Kei Apengkhia Nuam Pa

Kawlgam gamvai buaina ah ‘pengkhiatna (secession/separation)’ in athupipen khatin kihel hi. Pawlkhat in pengkhiatna pan ong piang ding thu hoih, thu siate etkakin pengkhiathuailo hi, aci zong om hi. Pawlkhat leuleuin amau khutnuai ah atawntungin Mualtung mite akoih nop manun pengkhiat ding aphallo om hi. Pawlkhat leuleu, belpawlkhawm-a minam ngahhuaite taan lawh-a meetna aomloh veve sangin ci’n pengkhia nuam uhi.

Pengkhiat ding phallo akicite nungah en leng athu ahang tampi om hi. Pengkhiat ding i khaam nop leh ngahhuaite tankim ding kisam hi. Ngahhuai tankim kei leh atam ngahzawte in apengkhia nuamte khaam ding ahi hi. Ngahhuai angahlote in ahih leh pengkhiat ding mah hanciam tawntung ding uh ahi hi. Atomin gen leng pengkhiat nopna ahangin ngah tan kikimlo cih hi lel hi.

Kawlgam gamvai ah pengkhiatna tawh kisai pau ding kilau tek hi. Kawlte’n zong lau. Kawl ahilo minam tuamtuamte in zong lau uhi. Alauna ahang pen atunga i gensate hang hi thei hi. Pawlkhat in pengkhiatna in tuhun leitung khuahun luan zia tawh kituak nawnlo, koi gam mah in panpih nawnlo hi, tua ahimanin pengkhiatna pen pulakhuailo hi, ci uhi. I ginkhiat sak khak leh i gal ahi thuneite meetdokna in ong nei lel ding uhi, ci uhi. Thunei azom azomte in pengkhiat ding ahanciamte peuhmah apengkhia nuamte ci-a atawntungin dop bawl ngeilo uhi. Hih banga apengkhia nuamte ci-a ong ngawh theihloh nading pengkhiatna kam genhuailo hi, aci uh ahi hi. Tua pen mahmah zong thumaan i nungngatna hi pah hi. Hih buaina pen i lau khekha manin zong aman pah ding hilo hi. I pelh nop keei phial zonga asiang ding hilo. Selcip-a zong apiang theilo thu ahihlam phawkhuai hi.

Pengkhiatna tawh kisai thumaan thutak taktak in ahih leh akiphiat theilo minam khat ciat ii suahpih ngaihhuai (basic rights) ahi hi. Phalna zong khutdawh-a nget akullo ngahhuai ahi hi. Lam khat pan en leng, tang thu dung ah atuam teka aom ciat (minamte) i hi hi. Thumaan thutak i nial laisiah, i kitheihmawhbawl laisiah, i nungngatsan laisiah daihna, kilemna, khantohnate tawh i kigamla mahmah lai ding hi. Akhang akhang aa thuneihna alencipte in apengkhia nuamte peuhmah azum, ahiam, thatang zangha akhaam uh ahi hi. Kipumkhatna pen thatang tawh lam, zong kici thei hi. Tanglai pupa hun (feudalism) aa ziate mitsuana anei laite ahi uhi. Minam ait luazek Kawlte in zong tua mah na panpih uhi. Minam itna i cih in minam kim ading ahoih hia ahizong akisam sang akhauh luat leh kihuat, kielna piang sak zel hi. Kawlgam in ahih leh kiel kihuatna bekthamlo buaina namkim tawh khang sawtpi akipingpeivei gam ahi hi. Kawlgam ah na minam na it khak leh mawhna ahi hi.

Tua bang hi leh kei zong apengkhia nuam pa hilo ding ka maw. Kei pengkhiat nop zia in midangte aa tawh kibang khollo thei leuleu ding hi. Yakhaing minam i cihte in abeisa tangthu dung ah atuam vilvelin aom ngiat minam ahih mah bangun pengkhat ngahhuai in minam ciat ii suahpih ngahhuai ahihna tawh kizuiin kum zalom alang val belpawlkhawm-a i omkhop hangin meetna khat zong aom kilkellohna tawh belpawl-a supna apiang ding veve pengkhia lel leng ei mailam eimah in zeek khuan nei ding, minam dang khatpeuh ii meetdokna pan suakta ding, atawmpen in ah minam dang khat ii khutnuai ah nuam i sak sangin suakta takin azawng hithiat nuam zawta ahi uhi. Atomin (Kawlgam ah) minam tuamtuamte lunggulh ahi federal belpawl gam taktak pen Bu Aung San losiah asangthei zo ding aom nailoh si tawh minam dangte ii khutnuai, mi sila dinmun ah om kha lailai, meetdokna zong thuak kha lailai i kicih ciang tua sangin mihing hihna man aneilozaw omlo ahimanin apengkhia nuam (akl) akituam om nuam ahi hi.

