Khangthakte (Gen Z) & Facebook ~ David Thangkhek

Khangthakte (Gen Z) & Facebook ~ David Thangkhek

Leitung khantohna nakpi in khang a, khangkhat khit khangkhat kilaih in tuin ei Generation Z ih hihi. Hun zong kilaih toto in Media hun sung kitung tota hi. Hih hun ah ei Zomi khangthak(Gen Z)ten koi bang in zanghto leng mi kipha ding hiam cih ngaihsut ding kisam hi. Tua lakpan media tawh kisai tawm ih gennuam a, media sungah ei zatpen Facebook zatdan tawm kikum ni.

Facebook koici zat ding ih hiam?

Khangthak te sungah Facebook account neilo ki omlo phaial hita hi. Na zangh thei hiam ci-in kidong leng? ka zanghthei kici tek in um ing. Tua leh koidan in zangh ih hiam? Facebook pen cimphawng peuh in ih zatzat mawkleh ih hun nak pammaih lua mahmah hi. Amanpha mahmah ih hunte Facebook ah kici zat ding?

1. Facebook pan Pasian kizong thei hi.

Pasian thu pen kampi tawh up cihciang bek hilo a ih nisim nuntakna ah sinbeh, zongbeh, zatpah, zuihpah ding nam a hihi. Pasian na up takpi leh Pasian thu kigente ngai inla lai kigelhte sim in online biakpiakna, Pasian thu kikupna te ah kihel in. Tu laitak Covid-19 hunsia hangin Facebook pan online Pasian biakpiakna ki limzat mahmah hi. Tuate thusim in.

2. Gamlehnam, khualehtui adingin na hoih tampi kisem thei hi.

Ahunhun a thupiangte mantak leh kician tak in tangko in, a hunlap in mipi theisak lecin phattuamna tampi kingah ding hi. Huihlak pan gamlehnam, khualehtui na itna tangko in, na veina lakkhia in, lai-in gelh inla thumanpha tampi hawmkhia in.

3. Sumlehpai kizong thei hi.

Facebook zangh in mite in sumlei-sumzuak cih na phawkkha hiam. Gtn: online vanzuakna, tintan piakna cbt..

4. Pilna kizong thei hi.

Facebook zatna ding phone sum na thunthun te pammaih salo na hi hiam? Pilna thute kan thei in sin thei lecin pilna leilei na hihi. Gtn: Pausinna, Anhuan dan sinna, San lai sinna, khutsiam sinna, khantoh na’ng tentan tuamtuam tampi tak om hi. Na uk, pilna siamna khatpeuh sinthei kanthei hiteh.

5. Lawm kizong thei hi.

Lawmpen lawmngaih cihleh lawmhoih cih namnih om hi. Anih tuak in Facebook pan kizong thei ahihlam phawk gige in. Melhoih na sak te bek ho ding hilo a lawmhoih, thu kikuppih theih lawm muanhuai zong na zong thei hi. Tua bek hilo in mite hong muanna zong online pen na khangsak thei hi.

6. Sanggam, usung-nausung kizopna hoihtak na bawlthei hi.

Nidang lai dan in inn tektek ah va kihawh va kigen tektek zek tuanlo hi. Facebook pan in thu kizaksak, thukikum in vaikhat peuhpeuh nuamtak in kihawm thei cih phawk in. Hun manpha tampi kizangh thei cih phawk in.

7. Facebook tungtawn in khual kizin thei hi.

Napai nopna gam leh mun zong in tua gammi te koici nuntak, koibang in sumlehpai zong in koici bang in gamta kampau cih kanthei sinthei hiteh. Gamhoihna, kimlehpam hoihna te melmuhtongsan leh limlahna tawh ki muthei hi.

8. Nasep zong thei hiteh.

Innpua ah nisa thuak in vakkhiat sese kullo in phone sung pan nang sepnop leh nang lunggulh tawh kituak nasep nam kan in zon theih q hihi. Koimun ah tua nasep om a khasum bangzah kingah thei, koici dan in nasepnei te tawh kithuza ding cih a kipan kiteltak in kikan thei hi.

9. Kipawlkhopna khat peuhpeuh ah ma kipang khawm, kipawl khawm thei hi.

Tua kipawlna i tupnalehngimna dong inla, koicibangin kimangpang kikalsuan cih dong cian in. Na meetna ding leh mite phattuamna ding kipawlna a hileh midangte zong theisak in zawn in.

10. Cidamna lam zong kikan thei den hi.

Na tuahkhak natna pen apiangngeisa leh aphukha ngeisa zong mi tampi tak om hi. Natlehsat khat na tuah leh a hunlap in dottheih ding mi thei inla, a hunlap kibawl theihna ding huhna ngen thei hiteh.

Facebook ah kisem thei adang tampi tak omlai hi tuate genkhin zo kei ni. Na lunglut leh nanglehnang in kanbeh zawh ding kisin in. Amanpha Facebook a hihlam theih sawm tek ni. Lungdam, David Thangkhek