Malaysia ah nupi khatin kum 2 aphapan atapa agawl atsak in si

Malaysia ah nupi khatin kum 2 aphapan atapa agawl atsak in si

Malaysia, Pahang State sung aom Maran Town sungah nupi khatin kum 2 bekbek aphapan atapa agawl atsak cih NST pan kiza hi. Hih thupiang pen zanni Sunday zanlam in Maran Town, Felda Jengka aom amau innsung tektek ah thupiang ahihi.

Sunday nitaklam 8:40pm hunpawl in lupna inndei Bedroom sungah anu in naungek ii agawl pen ahiam mahmah khattawh atliamsak hi. Tualaitak apasal in mukhalian a, azi pen thakhatthu in sawnkhia in, atangek tawipah saisai hi.

Tuakhit ciangin amanlang in Bandar Jengka Hospital ah taipihpah vingveng hi. Ahi zongin Hospital ah atunzawh asawtlo in tua naungek pen sisuakpah hi.

Hihte nupa in ta akigawm in 3 anei uh hi a, agawl atliam athuak naungek pen aneu penpen ahihi. Apa in Hospital ah amanlang in taipihpah a, ahi zongin Police Report abawlmadeuh nitaklam 9:45pm hunpawl in tua naungek pen sita hi ci’n Medical Officer te’n genkhia uhhi.

Hihvai tawh kisai in State Criminal Investigation Department chief Senior Assistant Commissioner Othman Nanyan in agenkhiatna ah atapa athatlum anu pen kum 31 aphakhinkhat hi a, hihvai hangin kimankhinta hi ci’n genkhia hi.

CID thukante’n tuciangciang amuhkhiatna ah atapa athatlum anupen tuabangin agamtat laitak in alungsim manlo, amuhna manlo, Hallucination hiding hi ci’n genkhia uhhi.

More: Malaysia College sangnaupang numeikhat ata that ahih main thu kibawl

Ahi zongin abeisa in tua nupi pen bangmah lungsim manlo, Mental illness cihtetawh zatui akibawlna Record bangmah omlo cihi. Police te’n apasal tungtawn inzong Statement Record bawllaiding uh cihi.

Hihvai tawh kisai in atapa athatlum nupinu pen “Section 302 of the Penal Code for murder” thukhun ombangin thu kibawlding, athu kikankhiading cih kiza hi. Sawltak #zomidaily