Kawlgam mi nahih na angtang hiam? ~ Pau Khat Suan

Kawlgam mi nahih na angtang hiam? ~ Pau Khat Suan

Hih dotna na bangci dawn hiam? Kawlgam mi nahih, Kawlgam mi a napian, a kisuahkhia theilo i pianpih i hihna Kawlgam, leitung gamtuamtuam leh minam tuamtuamte’ lak ah na angtang hiam? Ahih kei leh na maizum giauguau hiam?

Tulaitak a leitung ah gam khangto leh mite’ painopna gamte lak ah a kihel Singapore gam makaipa Lee Kuan Yew in Rangoon University ah sangkah ding sang lutkhuan na siau ngei a, a ngahloh ciang England ah na kah hi.

1961 – 1971 kum sung term 2, UN Secretary General a sem U Thant pen Kawlgam khuano, Pantanaw khua pan a khangkhia Kawlmi ahi hi. Tuni dong in New York khua ah pahtawina leh zahtak piakna in 200′ x 100′ a zai bawltawm tuikulh khat U Thant Island ci-in omlai hi.

Nidang in Kawlgam pen South East Asia gamteng lak ah a khangto pen leh a haupen gam hi a, Asia ansaal cih min a ngah gam ahi hi.

SEA Games pen 1959 kum a kipan kum 2 sim a kimawl namkim kidemna a om hi a, 1959 pan 1975 ciang Thailand leh Kawlgam a khatna a kikhel ahi hi.

Pilna, siamna, hauhna khempeuh ah South East Asia bek thamlo, Leitungbup nangawn ah angtan huai gawp hilo hiam? Hihte’ hang in Kawlgam mi hihna angtang in, gamdang namdangte lak ah i awm i pho ngam hiam?

Banghang in tuni a khangthakte Kawlgam mi hihna angtang zolo a, milak ah maineu kisa, zumpih khiankhuan pian mawk ihi hiam? Nidang a bangmah ahi lo Singaporete nangawn namdangte lak ah a Singapore mi hihna angtang tak in awmpho ngam tazen uh hi. Singapore passport a tawi uh angtang mahmah uh a, gamdangmi tampi in zong tua passport deihgawh mahmah uh hi. E’n i Kawlgam passport bangzah ciang in i angtanpih a le?

Singaporete in a gam uh leh a passport nangawn a angtanpih uh hang ataktak in Singapore mi khempeuh Kawlgam mite sang a pilzaw hi hetlo hi. A hauzaw zong hikhin peuhmah lo a, nakhempeuh a siamzaw, a kivazaw zong hi hethet lo hi. Ahih hang, a pilzaw a hauzaw a siamzaw Kawlgam mite sang amau vang neizaw in, maingalzaw mawk uh hi.

Banghang hiam?

Kawlgam hih dinmun a tunna 1962 pan Newin in galkap zia tawh a ukcip, a khaktanna pan kipan hi a, kum 26 sung in Leitung bup ah LDC kici Least Develop Country, a khangto lo pen gam hong tunpih hi. Tua khit kum 27 sung galkap makaihna mah tawh ki-ukcip suak a, puah leh zuun ding cih thadah leisung leitung a om gam hauhna khempeuh a liaktum dikdek uh hi in, a guh bek a omlai dinmun tung i hihman in angtan theihna ding, kipahpih ding bangmah om nawnlo hi. Khangthak pattahna pilsinna nangawn khang 2 sung bang a kikhaktan cip tawh kibang ahihman in tangpi tangta in pilna i ngahna ding source a omlo hi a, bangzah tak in khuak hoih taleh sinding omlo, muh tawm theih tawm ahi hi.

Hihte khempeuh ahang bulpi mikhat makaihna leh kimakaih zia, ki-uk zia hang bekbek ahi hi. Kawlgam ah Newin in ongpan in, Singapore ah ahun kibang in LKYew in pan a, Kawlgam leh Singapore a mun kikhek lian hi.

Zomi hihna na angtang takpi hiam? Zumhuai giauguau pian nasa mai hiam?

Bang in Zomite Zomi i hihna ong angtang sak takpi ding a, namdang gamdangte lak ah i awm ong phongam sak ding ahi hiam? I minam i itna hang bekbek tawh ahang kician omlopi a Zomi hihna khapet teta sa a a angtang ihi hiam? Ahang kician tampite siksan a, lungmuang tak a a-angtang phiuphiau takpi ihi hiam?

Zomite in tuni a i dinmun limtak enpha ni. Ei le ei kikhemtawm pong lo in, zing le thai a ong khang ding khangthakte Zomi hihna lungmuangtak a awmpho angtang ngam takpi ahihna ding tuni a makaite leh kimakaihna ziate tung ah kinga ahih lam phawkkawm sa in i mailam en ni. Geel le hawm, Sem le bawl in mainawt ni. Pau Khat Suan