Pawlpi Sang Nipi (Church School Sunday) ~ Lang Khan Khai

Pawlpi Sang Nipi (Church School Sunday) ~ Lang Khan Khai

1. Pawlpi Nipi Sang Athupina
Pawlpi Nipi Sang pen naupangte leh Pasian kimuhsakna hi a, Pawlpi Nipi Sang akah ngei leh akah ngeilo naupangte agol ciangin kilamdang mahmah hi ci-in kigen ciat hi. Akilamdanna igentheih dingin tampi om hi.

1) Pawlpi Nipi Sang kahngeite in agol ciangin Nipi Sang akahpihte mah lawm hoihpenin nei hi.

2) Pawlpi Nipi Sang ah akihilh laite atamzaw nuntakpih uhi.

3) Pawlpi Nipi Sang ah ahilh sangsiate etteh thei uh a, aneulai laihilh sangsiate lak ah Nipi Sangsiate tung ah alungdamna uh lian diak hi.

4) Nipi kal 1 – ni 7 sungin Pasian kammal hun khat asin theihna uh hangin lawm leh gual nei-in ibiak Ahing Pasian ahihna telsakin Lai Saingtho thute tampi thei uh a, agol ciang un, tua Lai Siangtho taangte mah tawh haksatna buaina nopna ah tha la thei uhi.

2. Nulehpa In Itate Pawlpi Nipi Sang Kahsak Tangtang Ni

Nipi Sang akah ngeite in biakinn leh Pasian thu nuamsa a, akah ngeilote leh Pasian kimuhna ding haksa hi.  Nipi Sang ikhak tangtanna hangin thumang tuam uh a, kal 1 sung anuntakna uh, Nipi Sang ah asin thute in thutheihna leh ngaihsut theihna neisak hi.

3. Pawlpi Nipi Sangsiate Limtak Guai Ni

Nipi zingsang nai 1 sung khawng hilel e cileng hithei napi, nasep leh sangkah buaina tuamtuam hangin laihilh ding en man kei leh, ahilh thute nangawn tel kei leh naupangte in telzo hetlo ding hi.  Mihing nuntakna ah amawkna tawh kisemsem zo taleh, atawpna ah guaihna ingah leh ingahloh kilamdang veve hi. Atam kei zongin sum ahi a, lungdam kohna van khatpeuh ahi zongin, pahtawina leh anasep uh theihpihna, pahtakna kammal leh letsong ipiak ciangin asemte in zong, thupi ngaihsut tuam hi.

Pasian nasepna hi, bangmah kipiak kul kei cilozawin itate in Pasian thu umin mihoih hong suak hen icih leh Pawlpi siate leh Nipi Sangsiate amau uploh zahkhopin pia leng, amau lungdamna hangin Pasian lungkim a, itate in thupha ngah hi.  Pawlpi siate leh Nipi sangsiate aa dingin sum a it vauvau lawmlawm upa makaite tate agina tampi omlo hi.

4. Pawlpi Nipi Sangsiate Sangsia Sinna Ah Paisak Hamtang Ni

Laihilh ding takpi, ahilhzia ding leh ahilh ding thute telmello ahih leh naupangte aa dingin sup huai, nulehpate aa dingin khasiat huai mahmah hi. Nipi Sangsia sinna pen om kawikawi a,  ahoih zawdeuh, akilimhilh zawdeuh om veve hi.

ZBCM in zong, asawtlo-in neih dingin kigeel a, naupangte laisin kawm a kimawl theihna ding vante zong ahitheizah bawl dingin kigeel hi.  Ingaklah leh ikiangnaipen sangsia sinna ah pello kha ciat ni.

Tua ahih manin Pawlpi kim ah Pawlpi Sang Nipi limtakin bawl ciatin itate Pasian thu tawh pattahna ah Nipi Lai Siangtho Sangsiatte limtak pahtawi ciat ni ciin kong hanthawn hi. Sia Lang Khan Khai (Secretary, ZACC & CEd & CAD)