Khitui kisam lo hi ~ Peter Suumpi

Khitui kisam lo hi ~ Peter Suumpi

“Kidemna te ah khhitui kisam lo hi.” Zatui pilna lam te in thuciin khat nei uh hi. Kum khat sung khat vei zong acina ngei vetlo mi khat pen acina pahpah mi khat sang in azah 6 in cancer ngah baih zaw hi ci hi. Hih pen lamdang ihcih hang in aman ahi hi.

Biology lam mipil te ii genna ah tuikhuk sung ah ngasa khat bek khia leng nitawm sung bek nungta in ngasa nih le thum khia khawm leng kum khat bang nungta hi ci in gen uh hi. Tua pen ‘kidemna sung’ ah amau ‘nuntak nading tha’ ngah lawh zaw uh hi.

Tuikep te in amau sung aa kihencip sehnel te ahoih mahmah suangngo (pale) asuahsak bang ahi hi.

Nuntakna sung ah zong zawngkhalna, haksatna, kidemna te thahatna in ih khel ding ahi hi. Haksatna ih tuah ciang kahlel tawh hong lempah lo ding hi. Adiakdiak in kidemna khat peuh ah guallelhna ih tuak ciangin lungneu lua in ei le ei ih thanen loh ding kisam hi. Kidemna te ah kitui kisam lo hi.

Gualzawhna ihcih pen guallelhna tampi akigawm ahihlam ih theih ding kisam hi. Agualzo khat in huihsia guahsia athuak zawh kul hi. Zawngkhalna te aphut zawh kul hi. Kidemna ah khuitui cih pen atha nem zaw mite aading bek ahi hi.

Germamy physics lam mipil Wilhelm Conrad Roentgen pen aneu lai in laipil khat ahi hi. Ahizong in akheltat naupang khat zong ahi hi. Khat vei asangsia khat va ciamnuih bawl kha ahihman sangpan kihawl khia hi. Tan 10 gualzawhna letmat neilo ahihman in university khah theilo hi. Ahizong in ama hanciamna tawh atawpna ah mark sangpi tawh Zurich collage hong kah thei hi.

Sang azawh ciangin ama ii tangthu hangin tua sang ah assistant lecturer asep ding kinial hi. Hatsatna, zawnna te tam veipi atuak hangin Roentgen pen khitui tak khat zong tak ngeilo hi. Lungkia ngeilo hi. Atawntung in mainawt hi. Kum 20 sung ahanciam na ii agah pen Julius Maximilians university ah sang uk siapi hong ngah hi. Tua ban ah X-ray hong mukhia in Physics mipil sung pan Nobel prize ngah masa pen hong suak hi.

Roentgen in haksatna tampi sung pan kisingkhia in agualzo mi khat hong suak ahi hi. Mi khat peuh in haksatna te athuak zawh nading in lungsim thatang kisam hi. Nuntakna sung ah haksatna kua mah in kipelh theilo hi. Kidemna ah guallelhna aom ngeina ahi hi. Athupi in guallelhna ih tuak laitak in lungkiatna in neilo in mainawt nading thalakna in ih neih zawh bek teh gualzawhna te ih mu zo pan ding hi. Peter Suumpi Source: www.jfffff.com