Kawlgam Politics Huihnundan Galetna ~ Khaino

Kawlgam Politics Huihnundan Galetna ~ Khaino

Nung Enkik Vat :: Kawlgam in leitung gambup ah a sau penpen Civil War a bawlna leh Kawlgam ah buaina lianpi pen in 1947 Panlong thuciam palsat man ahi hi. 48 General Aungsan in thatna a tuak khit ciang 1948-1962 Parliament ki ukna sung ah gamsung kidona omden hi. Tua khit ciang 1962-tuciang dong ciang Galkap Ukna sung ah tawlnga lo in gamsung kidona ki thuak den hi. Tua ki Ukna deihloh man in namnih tawh kido a, Gamsung ah thautawi in dona(Revolutionary) le khuasung ah thautawilo in thutawh dona (Democratic Movement) a hihi. A theih huai mahmah khat in Kawlte Politics pen One Nation= Burmese, One Tongue = Burmese, leh One Religion= Buddhism ahi hi. Hih kidona sung ah numei bangzah kibuan ding a, mihing bangzah galtai in, mihing bangzah si ding hiam?

2008 Constitution

1993 pan Galkapten hong hanciam tohtoh uh Ki Ukna Bupi pen, 1988 pan Democratic Forces, 1990 kitelpi a zote leh, Gamsung a Thautawi te thukimna kihello in 2008 May 10 ni-in a mauteng in hong kipsak ziau uh hi. 2010 ah Galkapten a gamkap puan hong suah uh a, thau tawi veve in kitelpi hong bawl uh ciang 1990 kum kitelpi a zote or Tanswe kiang ah Ngap maw ci a laikhakte Committee Representing Peoples Parliament kitelpi lutlo a hihman un, Galkapte tawsawn USDP ten kidempih neilo a hih man in hong zo uh hi. I theihsa mah bang in 2015 ah CRPP or 88 Democratic Forcete hong lut kik uh a, kitelpi zo dipdep uh hi, Chin State bang ah CRPP ZCD bek om in, tualsuak Party ah Zomite a champen hipah hi.

Nationwide Political Dialogue:

Kawlgam bup politics kikupi a ki neihzawh mateng I kiukna hong hoih ngeilo ding hi. Ethnic Arm Organizations sungpan USDP kumpi tawh Nationwide Ceasefir Accord letmat thuh group 8 leh 88 Democratic Forcete kua tung masa zaw ding hiam? NCA thuh nailo teng in bangngak a hi diam?

USDP tawh kilemna bawl thautawi group 8 teng in, USDP in kitelna zo ding in upmawh mahmah kha ding hi or summet bawlna in letmat thuh hi kha ding uh hi. Kiukna kikhel ding kongbiang ah kidak pan in USDP kumpi tawh kilemna a lak uh pen, EAOs sung a om thautawi dang tengtawh hong kilehbuh mahmah a, mualmi sung ah kiitna kiamsak in ki thutuah lohna kilang sak hi. Hih group 8 teng kilemna letmat a thuhma in a gelna uh, 1. Nationwide Ceasefire Accord 2. Framework for Political Dialogue 3. National Dialogue 4. Union Accord.

A hih hang tutung kitelna ah NLD in zo a hihciang hih EAOs 8 or NCA Signed te platform kiplo cihna hi. Tua hang in Aung Min in Party 90 bang sampong mawk ban ah Lian Hmung Sakhong in NLD le CRPP lampang in thugen pong mawk pah uh hi.

USDP Kumpi tawh kilemna bawlnuamlo EAOs ten thu na mukhol zaw uh hi. A pattauh khat uh in, hih USDP tawh kilemna bawl leng, kitelpi ah USDP in zokik kha ding hi ci-in gen uh hi. Thautawi 20 bang in NCA signed hipeuh mah leh USDP hihsang gualzo zaw kha ding hi. Tun a hih leh USDP te NCA a gualzo lo hong suak hi.

