Khedap bulhlo in lampai pen cidam nadingin hoih

Khedap bulhlo in lampai pen cidam nadingin hoih

Khedap bulhlo in lampaina hangin lungkham sinkhamna (Stress) kiamsak cihi. Hihpen “Germany’s Federal Institute for Posture and Mobilisation Support” pan amakai pipa ahi Dieter Breithecker in agenkhiat hi a, ih khetul leh khepek tawh leilak aki sukkhakna hangin lunggimna leh lungsim zawngkhalna te damsaktuam aci ahihi. Ih Zogam khuaneu khuata te ah khedap bulhzolo ki tamlai mahmah a, khedap bulhloh ahoihna om ahihleh lungdamhuai cihding ahihi.

Khedap bulhloh hoih cihsam hangin ninbu lomlak, thawlkitam leh linglak cihte lakah khedap bulhlo in paipahding hilo hi. Tuabang lauhuaina tepan kidaltheih nadingmah in khedap akibawl masa hizaw hi. Ahi zongin tuhunciang adiakdiak numei te bulhding in khedap tawsang tulsang atuamtuam kibawl in kibulh a, khedap tawsanglua bulhzong hoihtuak hetlo hi. Adiakdiak in nupi naupaai te adingin khedap tulsang pen hoih hetlo hi.

Khedap bulhlo in paileng ahoihna munpen sehnellak leh suanghumnel lak cihkhawng hiphadiak a, tua munte ah khedap bulhlo in paileng phattuamna tampi hongpiathei nahi gige hi. Tua ahih manin sumnei mihau te tuipigei Beach khawngah tawlnga dingin zintheizel uh a, tuipinawl sehnel lakah khedap bulhlo in pai hiathiat thei uhhi.

A khangto gamte ah tuhun ciangin tuipigei pai akul tektek nawnloding in Apartment leh Condominium khawngah sehnel leh suanghum tawh lampai nading atuam in kibawlta hi.

More: Khedap taih tawh sum a zong mizawng pa in kua a hihiam?

Phalbi zingsangtung lopa leh kiaktung ah daitui akawt nilhnelh laitak khedap lotawh atungah paileng hoihphadiak ci’n Dieter Breithecker in genthuah hi. Khedap bulhlo in lampai hoih ahih mawkleh sumbei dinglah hisamlo ahihciang eizong khedap bulhlo in paimawkleng hoihlodia? ZD Sawltak #zomidaily 2011-11-21