Kawlgam Zomi Tuiphumte ading kasunmang

Kawlgam Zomi Tuiphumte ading kasunmang

Pasian nasem dingin kilamet na zong om nawnlo in ZYA, ZOFA khawngah kipumpiak in nasemin ka om laitak Pasian deihna tawh Pawlpi kemin Pasian nakasep sung in, Tuiphum pawlpi sungah vaibuai tampi omin hihteng gawm khawmin tuma kum 3 lai a kisunmangte Pasian nasem tampi tungah kagen 2te kong pulak nuam hi.

Amasa in kasunmang pen Zomi Tuiphumte MBC nuai ah Convention khat in om ding maw, Convention
2 in omding cih ahi hi. Leitung vai pianin Convention 2 in omleng MBC thu kikupnate ah CBC in Vote khat nei-in en Vote 2 nei dingin ei gualzo zaw ding cih hi mai hi.

Tua banah TBC pen MBC ah Convention kipsa ahih man zong hi-in a kipnailo ZBCM le KVBCte Convention khat hi leh baih zawtam cihna zong hi. Con- vention 2 in i din leh TBC nuai ah TTBA, CTBA, TBCA, HBA, TAB, SRBA etc Kawlzang Convention ah KVBA, NKVBA, SKVBA, KZBA, TVBA etc hi dingin ZBCM zum pen Convention zum ahih leh KVBC zum pen Laisiangtho Sang hi dingin ZTS+KTC gawm khawm ding cih pen tu ma kum 3 lai kasunmang kagengen ngei khat hi.

Tun Pasian in thupha hongpia in, i maban hong limci mahmah ta ahih manin i lungdam mahmah hi. Convention khat le nih cihhi nawnlo in, Kawlgam sunga om Zomi Tuiphum khempeuh Convention khat in om in BWA ah Full Member hi leng cih pen lunggulh huai leh uthuai deihhuai mahmah thu ahi hi.

Hih bang i lunggulhnate apian theih a pian zawh na dingin.

1. Pasian hi. A mahmah ko in apin thungen ni.

2. Zomi khangthakte in panlakding hun hi.

3. Paih dingte paingam pomdingte pomngam makai zongin vaipuak pia ni.

4. Biakna vai ahih manin biakna vai ahi lo kipawlna ZYA in zong septheih pawl nei ding hi.

5. Mimasate thu dong ni-in makai sak dah ni.

6. Zomi kithukhualsak a namdang akhual luate zong panmunah koih dah phot ni.

7. Veina kibang utna kibang deihna kibang, muhna kibang, lunggulhna kibang, sepkhopnopna, pankhopnopna kibang, kipumkhat ding a lunggulhteng pang khawmin hanciam in thungen leng asawtlo in i sunmangte atatak hong suak ding hi ci-in kasunmang pulakna kahial bawl ding hi. ZYA Weekly News