Khapi tung kahna ~ Pu Thangboi

Khapi tung kahna ~ Pu Thangboi

Khapi tung kahna thu tawh kisai in thu tampi zakzak sa ahih man in athupi lua in kangaih sun nawn khol kei hi. Ahi zong in September 6, 2018 ni lawm Pau Lam Piang leh Pau Pian Khai te’ thusiamna tawh khapi tung kahtohna mun ahi Florida state Orlando khua a Kennedy Space Center kapai tak ciang in ka ngaihsut thak leh ka muhthak thu pawlkhat hong om ahih man in athei nuamte khualna in tawm kong hawmsawn hi.

Khapi Tung Kahnopna Thu

Galpi nihna abei ciang in leitung pen America te leh Soviet Union (USSR) te’n phelhawm uh cih theih phial dinmun hong tung hi. Germany gam leh Korea gam bang alang tuak in phelhawm liuliau uh hi. Korea bang tuni dong ki gawmkik zo nailo hi. Zomite zong galpi nihna khit teh gam nih gam thum dong ah kitheh thang toto in tuni dong akitheh thangthang lai phot ih hi hi. Kum tul nih dektak bang kitheh thangna pan in akigawmkik Israel te dan a kigawm kik ding ni ih ngaklah mahmah hi.

US leh USSR kikal deihtak kidemna hong piang hi. Tom gen leng mi’ pimuh ding ut tuak mahmah uh hi. 1955 kum in US in vankuumpi (space) ah kah ding hi ung ci’n hong tangko hi. Tua zawh ni 4 ni ahi August 2, 1955 ni in USSR in zong ko zong asawtlo in kah nung ci’n thuk kik pahliah hi. USSR in zo hiau a, April 12, 1961 ni in Vostok akici vankuumpi set (spacecraft) tawh Yuri Alekseyevich Gagarin (1934 – 1968) vankuumpi sung va zin khia hiau hi.

US te zong hong thangpai mahmah uh hi. Tua hunlai tak a akumpi uh ahi John F. Kennedy in September 12, 1962 ni in Houston khuapi Texas state a om Rice Stadium tualpi a kikaikhawm mi tulza tampite’ mai ah “We choose to go to the Moon” (Khapi tung kahzawk ding in ih teel hi) ci’n hong tangko khia a mipi zong lawp mahmah hi. A tupna hong tangtung takpi ahih man in hih Kennedy’ kampau pen aminthang mahmah khat hong suak hi.

US kumpipa’ tangko zawh kum 7 aphak hun ahi July 20, 1969 ni in Neil Armstrong leh alawmte 2 Apollo 11 tawh khapi tung vakah zo peetmah uh ahih man in US te hong gualzo kik leuleu hi. (Ahi zong in tuhun teh mi pawlkhat in Apollo 11 pen khapi tung kah takpi loding hi. Tua hunlai a USSR tawh kidemna lianlua ahih man a mipite khemna hizaw ding hi aci zong om hi). Bangbang ahi zong anung lam ah zong tamveipi kah khin uh ahih man in khapi tung kahna vai ah US te agualzo mah hong suak phot uh hi.

Khapi Tung Pan Laikhak

Khapi tung atuk lian ciang in Neil Armstrong in Houston khuapi a set hawlte lai khak a, “Houston, Tranquility Base Here, The Eagle Has Landed” (Hoihtak phatak in mupi tuta hi) ci’n laikhak pah hi. Tua khit teh khapi leitang asik kawm in “That’s one small step for man, a giant leap for mankind” (Mihing khat in kalneu khat asuan ziau pen mihingbup ading in kuampi khat kantanna hiveh aw) ci hi.

Khapi Tung Nuntak Zia

Kennedy Space Center ah a video tawh khapi tung a omdante uh ataktak azaih uh hong lak ngiat uh ahih man in kician mahmah hi. A annek a tuidawnte uh paih kullo in set tawh siangsak kik uh a nek theih kik ahi hi. Leitung dan a tampipi nek venvan nam bel hilo hi. Dailenna zong akituak lian a tutsuk kul a avang neu siuseu khat ahi hi. Kisilna khawng zong tui kibuak zuahzuah theih omlo ahih man in damdam in kinawtnawt in kinul kik mai uh hi. Tuisung a om bang uh a, dingtang giugeu cih bang omlo hi. Hoi diaidiai in ki peipei mai uh hi. Khapi tung ah avak khiat ding uh ciang leh aciah kik lam ciang un apuante uh golthei lua ahih man in buai mahmah uh hi. Tuisung om bang uh ahih man in akhe uh gakcip uh a, puan bang asuah ding ciang un akawng ah khat ding ngiat kawm in asuahsak kei leh ki suah zolo hi.

