Ih lai leh ih minam hihna ~ Mang Do Thang

Ih lai leh ih minam hihna ~ Mang Do Thang

Kipumkhat Nading Ngaihsutna pan (Our Language and Ethnic Identity: From Unity Perspective)

THUMAPUI – Minam khat hihna hong langsak pen (identifying factor) sisan hi a, hong kipumkhatsak pen ahih leh ih kampau le ih lai hi ci leng kikhial lo ding hi. En pak lehang sangam unau pipi nangawn pau a kibat kei ngei ngei leh i kikholhdan hong nop pha khol lo pah hi. Ahi zongin pau kibat lohna tawh sisan kibang gige ih mipihte huatbawlna le pusehna lungsim (exclusivism) ih neih het lo ding kisam hi. A hang pen ih pu ih pate in sisan in thugen hi na ci uh hi.

Leitung miphazah (world population) awn (6000) val bang omin pau nam (6,912) om hi kici hi. 1966 kum a kibawl kampau ciamtehna laibu (ethnologue) in leitung buppi ah ei Tedim mi pen (344,1000) pha hi cihin na ciamteh ahih manin Kawlgam minam phazah tawh ki-etteh lehang a citawm mahmah (small minority) “Ciimnuai” innkuan khat bek ih hi lel uh a, tu laitak Rakhine gam panin Bangladesh gamah a galtai Rohinga minamte sangin ih tawmzaw pek uh hi; tua hi a, lai le pau le ngeina kipte nei kei kha lehang minam dangte’ vuknelh (assimilation) pak ziau ding minam i hi lel ngel uh hi.

Tua ahih manin a beisa kum (100) hun a lai (script) hong na bawlsak sangmang Herbert Cope tungah lungdam ih koko ding uh ahi hi. Tu-in ama’ hong bawlsak ih Zolai tungtawnin ih pau, ih lai le ih minam hihna koici kep leng hoih ding cih tawh kisai ka ngaihsut thu pawlkhat a nuai a bangin i kikum ding hi.

A. SANGMANG COPE LE IH ZOLAI

Tedim gamah AD. (1900) kimin Pu Pau Cin Hau in laimal (1500) a pha “Zo Tual Lai” (Lailpian script) na bawl khin zo a, Cope sangmang pa hong bawlsak Rome laimal a kizang Zolai (Romanized Script) hong pian khit a kipanin Laipian lai pen damdamin hong kiam hiaihiai a, tu in amau’ biakna sung bekah kizang lai bek ta hi. Laigelh dan (art of writing) tawh kisai Ih theih tawpin kan leng Egypt mite in BC. (1800) kim pawlin na zang khin uh a, tua pen lim laimal (hieroglyph) ahi hi.

Babylon, Sumaria-te le adang minam pawlkhatte (Persia minam, Assyria minam te ) in BC (4000) hun pawlin cuneiform a kici lim laimal tawh buan tung le suangpek tung peuh ah na gelh thei khin uh hi., kici hi. Greek mite pen (BC 1000 kim pawl) lailu (alphabet) tawh laigelh dan (alphabetical) a zang masa pen hi uh a, amau’ laigelh dan pen Italy le Europe gam nitumna lam dongah kizelh suak hi. Rome mite in tua Greek laimal mah puahpha uh a, tua panin a kicing zaw Rome laimal (Roman Script) hong piangkhia-in tua laimal tawh Cope in ih Zolai hong na bawlsak ahi hi.

Cope in ih Zolai ( Chin Script) a hong bawlsak laitakin ih Zo tangthu kimkhat guang nuam hi ding hiven, Tedim gam sunga a teng beh bul (chief clans) sagihte ahi Sizang,Sukte, Saizang,Tedim, Thado, Zo le Guite beh sung panin Zo tangthu a theih mi pawlkhat dong ngiat a, a na bawl ahi hi. Ih Zo khangtangthu theih a kidong mite lakah Pu Tuang Za Go (Manlun beh,Lomzang khua) zong khatah na kihel kha ahih manin Zo Laibu a kibawl masate ah (a diakdiakin Neino tangthu sungah) “Neino,Neino, nang ba bangza na khawng tai” cih te banah adang Zopau tam khop khat na kiguang thei kha bilbel hi.

Ih Zolai Sim bu pen kumpi sangte ah (1924) panin (1971) dong na kizang a, ahih hangin 1971 kumin (first revision) a kibawl ciangin tua Zolai Simbu sungah Zo awkaih (Zo accent) tawh a kigielh laigual khempeuh a vekpi-in Tedim awkaih(Tedim accent) tawh kilaih mang hi.

