Kei a Nungta hi nawn Loin Khrih a Nungta hi ta

Kei a Nungta hi nawn Loin Khrih a Nungta hi ta

(It is no longer I who lives, but Christ who lives in me)
Pasian’ muhna ah Khrih tawh pumkhat, Khrih’ dikna thu-ummite’ tungah ahi zongin, a telsa mawhnei mite’ giitlohna khempeuh Khrih tungah a hi zongin kisilh sakna pen lohsakna (atonement) kici hi.

Piangthak khin thu-ummite pen Lampi khat bek tawn ding ahi hi. Kam dangin gen le’ng pianzia khat bek a nei dingte ih hi hi (One nature). The believer is compelled to face one direction only. Ahi zongin kidop dingah Khrih na nuntakna sungah a nungta hi beka, nang na hihna thu a bei hi lo hi. Na pianlui ziate pen na Pianzia ding hi nawn lo hi. Ahi zongin tua na pumpi hong nawng kai sak mawhna pan a suakta siang na hih nai lohna thu a gen nuam ih hi hi. Mawhna bawl kha zel lai mah hi, cihna hi a, tua banah ih mawh ih khialh ciangin ih sunga om Khrih hi loin eimau mah hi zaw hi hang, cih thu a gen nuam ih hi h.

Pianzia khat bek a neita Christian te ih hih kul hi. Puan kisawp khin hi. A keu dingin kipho hi. Ahi zongin kawt lai deuh hi. Tua a kawt lai zia pen a pianzia hi nawn lo hi. Puan kisawp kawt lai khat ii pian zia pen keu siang ding pian zia khat bek hi. Christiante nuntakna zong thu nih kikal ah om lai ih hih hangin tua a kawt lai mawhna pen ih pianzia hi nawn lo hi. Ahi zongin tua tawh ih kipeng thei nai kei hi. Na mawhna na thah kul lai hi. Mawhna na thah kei leh mawhna in ong that ding hi. Piangthakte pen mawhna thatte hi a, Lawkitte pen mawhna’ thahte hi.

Alui nate: A lui khempeuh sia khin lo leuleu a, a thak khempeuh zong hoih khin lo hi. Ih gen nop thu in, pianlui ziate ah kileh kik lo ding cihna hi. There can be no going back to former ways. Hih lai mun ah, ih pianlui mawhna Khrih tawh sikhawm khin cih thu a gen nuam hi hang a, vantung mi kisuak pah lian paubang nawn lo perfect ta cihna hi lo hi. Ih ngahsa gumna pen kileh kik, hong kisut kik, taan kik cih bang om lo cihna zong hi. Singlamteh tungah ei a va si lian ih hih loh hangin Jesuh tawh a si khawm min tangte hi hang. A gilote ih hih hangin Jesuh’ dikna ah upna tawh ih ki-ap manin diktang mite hi hang. Khrih le a Singlamteh thu hangin a thuak tangmi, sikhawm tang mi, a dikkhawm tang mi, a zui zo tang mite ih hi hi. I am crucified with Christ.

Ahi zongin ei Christian te pen a hikhin hotkhiatna le a hi siang nai lo hotkhiatna the “already” and “not yet” hun sungah a om lai hi hanga, tua sihna ii vangliatna in sawp siangna hun sungah ong koih lai hi (Titus 3: 6). Hi khin zo cih ciangin, Topa’ ong sepsak tatkhiatna thu tawh kisai ah eite’ behlap theih om nawn lo kicing khin cihna hi a, ahi siang nai lo hotkhiatna cih ciangin Jesuh’ ong kum kik ding hun beina (the consummation) thu a gen ahi hi. Tua ahi manin, eite pen mawhnei mi mawhna hong kimai sakte ih hihna ih kimuh ih kitel kul hi. We are forgiven sinners (Martin Luther). Mawhna hong kimaisak Mawhnei piangthakte ih hihna mangngilh huai lo hi. Lungdamna ciapteh huai hi. Ih hauh ciangin a hausa-in a piang ih hih loh lam tak mangngilh huai lo hi. Hih pen pawlkhatte in mawhna bawl thei lai a cihna sa uh hi. Pawlkhatte leuleu-in Kei hi nawn loin ka sungah a nungta Khrih hi, a cih ciangin mawhna tawh kisai ah Khrih’ nun takna ngawh-in amah kipeng sak hi.
Hih lai mun ah, pianlui hanciam zia tawh nungta nawn loin Khrih upna sungah nungta, ih sungah Khrih a nungta ahih nadingin Kha Siangtho gahte gah sak kul, cihna hi. Si le sa tawh nungta nawn lo Kha Siangtho tawh nungta ta cihna hi. Kha gah pen, kamtuam pau, thusuak, kamsannate hi masa loin Gal 5: 22na sung ate hi masa zaw hi, na sim in. Tulai kha mite in hih mun a Kha Siangtho gahte a gah lo tam mahmah uh hi.

suangdal

Ka sungah a nungta Khrih ahih ciangin keima’ mimal deihna bangin gamta luhek nawn loin, keima’ deih bangin geel ziauziau lo ding cihna hi. Lai Siangtho in bang gen cih thupi hi. Ci le sa deihna in kipawlna hi a, kibatlohnate gen nawn lo ding ci hi. Ahi zongin Lai Siangtho in kibatlohna ahi tua Jesuh Khrih le a Singlamteh (Christ and Him crucified) thu mah gen bel in nei ding ci citciat se hi. Jesuh tawh a kipawlte piangthak kici a, a nuntakna kikhel hi. Sunglam kikhelna hi a, pualam lawhcinna hi khin lo hi. Manphatna zong kilamdang hi. Ih manphatna hong kimu hiam? A manphatna ih mu thei hiam?

Khrih a nungta sakte a mau le a mau kimit suan tawm loin Khrih mitsuan tawntung uh hi. Singlamteh pen Pasian in amaute a thuaksakna, Khrih tawh a sihkhopna bangin mu khin zo hi. Amau le amau kihotkhiat sawmte hi nawn lo uh hi. Jesuh in amaute’ adingin Singlamte tungah biakna a piak sak a thupi pen hi a, singlamteh pen mawhneite’ leibat a kilohsakna le Khrih tawh a kipawlna lim ahi hi. Tua ahih manin Paul in Jesuh le a Singlamteh bek ka kisialh pih hi, na ci hi. Khrih tawh na si khawm nai hiam? It is no longer I who lives but Christ who lives in me.

Evan. Suang Dal