Kawlgam Politic huihnun zia ~ Kap Lian

Kawlgam Politic huihnun zia ~ Kap Lian

USDP hun – 2010 kitel lai-in a dem omlo ahih manin USDP bekbek in gam uk uh hi. Nasep muh ding om lo, MP teng in a mau taptung leh inntual ciang khawng sem uh cileng kikhial lua lo ding hi.

NLD hun – 2015 ciang Mualtung mi khempeuh (Rakhine gam kihel lo) mi khempeuh in NLD buakhuanin Kumpi phut, hih pen galkap kumpi phuk khiat nading a kizang ahi hi. Tua hun sung in NLD in Mualtung mite phawk kha lo I ci diam Mualtung mite vai-ah tampi thanemna hong om hi. Tua bek thamlo “ko belpawl kisam kei ung” cingam ta uh hi. Tua hunin Zogam ah zong NLD tawh 1990 khut kilen a mapang den ZCD kitelcing a, USDP hun tawh teh theihloh khantohna hong piang hi.

Kua hun hi ding: USDP or Belpawl kumpi

Kawlmite lakah mi khempeuh in NLD pakta khin tuanlo (hawmthawhna tampi om) ahih manin a dem ding Party lian UBP, PPP, 88 makaite People’s Party cihte hong ding khia leuleu uh hi.

Hih Party lian teng in zong Seat a kilawm khop ciang hong luah zo veve ding uh a NLD te a dingin Challenger lianpi hong suak ta uh hi. NLD in Red flag a ngah uh cileng kikhial lo ding hi. Kidemna a man ciang Amau teng hong ki belpawl theih uh leh kumpi hong phut zo hamham uh diam cihnop huai dektak hi.

Mualtung mi khempeuh in zong a mau Minam Party ciat tawh hong kipei ziahziah leuleu ta uh hi. (A leh lamah mi tawh ki lehbulhin Tedim leh Tonzang in bel huihpi nung delh NLD nakpi tak tha piak sawm bilbel, khial mahmah ding himai. Penglam bang peuhmah Politic lamah kum 5 ta zekai: 2015 ciang USDP a cing kik ding sa kuang va lui in cing lo, 2020 kum leuleu ciang NLD ah kuanglui zel, mu thei mahmah lo himai hehpih huai sa ing. Makhelh a ngak kholh ding pen nung delh niloh hi hang. Zomite’n Kawlgam Politic huihnun zia thei vetlo I hih manin lem lo hi. Kawlgam Modern Politic I lunglut taktak leh 1988-Today thu luan zia, huihnun zia hoihtak I theih nading khuadak kul hiveh aw).

USDP te’n zong 2010-2015 kikal sung a sep ding uh thei vetlo (nidang lai dan ding mah sa uh a, bang mah sem lo uh, tu’n NLD in hong sep ciang mipite kisap sem uh ahih manin mipite lungdam hi cih a theih uh teh pilna tampi hong ngah uh (a sep dan, a sep ding uh thei ta uh hih tuak) a mit uh hong keuhta (A budget zatkiat uh zong kikhai mahmah sam hi) uh a nakpi takin panlak sawm uh hi. Amau galkapte a Reserve seat 25% nei khin lai uh hi.

Sulnung etkikna

NLD (ZCD zong) kumpi thanemna tampi om ta leh galmai nawk uh hi a hawmthawh huai pah samlo uh hi. A hici ding mah hiphot mai hi ka ci hi. Opposition party tawh kum tampi a ding uh hi a, Kumpi hong ngah ciangun Experience nei nailo uh ahih manin thanemna tampi a om hi. Term khat cingkik le uh bel hoihzaw dingin kei mimal in ka lamen veve lai hi. Term khat hong sep bek uh zong kinak zo tuam pah hiven.

A lang khatah Democracy dan tawh kalsuan ding kipan khangmoi mahmah lai a thanem sak thei ding Democracy a deihlo Kawlte sung pan misok hon khat Mabatah tawh kipei niloh lai uh hi.

Mualtung mi Ethnic minorities te vai-ah bel lungkim huai taktak zo lo mah uh ahi hi. Minsiat kipat nading I ci diam, Democracy huih I ci diam Mivomte hong kipan pah uh a (tun leitung khempeuh lawh hi), tua zom ah CM vai-in AA hong piang khia a tudong kibuai hi. Mualtung mite buaina-ah kam khat zong paulo (kam kek vetlo) uh hi. A Handle dan uh lungkim huai zo lo ahih manin Mualtung mi khempeuh lunghiang gai ta uh hi. Tua bek thamlo, galkap kumpi tawh kigulluk uh hi ding hi ci-in a muangmawh uh hita hi. Thukhun puah phatna vai leh gambup kilemna vaite ah Peace precess mazang thei mahmah lo uh hita mai hi.

