Khami Taktak ~ GS Pau

Khami Taktak ~ GS Pau

Mahatma Gandhi in Jesu pen thupi sa lua ahih manin, “Jesu a sun linlian Tapidaw khat ka muh nini in kei zong Tapidaw suak ning”, ci hi. “India gam sungah Tapidaw a khan theih nading in bang teng kisam na sa hiam? ci in Mahatma Gandhi kidong a, aman, “Jesu hong sun unla, Jesu dan in na thugen uh leh na gamtatna uh hong kituaksak un. Na upna uh thu dangdang tawh helzau gawp kei,” ci in dawng hi.

Leitungah tatdan nam 4 om hi. A sia khat a sia mah tawh thukkikna pen ganhing tatdan hi. A pha khat a pha mah tawh thukkikna pen mihing tatdan hi. A pha khat a sia tawh thukkina pen Setan tatdan hi a, a sia khat pen a pha tawh thukkikna pen Jesu’ tatdan hi. Khami taktakte’ tatdan zong kici thei hi.

Mi si hong om ciangin ei’ sih lai in hong gal uh leh en zong gal, hong gal kei uh leh gal lo. Amau’ hong galna zahzah tawh galna pen Jesu’ tatdan ahih kei leh Khamite’ tatdan hilo hi.

Jesu pen kiniamkhiat hi. Mawhna maisak den a, mawhna tawh kizui in kuamah thukkik ngei lo hi. Thuman lopi in a kimawhsak hangin dawng kik se loin thuak ngiungeu lel hi. A kibawlsiat hangin zong thukkik se lo a, amah a bawlsiate’ ading thu ngetsakzaw hi. Thukkik nuam hi leh Vantungmi a deihzah sam thei lua hi. Ahi zongin sam se loin na thuak lel hi. Ei Tapidawten I etteh ding pen Jesu hi a, Jesu danin I nuntak ding ahi hi.

Billy Graham in, “Pianthakna I cih in tawmvei sung kikhel pakna hilo a, ni khat khit ni khat Jesu Khris sut semsemna hi,” ci hi. Khami hihna pen kamtuam pauna, biakinn sungah lamna leh dianna cih ciang bek na hilo hi.

Khami hihna taktak in Jesu’ lim sutna ahi hi. Jesu dan mah in kiniamkhiatna, midangte’ mawhna maisakna leh leitung nate lunggulh lohna cihte pen Khami taktak hihna kilatkhiatna ahi hi.

Mi tampi pen a khami taktak cih sangin miten “Khami” a cih ding ki-utzaw thei hi. Khami a kici tampi in kiniamkhiatna pen guallelhna danin ngaihsun ahih manin kiniamkhiat nuam lo uh hi. Midangte’ mawhna zong maisak zolo uh hi. Ahi pen ahi bang, upadi bangbang ci lanlan uh hi. Jesu in tua dan ci ngei lo hi. A khami tata a thuduhpen, zumkong mangkong a tung munpen khawng kihi thei hi. Leitung nate buaipih in gamh peuh I kituh thei lai hi. Hihte pen I khami taktak lohna kilatkhiatna hi gige hi.

Pasian’ nasem tampi in zong Jesu kisun lo hi. I thugente hoih thei mahmah napi, ei mahmah in kizui lo pah malam hi. Pulpit tungah vantungmi kibang liang napi, a pualam I tun teh dawi peuh tawh I kibang phial thei hi. Pulpit tunga I thugente leh I nuntakzia kilehbulh thei hi. Tua hangin miten Jesu mu thei lo uh hi.

Korea gamah Pasian a um, a khami mahmah mihau nupa khat om hi. Nikhat, a tapa neihsun uh migilo khat in thahsak laizang hi. Amau nupa zong dah lua uh ahih manin teek lawh phial uh hi. Nikhat, “I sih khit ciangin I gamhte kua luahsak ding I hiam?”, ci in kidong uh hi. A tawpna ah, “I tapa hong thahsakpa I gamh luahsak ni,” ci in thukim uh a, tua mithatpa tawh zong thukimna lai bawl uh hi. Hih thupiang pen Korea gam sung tengah kizel a, hih thu in mite’ lungsim vut mahmah hi. Hih thupiang a za tampi in pianthak lawh uh hi. Thuhilhna tuamtuam sangin hih thu hangin a piangthak tammahmah kici hi.

GSPau’ gelh aki tomlak ahi hi
Zomi Christian Fellowship, Delhi