A zakdah huai thute ih hamphat nading hi zaw thei

A zakdah huai thute ih hamphat nading hi zaw thei

Leitung ah mihingte in mihing’ lunggulhna (desire) kilaitaat thu kigen bek kipaakta hi. Pasian’ thumaan tawh kikheelna kipuahphat nading le khantoh nading lam peuhmah leitung in zadah hi. Leitungah concert (state show) lian pipi khawngah bomb puak kham cih khawng om khol lo hi. Banghang hiam cih leh ci le sa kipawlna gualnopna (materialism movement & entertainment) peuhmah leitung tawh kilem hi. American lasa siam minthang Madonna in (I am a material girl) cih thulu tawh album (la khui) a thoh pen nasia tak in kideih hi. A la zong a ngaih ngap lua pi cih hi tuan lo hi.

Ei Zomi te zong a hoih lam aa kiphat phatna naknuai kamsiam (policy) pen hoih mahmah teei na pi-in, ahi zongin khat veivei a hite ahi bangmah in gen ding zong kisam hi. Thu a maan gente Concervative kici a, a dikzul gente Liberal kici a, uang genna pen Penticostal movement nam sungah kimu pha deuh hi.

Ih kiphatluatna le hong kimuhna kilehngat kei leh hoih

Kong upmawhna sangin na pil zaw ciai, cih pen kong upmawhna sangin na hai zaw ciai cih sang in a thu hoih zaw hi. Nang lai a ong dektak leh a kia dektak koi ut zaw? Nang a cihtak tuak mahmah leh a citak ningneng koi ut zaw? Nang piangthak dektak le a piangthak lo dektak koi ut zaw? Pasian’ thu a up tuak mahmah pa le Pasian’ thu up tuak het lo napi-in, cih mi nihte gel aa dingin vantung gam koi lamet om zaw ding? (Na ngaihsutna ah ahong suak hih bang zia idea na neihte zong behlap suksuk in. Om kha ding hi).

Kei bang hong kigenna sangin thupi sa lo lua ka hih ciang aa ka lung a kiat hun tam vei tuak mahmah khin hi ing. Hong kigenna sangin a taktak ih muh teh thupi sa zaw lehang ih lungkia hak zaw hi. Ih hihna a maan bangin gen a, tua tungtawnin kipuah pen khantohna hi.

Kiphatna loh, Zogam ah gen taktak lehang percentage in numei mel hoih kitam nai lo hi. A meel a hoih vang lak a hoih mahmah bel om ek ek thei sam hi. Tuate zong mi aa’ te sangin a hoih zaw uh hi baih nai lo hi. Tua ahih manin kiniam khiat photin ahi bang ciang tawh kampau phot kaan om lo hi. Ahoih lam (positive) aa ei le ei ih kiphat ih kipahtawi theih nading mun bel om hi. A hi zongin a tawntung pen uang lua-in pau siat vai hi.

Khangluite in gam a vak uhteh a tuah phat nop uh leh pau sia kei un, kici uh hi.
Banghangin Zogam ah a beisa hun ciangciang numei melhoih lo tawm lua lo hiam cih a zom ah na sim ding hi.

Suang Dal