Khangto khawm liailiai dihni ~ Hau Za Cin

Khangto khawm liailiai dihni ~ Hau Za Cin

Huan khat sungah singkung a dimlet in suan lehang a vekpi in nungta khinlo uh hi. Dimlua in kidep uh a, khangtheilo in pawlkhat si uh hi. Leihoih na pia a tuisik na buak zongin khangkhia tuanlo uh a, thoza na kap a zatui na pia zongin hing tuanlo uh hi. Banghang hiam cih leh a vekpi vua a khanna ding uh mun kicinglo hi.

Industrial Age i cih machine tawh nasep kipat hun laiin mihing sep ding tampi machine in sem ahih manin mi tampi in sep ding taanlawh uh a, tampi in nasep ngahlawh hi. Tuhun ciang Information Age ah zong mi tampi in nasep taanlawh in tampi mah in muhlawh uh a, ahi zongin a vekpi un suakta khinlo uh hi. Mihing nuntakna leh kikholhna, kipawlna zong tua bangmah ahi hi. Industrialization hun ah nasem thei ding mi ki kaikhawm in a septheih ciat uh kisemsak in, tuate in a sep theih ciat uh a bulhkhawm, a lemkhawm uh hi. Information Age hun ah zong tua bangmah hi a, amau leptuah theih ciat a lemtuah uh ahi hi.

Huan sunga singkungte na nawh khansak theihloh mah bangin mihing khantohna zong na nawh thei tuan kei hi. A kiton kul a, a khantoh khop uh kisam hi.

Mihing kipawlna ah machine bangin mihoih tampi lakhawm, koih khawm in khantohna i piangsak thei kei hi. Mihing khantohna pen a khangtolo penpente khantohna ciangkang tawh kiteh hi kici hi.

Mi khat samin Manager hiteh ciin manager tutphah ah tusak lecin manager sem theilo ding hi. Sem ngeilo ahih manin a semtheilo ahi hi. A niamlam pan a sanglamah sem thei dingin na pattah ding kisam cihna hi. Kahlei tampi a kah phot kul cihna hi. Mi khat bek ahi a, mi tampi ahi zongin tua pen a kibang ahi hi.

Pattah, lamtoh, puahtoh, sinsak toh ahih phot kei leh a piang theilo ahi hi. Tua manin nang makai na hih leh na zoma makai dingte nang tawh a khangkhawm, a semkhawm, na pattah ngei khat ahih kisam hi. Mihing khat makai sem thei dinga na pattah khiat sanga lungkimna lianzaw mihing nuntakna ah tam hetlo hi. Tate nang dinmun (Nu leh Pa dinmun) ah ding thei dinga na pattah khit na muh zaha na lungdamna tamlo ding hi. Na lungkimna lian mahmah ding hi. Makai khat pattah cih pen tua tawh kibang hi. Khantoh khop kul hi.

Tua ahih theihna dingin kahlei siksan sawm tawh etteh dih ni.

1. Lei hoihlo ah singkung a khan theihloh mah bangin makai hoih khat in mipi hoihlo, mipi ginalo makaih thei tuanlo hi. Makai hoih kisam a, mipi zong gina mahmah ding kisam hi.

2. Amau khan ngeilohna leitangah singkung na suan hangin a sih kik veve bangin ama mizia tawh a kituaklo makai dinmun ah deihsak thu tawh makaiza a kipiak hang makai lawhcing hi theilo hi.

3. Singkung a hinna dingin zung a kaih a kisap mah bangin makai hoih a suahna dingin makai khat peuh in panpih a tawsawn kisam tawntunga, makai a suah phet in mipi in zui het-hat pah, khangto khawm pah het-hat uh cih om ngeilo hi.

4. A po lohna ding munah singkung a po ciangin a dangte a dep cip theih mah bangin ama makaihlohna ding mun ah makai a semte in mipi susia zaw hi.

5. Singkung khata hik leh natna te singkung dangah a kilawh theih mah bangin makai ginalo in ama ginatlohna teng mipi tungah lawhsuksuk thei hi.

6. Singkung lianzaw in a neuzaw te a domkang mah bangin makai gina khat in a nuaia mite domto in lamsanga, dingtangsak hi.

7. Singkung kigamla pian leh a khan hoih mah bangin makaite zong amau leh amau a kisinna ding hun hoih piak siam ding kisam a, neh hehu, bawh lilu kisam tuanlo hi.

8. Singkung a pona leh a ngatna lam laih leng a khan hoihzawk theih mah bangin makaite zong khatveivei kinawlkhin in kibullot thei a, mun thak leithak ah a kituahkhiat kul hi.

9. Na huansungah singkung namkim a kikim in a khankhiat ding a hoih mah bangin makai thak ding dang tampi na pattah den, na tuibuak den ding kisam ahi hi.

10. Singkung leh makai kibatna khat kimangngilh bawl theilo a, tua in – a khantoh kei leh a si ahi hi. Mai a nawt kei leh a kiamlam ahi hi.

Mailam ah makai dinga na deihte khempeuh singkung bangin na tui buah den kisam a, aktui bang dawm in na pattah kisam den hi. A khangto khempeuh a dinkhawl leh a dangte a delhphak ngeiloh bangin a khangto lo mipi leh makai in a khangto mi leh makaite phazo ngeilo ding hi; tua manin mainawt den, kalsuan den, kahtoh den kisam ahi hi.

Tua ahih manin mi khat bek madawk in khangto cih bang hilo in makaite bek zong mipi nusia in madawk hituanlo in a kitonin i vekpi in i khantoh ding kisam a, i khantoh tek kawmin ei lak ah a makai thei ding, a makai siam dingte makaite in mitsuana a pattah, a sinsak, a train tohtoh kisam ahi hi. Tua pen mipi leh mimal hamphatna ding ahi hi.

Mipi pil mahmah in makaite hai mahmah cih hitheilo a, mipi hai mahmah in mipi pil mahmah cih zong tonkhawm theilo hi. Tua manin kuamah kitaisanlo a i khantoh khop liailiai kisam hi. Minam vai ah hi in, pawlpi vai ah hi in, kipawlna vai ah hileh zong kizang thei khin hi. Topa in a khangto khawm liailiai minam hong suaksakta hen. Lungdam. Hau Za Cin (Phuitong Liim)