88 Democratic Forces

88 Democratic Forcete kitelpi ah nihvei lut in nihvei zopah hi. Tukum kitelpi ah zong NLD in zaang gamteng ah zo a, CRPP ten zong a mau munciat ah na zo uh hi.Tua a hihman Vice President ding in Pu Chin Sian Thang, U Aye Ta Aung, U Khon Tun Oo te kilawm hi ci in media minthang ten zong gen ziahziah ta hi. Tuaban ah kum tampi Aung San Suu Kyi in a diakdiak in a buaipih Article 59(F) zong a sawtlo in tua kumpiten laih leh kilawm a hihman in ASSK kumpi suak thei ding dinmun hi.

NLD Kumpi

USDP kumpi pan NLD kumpi vaipuak hong ki ap leh, kilemna khat a lak mahmah uh kulleh kilawm hi. Tanswe tupa Hpoo Hla Pyae le ASSK kimuh khit ciang Article 59(F) laih theih ding mun hong tungto pah hi. “A beisa a ka gamtatnate uh nong pholak kei leh kumpi za hong pia nung” cihtawh a kibang ziau hi. Division lam a tengte a buaina lianpi uh pen Land Use Policy hi. Galkap mangteng in leihoih gamhoih teng, vanhoih teng sutmang a hihman in mitampi in lungphona neiden hi cih kilang hi. ASSK in “kei Power hong pia un mimal khat ciat hong pia kik ding hing” ci ngei hi. Tuabang kilemna tawh Kumpi za luah ziau leh NLD kumpi kiang lungpho nuam hong tamzel ding hileh kilawm hi.

NLD Kumpi leh NCA

NLD in kumpi hong letciang NCA vai a zop ding sang a thak a sap ding lamet huai zaw hi. EAOs ten zong USDP tawh NCA thuhsang in NLD tawh utzaw tham ding hi, tua a hihman in a tamzaw in zong USDP tawh a thuh lo uh himawk hi. USDP in Galkap hikei ci a, NCA ah a sap lohteng zong NLD in samkha ding hi. Hihmun ah EAOs sung pan a thuhsa le a thuh nailoteng in thuh ding in lamet huai zaw tham hi. Tua kikal ah UNFC sungpan a hawlkhiatte khong uh, EAOs pan USDP tawh kilemna la 8 te le a lanailote kikal ah buaina omkha thei ding hi. Banghang hiam cih leh a NCA thuhnailo ten a thuhsate ‘CIAMPEEL’ in na mu uh hi.

NLDemocracy

Democracy in, Mualmite deih hongpia zo hiam cih zong ngaihsut huai mahmah hi. USDP kumpi in zong Democracy mah ci tangtang a, General Tein Sien ding lai: President Tein Sein a hihi. 2008 Upadi sung ah Democary cihpen Galkap puansuah a thautawi tawh kibang hi or NCA sign a, a langlam ah Galdo tawh kibang hi. 2008 Upadi laih limlim kisam cihna hipah hi.

Upadi Thak

NLD in makai sem in Upadi thak gelh ding kisam hi. Tua Upadi thak in Democracy Standard tawh kituak bek thamloh Mualmiten 47 kumpek a I lunggulh Federal Democracy tawh kituak a, kigelh upadi khat a kisam hi. Tua gelh ma in CSOs ten mipite deih leh a kibanglo minam tuamtuamte bitnang, biakna tuamtuamte bitnang, ngeina tuamtuamte bitnang upadi sung ah a kihel zawh nang, nasep kisam mahmah hi.

Tua upadi gelh hun sung pen Nationwide Political Dialogue or ASSK cihdan leh 21 century panlong, Pu Chin Sian Thang cihdan in Second Panlong. “Second Panlong lam ni cihvai pen ZNC te pat hi” ci in ASSK in 2013 Australia ah gen hi. Tua a gelh ding in, Party khempeuh, galkapte, CSOste, NGOste Thautawite, etc cih bang sam ding a, mi khempeuh in a thukim pen kikip sak in, I gam nuam ding kipan pan ding hi. I hun cihciang hong tungtam. Khaino