I deihdeih ahi kipumkhatna i cih ciangin alang lam khat pan bek akilam thei hilo, thatang hatna tawh akilam thei hilo, to le sila dinmun tawh akilam thei hilo, thacial le nasemte dinmun tawh akilam thei hilo hi. Tua bang danin (kipumkhatna) i lam aleh khat le khat kimuanmawhna bek piang sak ding hi. Ha gawina bek piang sak ding hi. Buaina bek piang sak ding hi.

Kipumkhatna i cih in ngahhuai tankimna dinmun tawh akilam ahi hi. Khat le khat kitelsiamna tawh akilam ahi hi. Mihing khat i hih buangin kipumkhat ding akisapnate san theih ding kisam hi. Hih bangte i bulphuh ciang bekin (kipumkhatna) thakhauh semsem zo pan ding hi.

Tulaitak Kawlgam pen a 4 veina akilam Kawlgam ahi hi. Pupa hun lai peuh eng-a tua bang dan mah tawh i kalsuan sawm lai leh a 3 veina akilam Kawlgam akitapkhap ngei bangin a 4 veina zong ni khat ni ciang kitam hamtang ding ahi hi. Akitap masiah hih meima pen si luang akang ngeilo suuk semsem lel ding hi.

Kum zalom 20 nunung lam pen leitung bup ah minam gam tuamtuamte alaan mahmah hun ahi hi. Soviet, Yugoslavia, Czechoslovakia, Ethiopia, Indonesia gamte pan asuakta thak gam 20 bang UN pawllutkhin uhi.

Thatang hatna tawh akilam kipumkhatna in kum zalom alang val sawt zota hi. Khantoh ding genloh kingauzaw hi. Daihna apian ding sangsikin kihuatna khang semsemzaw hi. Anungsang thu in ahih leh buaina pingpei pen ong sawt tetek hi. Si luang akang theilo meima ong suak hi.

1984 kum lai in Bu Khin Nyunt in tuzawh kum 4 sungin singnuai thautawi khempeuh vatmai mang ding, ci’n pulak gamgam hi. Ama hun ma-in Bu Ne Win in zong tua bangmahin pulak gamgam zel hi.

Leitung ah en leng belpawlgam dinga geelna le sepnate ong thakhauh semsem kimu hi. Gtn EU le CIS gamte ahi uhi.

Leitung Galpi 1 ma-in Europe pen empire vive tawh kilam hi. Galpi 1 na aman ciang tua empire-te kitamkhamin minam gamte ong piangkhia ngeingai hi. Kum zalom 20 anunung lam ah UN pawllut gam 200 val ong phato hi. Mipi deihna konlawh mello-a akilam kha Soviet gampi kitapkhapna pan minam gam 10 val bang hong piangkhia hi.

Galkap ukna amaiman masiah Kawl le minam dangte kikal aa aom kimuanmawhna, kilungsimneihna le buainate beisiang ngeilo ding hi. Bu Ne Win in gam thuneihna asuh hun in Kawl minam it phadeuhte in panpih ngei uhi. Tuate zong ’88 kum amau hun ong tun ciang pil thei pan uhi.

Tulaitak kido, kielna, kilemlohnate pen Kawl minam it phadiakte le minam dang sungpan minam it phadiakte kikal kido, kielna-in kimu hi. Kawlgam ah daihna, kilemna, kithuhualna cih peuhmah cikmah hunin om ngeilo hi. Atomin gen leng tangthu dung aom ngei bang mahin atuamtekin omkik mai leng i vek ading ahoihpen ong suak ding hi. Daihna, kilemna le khantohna te i mualsuah zo ding hi.

Kawlgam gamvai ah Boris Yelsin dana makai khat kin takin i kisam hi.

Hih bang teng tawh apengkhia nuam pa tungah thu khat pepeuh nong phul nop uh leh suahtakna, tankimna, le thumaana bulphuhin kingaihsut sak zo bek ding ahi hi.

San Shwe Khaing gelh lai khat ka sim khak thangah ka himanin Zolai in letin ong hawmsawn ing. Athulu pen ‘Kei Apengkhia Nuam Pa (kyaw naw khwe thuat zi tama (separatist?) ahi hi.

Kimpi