A taktahin ci lehang a tunga Tedim lai (Tedim dialect) cih pen a om masa (a piang masa) hi lo zaw a, a tungah ih gensa ahi beh bul sagih teng munkhatah (Ciimnuai, Geltui, etc;) sawtveipi a na tenkhop khit uh ciangin “Tedim Taangpau” (Koine Tedim or Tedim Common language) khat a hong piangkhia dan na hi tuak zaw hi. Tua kampau pen Cope in “Kamhau pau “(Kamhau dialect) na ci a, tua pau tawh Zolai Simbu a na bawl ahi hi.

Alexander the Great hunin zong “Ionic”(Greek nisuahna lam mite’ kampau) le “Attic” (Athen mite’ kampau) nam nih kigawm Greek taangpau” Koine Greek” or ”common language” a kici kampau khat a na piankhiat dan le Briton, Jutes, Danes, Angles, Sexons le Normans minam guk kigawmin “English” lai le kampau a hong piankhiat dan tawh kibang dinging ka ummawh hi. Cope hun ciang ciang pen ih minam min “Zomi” a om nai lo ahih lam kilang mahmah hi. Na om hileh Cope in Kamhau dialect a na zat theih nang thu om lo hi.

B. IH PAU LE I MINAM MIN

A tungah i gensa bangin ih pau, ih minam min le ih beh min cihte pen olno tak a hong piang vat hi lo mawk a, kum sawtveipi tak munkhatah ih tenkhop ih giahkhop ciang bek a hong piang hi pan bek ahih manin i pau le ih minam min a manthan lo nadingin ih kepcing ding le ih zun i puah den ding kisam hi. Tangtawng pek (from time immemorial) a i zat sa ih kampau, ih lai le ih minam min le ih tang ngeina cihte pen ei ut thu a mawk laih ziau ziau thei hi lo hi. Gentehna-in ei le ei “Zomi” le “laimi ” cih tawh ih kilawh zen zen hangin ih ut a ih ih ut kei zongin kumpite hong theihna pen Chin hi phot tadih hi.

A hih hangin 1953 kumin khamtung gambuppi tuiphum kipawlna min pen Rev Hau Go maikaihna tawh Chin Baptist Convention na kizang loin “Zomi Baptist Convention” na hisak uh hi. Tua hi napi-in ei Zomi deih teng mah in a hanghang tawh ih taisan zel uh a, a sawt loin I lawmte in Chin Baptist Convention tawh hong na laihsak ziau ta hi. Kei theihna ah Sia Hau Go in Zomi cih kammal a na phuah lai-in Zomi pen Chin tawh a kikim ahi hi (Chin tanga na kizang ahi hi).

Hih bang kawmkal panin ei Tedim kampaute in Zomi bup (the whole Chin) tanga kizang “Zomi” min pen eimau’ aituom min ding a ih zat nop pen ngaihsut huoi-in ka um hi. Ih gensa bangin Zomi pen Rev Hau Go le makai luite in Chin tanga a na zat uh min hi a, ei Tedimte bek in eimau’ min ding a ih zat theih pak ding hi nai lo kha ding hi.

Sia Khai Suan Mang in zong kum (2007) a kihawmkhia “Ciimnuai Khuavak, No 10, laimai 76 ah “Zomi a kizat ciangin tulai taka Chin tawh a kibangin a kingaihsun ahi hi. (gtn: Zomi Baptist Convention (Tua hinapi-in eimau mah in Zomi kammal ih deihna ih neusek kikkik a,Tedim kampau teng bek Zomi ih suah ta hi (gtn.ZCKS, ZOMUS, ZOLUS). Ih Zomi pihte te in zong hong zat pih hi kei, eimau bek kici lel ni ih cih leh Ciimnuai tangin Zomi cih zat theih hi,ci-in ka ngaihsun hi.

Tua ahih kei buang leh ih kammal zat Zomi pen toi ka sa lua hi,” ci-in a na gelh bangin Zomi pen ei Tedim kampaute bek’ min suah pak nai loin Zo minambup (Falam,Hakka,Tedim, Mindat, Matupi, Kanpalet,Paletwa ) te ii min (racial name or national name) suah phot lehang I makai lui ahi Sia Hau Go le a lawmte’ nasepna a kipsak ih suak kha kei zaw tam a ci ka hi hi.

Eimau’ phuahsa Zo gambuppi min pen ei Tedim kampau teng (Tedim speaking group) in eimau’ min suaksak mawk leng thukhual vai pha lo mawk ding hi. Tua sangin ih kumpi le mi tampite in hong theihpih ahi ih Tedim min mah angtan pih phot a, a picin semsem nadingin ih puah ih zun toto ding hoih ka sa hi. Kei mimal khat’ muhna ah kamphen kul lo teng pen Tedim cih min in hong gawmtuah theih penin zong ka um hi.

THUKHUPNA

A tunga ka thugen sungah mimal, minam, beh le phung a sukha lo dingin kipumkhatna ding (for the sake of unity) tawh a hong kuppih a kineih ka hih manin kammal zatkhialhna le na san zawh loh uh a om khak leh nong maisak nadingun kong thum hi. Mang Do Thang