Kawlgam Zomite hong lamto Pasian

Kawlgam Zomite hong lamto Pasian

USA leh Australia visa pen leitung ah Visa ngah hamsa penpen pawl hiding in um ing. USA ah sangkah aa paiding te pen mipil bek thamlo a pil phadeuh, ahau bek thamlo ahau phadeuh. USA gam ngiat in zong ameetpih dingte bek in Visa angah hikhong hi. Sum neihleh pilna neih bek tawh zong hikhin lo lai, embassy te muan mahmah ding kisam sawnsawn. Mikang te zah aa mangpau, manglai, telna leh pauna IELTS or TOEFL te ah mat tam muh loh phamawh hilai. AUSSIE zong tuabang mah hiding hi.

Refugee status tawh ipai ciang in Vanleng letmat nangawn eisum tawh lei hetlo aa leng hiauhiau, agam tungsuk inah, ann tawh sum tawh nasep tawh nekding dawnding akicing aa kipia cihkhawng, (Pasian’) Gawlvak taktak ihihlam phawk huai tetek hi.

Kawlgam Zomite kacih citciat nahang pen, India lam Zomite akumpi ahoih sam hang, USA leh Aussie bang in nuntakna nuamzo taktak samlo. Agam lah siangtho lo, mawtaw 2 leh 3 nei lah tam nai samlo. i-Phone X leh Macbook Pro khawng azangh zihziah tam nai samlo. Mercedes, Jaguar leh BMW mawtaw hawl om naitak lo. Gamdang bang aa innte hoih sitset lo. Kumpi diktat lo. A zawngte leh ahau te ki deidanna sang lua lai. Buai na tuamtuam ah thudik thumaan in vai kihawm tanghtangh nai khollo hi.

Tua kawmkal ah international level aa nopsak na hong ciamsak Pasian tungleh midang tung ah iki niamkhiat mahmah kisam sa ing. Ei pilna leh hauhna tawh paiding hi zenleng mi 1000 gamdang itung zo tam??? Namdang hizah lai ah ei Zomi te keekkeek Visa hong kipia tantan diam? Sangkah nading sum cih thadah, Vanleng sap ding nangawn tawm beilo hiven. I Pasian hoih lua hi. Pasian minthang tawntung tahen.

I kawlgam dinmun ka etciang in “Hihciang zong lungdam huai lua” kacih nopna hilel a, mi tung ah leng aa gualbaan leh minam khangto kihi nai deksuai lohi cihzong phawk kawmkawm ni. Kei muhna taktak ah khantoh nading kalkhat kician zong kisuan nailo hi. Gamdang tungte nasep tawh kibuai pah phangphang aa, i tate sangkah lai cihkhawng kipan hi.

Graduate leh laisiam 2 leh 3 ineih sam hang, gam tuamtuam ah research bawl, presentation leh speech khawng piading aa kisam kawikawi, gam leh leitang enkhia ding aa pai, minam neute omzia leh ngeina sinding aa khualzin kawikawi cihkhawng ki om nai mahmah samlo.

Tuaciang i tun takteh, innlam ah naupang te zong sang nakah kim tasam ding aa, i gam makai ten zong hong zahtak in lampi leh infrastructure tuamtuam te hoih tak hong bawlta ding uh aa, inn suan ah meivak zihziah bang hita leh, tuaciang in khantohna gim kiza pan hiauhiau ding hi. Tuaciang dong hong tonpih ding ibiak Jehovah Pasian manghilh nai het kei ni maw Guai aw. Lian Zomi