US News Update: August 13, 2021
1. US GAM SUNG COVID-19 DIN MUN: Tulai tak Covid-19 Delta variant natna pen USA gam sungah hong khang sem sem aa, US gam sungah tu nipi sung natna ngah thak leh asi anuai aa bang in kimu thei hi. ~ August 12, 2021: Natna ngah thak – 145,350; Asi – 688 ~ August 13, 2021: Natna ngah thak – 95,039; Asi – 556 (Ki sim sim lai)
Abeisa ah I gen zel mah bangin natna ngah thak akibehlap atamzaw pen Covid-19 vaccine asun nailo te leh Dose khat vei bek asun pan te na hi uh hi. Tua ahih manin vaccine sun nailo te aman lang thei thei in sun tek ni.
2. NEW YORK GOVERNOR ANDREW CUOMO NASEP TAWP:
New York Gov. Andrew Cuomo pen abeisa hun te ah numei 11 te nawngkai sak in sexual harassment bawl hi ci in kimawh sak aa, nung nipi sung in New York Attorney General pa in hi thu te maan mah hi ci in apulak khiat zawh ciang Gov. Andrew Cuomo in nasep pan atawp ding khensat hi ci in AP News in genkhia hi. Ama mun ah Lt. Gov. Kathy Hochul in luah dingaa 57th New York Governor hong suak ding ahi hi. Abeisa Covid-19 pandemic sungin Gov. Cuomo pen New York state sungah Covid-19 natna nang zo lo leh mitam si sak lua hi ci aa, nakpi takin akimawh sak ahi hi.
3. ANIH VEINA CHILD TAX CREDIT KIHAWM KHIA:
$ 1.9 trillion Covid-19 Stimulus Relief Bill pan apia naupang te huhna ahi “Child Tax credit payment” pen tu ni August 13 ni in a 2 veina hong lut ta aa, 39 million innkuan (65 million naupangte) kiang kipia in, bank direct deposit leh Check tawh pia uh ahi hi. Tua hi aa, i bank sungah sum lut leh lut lo, cih i check tek ding ahi hi. Hih naupang te huhna sum pen July kha pan December kha sung US Kumpi in amawkna in hong pia ding uh ahi hi.
Hih child tax credit pen kum 5 pan anuai siah Ta khat in $3,600 leh kum 6 pan kum 17 kikal ta khat in tax credit $3,000 ta ngah ding uh ahi hi. Abeisa 2020 tax return ah tax credit pen kum 17 nuai siah Ta khat $2,000 ki ngah aa, tua pan $ 3000 ah hong khang sak uh ahi hi. Ahi zongin child tax credit 2021 ngah ding sungpan alang (half amount) pen kha sim in hong kikhak ding aa, July kha pan December kha sung i tax return sum hong kikhak bang lian in hong kikhak ding hi. Mai tax return bawl ciang alang (half amount) pen Tax return ah ki tuat sak thei (claim) ding ahi hi.
Hih huhna sum pen mipi te gentheih hun ahi Covid-19 pandemic sung i naupang te aading Kumpi ten hong piak giat uh ahih manin i sum ngah te khol siam in i innkuan, i ta te aading akilawm pen mun ah i zat theih ding leh i khol ciat theih ding thupi mahmah hi. Ngaih sut mahmah ding thu khat ah Kum bei tax return ciang nidang dan in sum lom tam ki ngah nawnlo kha ding ahih manin hih kha sim aa i ngah sum te zong i khol toh toh ding hong thupi mahmah ding ahi h.
4. 1.2 TRILLION INFRASTRUCTURE BILL SENATE AH KI PASS:
US senate in $ 1.2 Trillion apha infrastructure bill pen August 11 ni in vote tawh pass uh aa, hih bill sungah US gambup ii Lampi (roads), Lei (bridges), power grid, broadband, Tui (water) pipes puah kikna te kihel ahi hi. Hih infrastructure bill hang in Lampi te hoih tak kibawl kik bek thamlo in nasep (Job) million tampi kibeh lap ding hi ci uh aa, mipi aading thu hoih mahmah khat ahi hi. Ahi zongin Republican makai pawl khat in hih bill hangin Cryptocurrency bawl khat bei siang sak thei ding ahih manin Zomi sungah Shiba, BTT, Doge coin, Bit coin a nei te aading patauh huai khat ahi hi.
5. STATE 5 TENGAH ICU LUPNA KICING NAWNLO:
US gam ah Covid-19 khan na hangin State 5 te ahi Alabama, Texas, Georgia, Florida, Mississippi state te ah ICU lupna 10% bek awng lai ci in the US Department of Health and Human Services in taangko khia hi. Albama state ah ICU 95% dim khin aa, 5% bek awng lai ci hi. Adang state te ah zong 77% kim dim ta ci uh hi.
6. CDC IN COVID-19 VACCINE ATHUM VEI NA LUT DING NGAIHSUTNA PIA:
Covid-19 vaccine 2 vei kisun khin in natna lahuai na hangin akisam beh te athum vein a sut ding ngaihsutna kipia hi ci in US Centers for Disease Control and Prevention Director Dr. Rochelle Walensky tuni taangko khia hi. Tua lak ah aci dam den lo te (prolonged illness, Cancer nei te cih te kihel hi.
7. MISSISSIPPI STATE COVID-19 DINMUN:
Tulai tak US gam ah Covid-19 natna akhang mahmah state lak pan Mississippi state ah natna ngah thak ni khat 5000 kiim om den aa, 98% pen Covid-19 vaccine sun nai lo (unvaccinated) te hi ci in Mississippi, the state’s department of health in genkhia hi. Mississippi state sungah atam zaw in vaccine sun nailo, sun nuam lo uh hi ci hi.
8. US in Kawlgam huhna $50 million piakhia ding:
US Kumpi te in Tulai tak Covid-19 tawh abuai mahmah Kawlgam pen 50 million leh Thailand pen $ 5 million Covid-19 leh humanitarian assistance tawh kisai huhna kipia ding hi ci in US state department Spokesperson Ned Price in taangko khia hi.
Misok Galkap te ii ukna buluhna hangin gentheih hatsakna athuak mi 700,000 te kiang huhna kipuak zo dinghi ci aa, tua huna te koi cih puak ding, kua kiang puak ding cih te kitel nai lo hi. Ahih zongin Kawlgam mipi te aading lungdam huai thu khat ahi hi. Ref: AP, CNN, CDC, Worldometers, KTLA, US State Department ** Tuni tak nai 8:30pm kiim in US & Kawlgam News update LIVE kikhah khia ding ahih manin kimu tek ni… Thomas On Sian Mung (Thomas Mung Guite) Washington D.C August 13, 2021. MOMNO Media & Museum
Comment piaknop aomleh...