Kei le kei ~ Lian Tuang

Kei le kei ~ Lian Tuang

Leitung galpi nihna lai Japan galkapte Myanma gam sung ong lut ciangin Mangkang galkapte gal lel in India dong ah nungkik to uh hi.

Mangkangte bulphut khuapite lakah Mawlaih khua zong khat hi a, Mawlaih khua om mikangte le galkapte zong Japan gal tai in Letsikan bual tawn in Khampat, Tamu pan India gam ah taito uh hi.

Ka nasepna Station Tower pen Mangkangte galtaina lampi tungah kilam hi a, zuminn kim tengah tuni dong mah in galbukna dum, bomb kiatna dum le tua hun a kizang sikling, thautang le vanzat nengnengte gamlakah om kawikawi lai hi.

Mangkangte a gaitai kawmin sumtang le kham leh ngun pawlkhat sel kawmkawm hi cih kamdawn khawng om ahih manin kei zong sun hun ka om muang kawm in khat veivei gamsung kenlak guamlak peuh ah ka vak thei zel hi.

Kham le ngunte ka mu kei a, gamsa tuamtuam vasa tuamtuam le gammang tulak gimnam leh singkung lopa mual le guamte om dan tuamtuamte ka mumu kha zaw hi.

Tu kum April kha kipat lamin Dr Than Bil Luai (Wesley zato ) le Germany gammi khat Letsikan buai ah ong pai uh a, lamet lohpi khat in thucin thutang ka kiho kha uh hi. A lenglapa in vasa ham ngai nuam ci ahih manin ka zuminn tawh a kigamla lua lo mun khat ah ka paipih hi.

Tua mun ah a nih un nai 1 sung bang tu hithiat uh hi. Tua khit ciangin ka kileh kik uh hi. Dr Than Bil Luai le Germany pa kihoho uh a, tua khit ciangin Pu Than ( Dr ) in “ lungdam peuhmah ei. I lawm pa lungkim lua. Germany gam pekpan kong pai pen hih lai ah tawmvei sung vasa ham ka ngaih khak bek tawh zong manpha sa in, pai tak sa khin ing ci zezen ei” ci in nui kauhkauh hi. “ Hih lai ah a om kha te bel mi hampha mahmah hi ei, ong ci lailai ei” ong ci beh lai hi.

Amau ciah khit ciangin ka lungsimah ka gelgel hi. Cimphawng peuh a ka paipai na ka omom na mun teng pen gamdang mite in manpha sa in thupi sa mawk ahih manin kei pen a hampha mahmah hi lel lo kai maw ci in kei le kei tha ka kipia hi. Lian Tuang