Nupi naupaai kha 6 aphapan khat mawtaw in taihlum, naungek ahunlap in ki at khiathei
Singapore gamsung Jurong West ah nupi naupaai khat mawtaw in taihlum in, agilsung aom naungek pen ahunlap in ki at khiaman cih Straits Times pan kiza hi. Saturday ni zingsanglam in thupiang hi a, nupi naupaai pen kha 6 aphakhin ahihi.
Ateknu tawh zingsang Breakfast anekkhit uhciangin vanleiding in Market lamzuan in apaikhawm uh hi a, mawtaw koihna Carpark panin apusuakkhia Lorry mawtawpi khatin naupaai nupi pen phukha citciat hi.
Naupaai nupinu minpen Goh Chieh Ting kici a, kum 25 aphakhin pankhat ahihi. Atung Photo pen Goh Chieh Ting ii Photo ahihi. Mawtaw in aphutkhakna ah si tampitak luangkhia in, amanlangin zato kipuakpah himahleh zato panin hongnusia hi.
Anu asih ciangin zato siavuan te’n agilsung ah khacingnailo, kha 6 bek aphapan atano pen amanlangin Emergency Caesarean bawl uh a, at khiapah uhhi.
Naungek pen upmawh sangin cidam mahmah a, kha 6 phapanding buangin gol mahmah kici hi.
Naupaai nupinu pen ateeknu tawh zingsang Breakfast anekkhit uhciangin Market lam zuanin khut kilenkawm in lampi akankhawm uh cihi. Block 456 geinai, Jurong West Agenue 1 ah lampi akan laitak zingsang 8am hunin atuahsia ahihi.
Lorry mawtawpi pen Carpark panin pusuak in, ahunlap in Brake sikgawp himahleh khawlmanlo in naupaai nupinu anawkphei ahihi.
Ateeknu pen khasia mahmah in, atuahsiat hun akipan kapkapmai cihi. Naupaai pen ahihleh alu liamgawp in Ng Teng Fong General Hospital ah akipuak hangin zingsanglam 9:30am hunpawl in sisuakpah hi.
Mawtaw hawlpa pen kum 46 aphakhin khat hi a, thunei te’n manpah uh cih kiza hi.
Sunday nitaklam in sihvui hunbawlna ah Goh Chieh Ting ii alawm agual leh meltheih tanau tampi ki kaikhawm uh a, ki khasiat mahmah hi. Ataneu ahihleh cidam mahmah bilbel cihi.
Related: Nupi naupaai kha 6 aphakhin khat inndawl 3 na panin kia in sipah
Goh Chieh Ting ii sihna vaitawh kisai in apasal leh anu apa te’n bangmah genkhiatding utlo uh a, ahi zongin Ng Teng Fong Hospital panin ahunlap in ata uh aki at sakpen siavuan te tungah lungdam mahmah uhhi. ZD Sawltak #zomidaily
Comment piaknop aomleh...