lai hi-in ka um hi!

“Ka lametna ama’ tung pan ahih manin dai takin Pasian bek ka ngak hi.” (Late 62:5) Tdkhen