Khutdawhngen nam tuamtuam

Khutdawhngen nam tuamtuam

Lamgei ah hai khat tawh tu a hehpihna a ngen khutdawhngen om a, pai kawikawi a hehpihna a ngen khutdawhngen zong om in, a hihtheih siamna khatpeuh hih, lakkawm a khutdawhngen zong om hi.

Tua bek hilo in,…
Robber tuak leteh, na neihsa teng ong thatang nget ding a, napiak kei leh ong vau in lausakna tawh ong laksak ding hi. A taktak in khutdawhngen namkhat mah hi veve hi.

Leitung thu vantung thu ah, lauphawn a vauna leh khemna tawh a ki thatang piaksak, pia kei leh akhial suahgawp a, a piaklohman a thusia tuakding peuh a lauphawnna tawh a thatang nget vakkawn dangnal pawlkhat zong om a, tuate zong khutdawhngen mah ahi hi.

A it huai, a hehpih huai, neihbang langhawm phial zah a a piak thanop huai khutdawh ngen a om bang in, a huat huai khutdawhngen leh a zumhuai khutdawhngen zong honkhat mah om veve hi.

Khutdawhngen khempeuh ngetdan kibang lo hi.

Khuak

Khuak pen exercise tampi bawl in, kinak zat mahmah leh khang in gol a, gaap in thakhauh semsem hi.

Exercise bawl ngeilo, a thasaan ngeilo, a omcip khuak pen damdam in thazawm semsem a, kiam in ciip tektek, neu leklok hi.

Thatang san a kidemna ah thathak hat bek a, siam tuanlo hi. Khuak zatna ah khuak thak thahat lo a, zong siam hetlo hi.

A kizang ngeilo khuak leh siamna thazaw in kekseu a, a kizang den khuak leh siamna gaap in thahat a, a kitattat tem bang in hiam mahmah hi.

Khuak leh siamna pen zatzat ding ahi hi. Na khuak hehpih kha kei in!

Ma panna leh Ma tutna

Nasep ma panna khatpeuhpeuh semthei a kisa lua, siam a kisa lua, tam semngei khin a kisa lua, tam sem a kisa lua… cihte tawh ma pankhop sang…

Tampitak semngei a, tun zong tampi sem in, sepsiam mahmah napi ma panpih midangte’ pilna, siamna leh hanciamna thusim sak a, mimal siamna sang pankhopna a thupi ngaihsutte tawh ma pankhop mah nuam zaw in, ma zong kitun zaw thamtham hi.

Nasep makai ding bel sepsiamna leh tampi sepngeina ban ah a seppih midangte’ pilna, siamna leh pankhopna a thupi ngaihsutte mah ong picing pen uh hi.

Siamna ah siam tawpna om ngeilo a, pilna ah zong pil tawpna om ngeilo hi.. cih phawk zelzel huai. Pau Khat Suan