Kawlgam ah Ebola Virus omlo ci’n kumpi te’n tangko

Tusungteng leitungbup in Ebola natna vai alunglut leh alung patauh mahmah laitak hi a, tuakawmkal in zandiak in Kawlgam ahzong Ebola natna angah Rakhine State ah om cih Internet tungtawn in kithangsak hi.

Tuavai tawh kisai in Myanmar’s Ministry of Health te’n Rakhine State, Sittway khuapi a zatolum naupangno pen Ebola natna tawh hilo hi ci’n Wednesday ni in tangko khia uhhi.

Ministry of Health genkhiatna ah tua naupang pen Sulphur Toxicity pan akipan ahi Stevens-Johnson Syndrome (SJS)natna tawh zato alum hizaw hi ci’n pulakna nei uhhi.

Tua naupangno pen Maung Myo Linn Naing kici minnei khat hi a, kum 6 bek phapan hi. 21 July ni akipan aci anat ciangin zatui nepah a, Minbya Hospital ah zato lumin phatuamlo cihi. Tuakhit ciangin 24 July ni in Sittway Hospital ah Doctor te’n puaksawn uh cih kiza hi.

SJS kici Stevens-Johnson Syndrome natna pen vun natna (Skin Disease) namkhat hi a, Internet tungtawn in Kawlgam ah Ebola Virus ngah om ci’n ki minthangsakman hi. Etpak in Stevens-Johnson Syndrome natna leh Ebola Virus pen kibangpian cihding ahihi.

Tua naupangno pen tu’n hoihtuam zawta hi ci’n Ministry of Health in genbeh hi.

Western African Countries pan hongki pankhia ahi Ebola Virus pen Kawlgam ahzong ki patau mahmah a, Ministry of Health inzong kidalkholh nading in tampi vaihawm uh cihi.

Kamphatna tawh tuni ciangciang Kawlgam ah Ebola Virus lutnailo cih Ministry of Health te genkhiat ahihi.

ZD Sawltak