Khitui Gospel Movie nungak khat ~ Sia Do Khup

Khitui Gospel Movie nungak khat ~ Sia Do Khup

I minam sungah dongtuahna lianpi hong om ciangin a munmun panin kipang khawm ciat hi. Sianmang’ Hawmtel movie sunga hong kihelte lak panin Suih & Friends Foundation ten zong Ks.1,400,000 hong pia khia giap uh hi.

Hih kipawlna pen Suih Lun makaih hi a, Suih Lun i cih pen lasa siam bek hiloin itna veina tawh a kidim nungak manpha mahmah khat ahi hi. USA leh Zomite sungah vai lian tampitak ama tungtawnin kivaihawm hi. “Tapa 10 sang manphazaw” a cih taktak pawl ahi hi.

Ama talent lasiamna tawh a ngah sumte tawh Zogam ah meigong tagah tampitak ahuh lam ka theihpih hi. Kiniamkhiat mahmahin mi hau mahmah ahih manin movie bawl lai-in “Bawi, papi a thau khat kisam, nungak tangval tua zah kisam” ci-in a hun nai mahmah ciangin ka sawl zel a, “Sia, kizasak khol leng nuam ding hiven” a cih kawmkawmin hong lemsak zo veve lel hi.

Zomi ten hih bang nungak kizen khat i neih zenzen manin i angtang mahmah hi. Topa Pasian in Suih & Friends Foundation thupha pia hen la, mi tampi noptuamna hisak tawntung ta hen.

TU SAWNG NASEPNA

KHUATA LAMAH COVID LAANSIA
Tuitawh khua ah Covid 19 laansia mahmah a 100 val deuh kisit lakah 50 positive mawk uh hi. Cina 100 ai ding zatui kipaisak pah hi.

Zanni in ka neu lawm Tuikhiang Hausapa Dal Khat in Tonzang zato pan hong nusia a, a luang kipua khuan omlo ahih manin Tuitum han ah kivui hi. “Zawl aw oxygen hong khak in maw nak hak lua” hong ci a 40L bung nih i khak hiven hong paisan teitei hi. Khuata lamah hong suksia kik pian ahih manin dah huai mahmah lai hi.

YANGON KHUAPI AH I NASEPNA

Antang vai pen inn 500 in hong siau a, i budget in cin lo ahih manin Pastorte tawh kikumin a hithei zawdeuh inn 100 lakhia kikin inn 400te tungah antang Pi 12 ip khat ta kipia hi. Khuapite inn tam lua ahih manin tua bang vive a kipia ahi hi.

CINA 1000 KIHUH ZO LAI DING

Covid 19 vei mihing tul khat kihuh zo lai ding hi. Tua ban bel a piakhia lamte nong hat lai uh leh kizom thei lai ding a, tua ahih kei leh bel i nasep khawl bawl phot ding hita ding hi. Sia Do Khup