Zang khial kha ken

Zang khial kha ken

Olympic tai kidemna-ah gualzopa ahi, “Meikuang sakol-lengte” Chariots of Fire) kici limhing (film) sunga kihel, Eric Liddell in, “Pasian in ngimna khat aading kei hong bawl ahihlam ka um hi. A manlang dingin hong bawl ahihlam zong ka um a, ka tai ciangin Pasian’ lungkimna in hong zawtkha hi” ci hi. A nununglam ciangin amah’n “Tai kidemna ah kihel nawn kei leng Pasian a zahko tawh ka kibang ding hi” ci lai hi. Kha tawh kituaklo siamna cih bang om lo a, a kizangkhial siamna cih bek om hi. Pasian’ lungkim nadingin ih siamna bangbang zatsiam ding hoih hi.

Ih siamna hong ki pakta pianleh thuneih luatna kiphatsak luatna in hong zui kha pahpah ahi manin siamna hong piapa ki manggilh kha thei hi. Ih siamna tungtawn panin sum ki deihlua leuleu kha thei hi. Ih siamna ih theihna te pen Pasian ading, amin thanna dingin ih zatleh sum deihna tawh ki zoitawnlo hi. Leitung thu ah siamna ih neihleh ih siamna tung tawn panin Kha sum hong piak ding mah uh ahihi. A hi ding mah zong ahihi.

Met bawl ding, phung sak ding acihteh sum tawh hi pahpah samlo hi. Pasian ading ahih nakleh ih siamna te suahkhia ding tua tung tawnin Pasian thu a um nailo a telnailo ten Pasian hoihna thei pan ding hi. Tua hi metbawl, phungsak i deihna ahihi.

Siamna a neih taktak te ki phasak ngeilo in ki niam khiatzaw hi. A hangin hih kei siamna pen ki phatsak pih dingin Pasian in hong piak hilo hi cih a telluat man uh ahihi. Biakinn khawngah Music tumtum in siam a ki sak pianteh, miten a pahtaak pianteh Ni thupi lo buang ah tumnuamlo, homecell khawng ah tumnuamlo cih peuh om thei hi. Pasian tawh ki zopna a neih taktak ten maw…koikoi ah amau ki zat theihna ki sak theihpihlo in phungsak zaw hi.

Siamna hoihna theihna i neihleh hih tai kidemna pa lungtang puak bangin Pasian in gimna khat neih in hih ciang hong tungsak hi cih phawk huai hi. Siamna khat peuhpeuh a zangh khial tampi om theilua hi. Hoihna zong a zangh khial tampi om hi. Thu theihna zong a zangh khial tampo om hi. Ih zat khilhlohna dingin nisim in Pasian tawh ih ki zopna te lenkip ni. Lungdam.

Thawn Tuang
April 30,2015