Leitung i huupna (gravity) omlo ahih man in ih guh ih tang muat baih mahmah ci hi. Tua ahih man in ni khat atawm penpen exercise nai 2 peuhmah bawl kul ci hi. Tua hikei leh leitung atunkik uh ciang aguh uh muatmang thei ci hi. Khan neu sung khat ah aki om khawmkhawm ahih man in kitot hun zong om ci hi. Kitot hang bel tuisung om tawh kibang ahih man in kitup kibet theih bel om samlo ci hi. Leitung ciah kik ding bel kilawp mahmah ci uh hi.

Vankuum Innpi (Space Station)

Hih vankuum innpi pen 1998 kum a US leh Russia kihel in gam hau 15 kipawl a alam uh ahi hi. Hih vankuum innpi ah mi omden a kilaih zeel bek uh hi. Anek adawn ding uh leitung pan khak zeel uh hi. Singgah bang abung sung pan buasuk le uh anuai ah kiasuk cih om tuanlo a tuisung a alaam thei van ih buak bang lel hi. Christmas khawng zong bawl uh a birthday khawng zong bawl thei uh hi. Amau’ nasep pen leitung kikhek zia leh aksi tuamtuam te encik uh hi. Kha 6 halta khawng in mi kilaih uh hi. Leitung pan in alaih dingte atun ciang bang in nuam mahmah uh hi. Akikhen ding ciang bang nn kikawi uh a kakah phial uh hi. Aciah ding pawl in “See you on earth” (Leitung ah kimu ni) ci uh hi.

Hih Vankuum Innpi pan in mihing’ omna ding in anuam penpen ding avot lualo asa lualo leitung dang khat peuh a om kha hiam ci’n a zonzon uh leh avot lua lo alum lualo anuam mahmah ding khat bel mukhia uh ci hi. Tua mun tunna ding in hih leitung pan in khuavak zah a amanlang in pai hi leng kum 500 (light year/khuavak kum) kipai khop ding ci hi.

Leitung Siatna

Vankuum Innpi pan in a etcikna uh pan tuma kum 40 sung in leitung pen sia mahmah ta cih mukhia uh hi. Mihingte’ huaihamna hang mah in hih leitung sa tektek a, vukte nawhtui mahmah ta ahih man in tuipi maitang khang tektek ci hi. Leitung a khuapi minthang tampi tak tui in tuum hak nawnlo ding ahihna kician tak in hong lak uh hi. Atom in gen leng leitung ah mihingte akiteen theih nawnloh ni peello tung ding cihna hi. Mars ah zong tui a om ngei hi a tui akan ciang in asiacip hi ci hi.

Aksite Lak Ah

Aksi pen tam mahmah a billion tampi pha ci hi. A lim mahmah in zong hong lak uh hi. Hih leitung sang agolzaw vive ahi hi. Etlawm thei mahmah hi. Pasian’ bawlsa nahoih tuazah a tam mahmah kawmkal ah Pasian in ei hong phawkkhak citciat pen angtan huai kasa mahmah hi. Tawntung hun (eternity) ah Pasian’ bawlsa na hoihte velvel in ki nitum mai in ka um hi. Tam cihtak in tam ahih man in tua Pasian’ Khutmate en in ih nitum lel ding hi. “Hoih mah si cia maw!” ih cici mai ding hi.

Amazing Grace

Video lahna abei kuan ciang in Vankuum Innpi a nasemte khat in gawsem tawh “Amazing Grace” (Alandang Hehpihna) hong tum hiauhiau hi. Ka lungsim hong sukha mahmah hi. Keibang lel hong it a hong phawk hih zah a lian, hih zah a hoih Pasian’ Itna lamdang mahsi maw kaci bek hi. Pasian Hoih Taktak Hi! Lai nong simsak lungdam mahmah ing. Note’ itna sung ah, (Mung Laan Thang) Tawmvei Denver, CO, USA September 11, 2018