Tua bek zong hilo ICC ciang dongah Pi ASSK in va gum lai mawk tazen hi (a ma gamtatna hi lo, a ma thupiak hi lo cih pen leitung in thei lua ta leh Galkapte va gum veve hi, Responsible tavuan kyi mahmah sa bilbel ing. Makai picing I ci zaw diam khat hi na ven, “hikei, omkei, NO” va cihpih mawk in kuama’n dik sa lo uh hi). Hih pen Mualtung mite muan zawh nawn vet lohna leh leitung in a muh khialhna uh hong hita hi.

Hong pai ding hun Zogam

Tutung kitel ma bel a kidem hiphot ve hang maw, kitel khit ciang bel Zomite kipum khat ding kisam pen ding hi. Kitel vai-ah muh dan, dan dan, pom zia kibang lo (Different political view and belief) hangin a deih huai lo, thu namtui lo tampi hong piang khia a dah huai mahmah hi. A hizong kitel khit ciang hong kah khempeuh Minam vai tawh I pankhop ding kinak sap mahmah ding hi. Kidemna ki elna hun kitel tawh beisak ni.

Kitel vai-ah Kalaymyo pan makaite in Mimal tangdin Pu Vum Nang leh Pu Kam Lam Khup vote ciat ni ci uh a, lungkim huai (picing uh) ka sa mahmah hi. Thu namtui ahih manin lawhcing ding hi hang ka cingam lel hi. Pu Vum Nang zong thupi kasa a, ka deihsak mahmah hi.

Ama’n zong Zomite leh Zogam hong it hong vei mahmah in sum le pai, thatang leh hun tampi bei khin hi. Pu Kap Khan Khual zong ka muan mahmah khat hi a, lungsim picing thukhual kasa a pahtawi tham cing kasa hi. Tedim sung a telcing teng zong Zomi mah tawh hong pangkhawm le uh ka ut peuhmah hi.

Tonzang lamte Politic ah khangno sinsen pilna nei vive (Pu Pau Lun, Pi Cing Ngaih Mang, Pu Suan Mang, Pu Bob Tuang) ahih manun ka lungdam hi. A kipan nai vetlo muanhuai mahmah Pu Pu Thang zong omlai hi. Hih teng Party tuamtuam ahih hang hong kah peuhpeuh pangkhawm thei lel ding uh ka lamen hi. Amau teng hangin Tonzang lamah mai lam kum 10 val lung muan huai khinta hi.

Kei mimal ngaihsut in bel Pu Suan Mang leh Pu Bob Tuangte ZCD pan hilo veve pen 88 makai Ko Ko Gyi-te Party lam hileh ka deihsak mahmah hi. Hihte bek in Mualtung mite sunmang hong tangtun pih zo ding uh hi. I minam sung a Party lian ut, Zomi Party lo peuhmah in hih Party belzaw leng mailam hunah I mavang zaw ding cih kei mimal muhdan ahi hi. Amau Concern bulpi ahih leh gambup kilemna, Mualtung mite rights cihte hi a, mualtung mite vai hi pen, Ethnic minorities teng tawh Alliance ding cih ngimna zong hi phadeuh hi. I lamzan nadingin Politic huihnun dan khua hun luanzia en a I kalsuan theih ding uh kisam mahmah ding hi.

Tua banah tukum pen Puteek kidemna (Puteek political game) tawh kibang kasa hi, khang ham tamlua hi, khangno kisam hi hang. Mai lamah khangnote, khangthak pilna nei minam vei gam le lei itte mun hong pia ta un. US ah zong kumpi pa tekta hi ka cih leh a tekzaw a ihmumu khat in dem ta lailai.

Thukhupna

Gambupah NLD, UBP, PPP, PP, USDP kidem ngeingai lakah lamet hetloh USDP te’n baihlam takin hong cing ziau thei ding tawh kibang hi. Kumpi phutzo (Ruling) party ut man a NLD zuante kikhial khathei tak maw, Tonzang leh Tedim teng tha tawh NLD in gambupah Kumpi phutzo tuam ding uh I lamet veve leh thu khat ci ni, kumpi phutzo Party tawh lungkim vette USDP lam lehlut bilbel huai kasa zaw mai hi.

ZCD bel National Politic tawh kalsuan (National Political Movement) a hih manin tukum zong kikhial tuanlo ding cihna ahi hi, a hang pen State dang khempeuh in zong a mau minam Party ciat cingsak ding uh hi. Zomite ZCD tawh kalsuan ding lung lauhuai lo lua mahmah hi. Kum 30 vilvel thau tawilo a galkap kumpi langpang a gil vilvel Politic tawh a kalsuan I hih lam a theite adingin ZCD ithuai mahmah hi.

Zomi simsing bang gil in khuam bang kho ta hen. Theih dan, tel dan kigen I hih manin a kibang lo a om leh ngaihdam bawmah maw. Kap Lian