Suicide, amah le amah kithat

Suicide, amah le amah kithat

Leitung ah amah le amah a kithat (suicide) a tam penpenna Lithuania gam hi a, tua zom ah South Korea gam ahi hi.

South Korea gam pen mi minthang suicide (celebrity suicide) a tampenna gam ahi hi. Gam hau, gam nuamsa khat a mi minthang tampite banghang in amau le amau kithat mawk uh hiam cih a lamdang leh a ngaihsut huai sim gige thu ahi hi.

Suicide a si a tamzawte sum le pai haksatna leh nuntak haksatna, cihbangte hang na hikhin masa hetlo a –

~ insomnia (ihmusip theilo, ihmu ziauziau theilo, zingsang khanglo baihlua in ihmu thei nawnlo den),

~ depression (lungkia, lungsim bei dikdek, amau le amau hizo, gualzo, matun kisa zolo)

~ Loneliness (lungleng khuangai, lawm le gual kim le pam nei kisa lo, mite’ itna leh huaina ngah kisa lo, pampaih thuak kisa… etc )

Cihdan thuaklah mahmah honkhat na nei hamtang uh hi.

Suicide a site bek hilo in, mi kisia (esp. khangno kisia ) tampitakte zong hihbang thuakna, a diakdiak in itna giautau leh lunglenna a thuakman a kisia tampitak om hi gige hi.

Christiante in biakna perspective pan en in, (esp. Zomite in) Pasian’ awiloh mawhna lian sem, vantung gam tunglo ding… cihbang in thukhen lanlan thei hihang.

Aih leh a tung a i gen, a thuak uh insomnia, depression, loneliness … etc cihte banghang himawk ding hiam? cih i ngaihsun kha ngei hiam? “Na galte it in, nang le nang na ki-it bang in na vengte it in” cih principle tung a kilam Tapidaw nuntakna picing nei ciat hile hang, tuabang natnate a thuak mimal kiam tuam zo ding in i um hiam?

Hihte a lungleng lo hihen la, itna le huaina a lunggulh bang un kicing in ngah le uh lungkiatna leh ihmut theihlohna cihte neilo zawdeuh khading uh uphuai mahmah hi. Tua hileh a kilamdang tampi om kha ding in uphuai mahmah hi.

More: Suicide leh Murder Video te a encikding in Facebook in nasemding mi 3000 behlapding

Nang le nang na ki-it bang in na vengte na it in. Na itna lak in. Na it lam theisak in. Pampaih, nawlkhin leh deidan (rejected) kha kei in.

(i tuacih khak leh i Tapidaw nuntakna ki etphat, kisit phat huai kha ding hi.) Pau Khat Suan