Topa minthan nading in ~ Lian Za Tuang

Topa minthan nading in (Matt 5:16) ~ Lian Za Tuang

Minthanna i cihin mikhat hihna or nakhat i hihna ahi hi. Diamond hoihna, a manphatna in ama’ minthanna hi paha, Bill Gate’ hauhna in ama’ minthanna hi pah hi. Titanic a actress ahi Rose’ melhoihna in ama’ minthanna hi-a, Rambo’ hanna in ama’ minthan hi pah hi. Tua mah bangin Pasian’ minthanna zong Ama’ hihna (character/ attritube)te hi-a, mihing le nate minthan bangin a kigen khin zo ding le a bei mang thei ding minthannate hilo hi.

Pasian in ama’ minthan nadingin hong piangsak hi (God created us for His glory)

Isa. 43:7 “… Keima pian sak Ka bawlsa Keima’ minthan nadinga Ka pian sak Keima’ min tawh a kilote khempeuh ahi…”. ci hi. Pasian in vasate vasa dingin bawla, ngasate ngasa ding mahin bawl-in nang zong nang ding mah in hong bawl hi. Vana leng vasa in kei zong ngasa ut ing ci-in tuisungah mawk lut theilo-a, ngasa zongin kei muvanlai ut ing ci-in vantungah leng dide thei ngeilo ding hi. Amau mun ciat banga a nuntakna un Pasian’ minthanna ahi hi. Tua mah bangin Pasian in nang bang dingin hong deiha bang dingin hong piang sak hiam, cih na theihkhiata tua banga na nuntak ciang bekin Pasian’ min a thang sak thei pan na hi hi.

Upna in Pasian hong gupkhiat theihna ding lampi hi-a tua upna man bekin nuntakna mun dikah hong koih thei bekin Pasian’ deihna, hong piansakna ahang bulpi hong tel sak thei bek hi. Tua manin ih pianthak ciang bekin Ama’ lung kidam sak thei-in minthanna ih puak thei bek hi. Na piangthak nai hiam?

A piangthak khinte’n tu laitak liana na nuntakna ngiat le na neih na lam khempeuh Pasian in Ama’ minthan nadinga hong piak hi, cih thuman na phawk thei nai hiam? Tu laitaka na neihsate khempeuh nangma suahma peka a omsa vive hi lela na sih khit teh zong midang khut sung tung ding vive hi lel hi. Tua manin Pasian in bangtan sung hong nungta saka, na nuntak sungin bangzah ciang hong zek sakin tuate na koici zek hiam, cihte nak thupit mahmah hi.

Sawltak Paul in gospel thu hanga nalamdang tampi bawlin a lawhcinna khempeuhte uh pen, ko hih theihna hi lo-a hih vangliatna khempeuh pen Pasian kiang pan hong pai hi, kote ka hih uh leh na kikoihna leibel tawh a kibang bek ka hi uh hi, na ci hi (2 Cor. 4:7). Mundang, gamdanga pilna sin, sum zong zomi khempeuh in, i pilna ih hauhna ih melhoihna le i hat i siamnate khempeuh Pasian kiang pan hi, cih phawkin nuntakpih siam tek ni, tua in Topa’ minthanna lianpi suak dinga leitunga i piankhiatna in khiatna nei nuntakna hong suak pan ding hi.

Pasian’ minthannna pen mi tuamtuam zui in na (nature)te tungtawn mihingte ngaihsutna ah hong kilang hi. A khangto gamte ah nisim in TV (discovery) sung khawngah tuisung ganhing, huihlak vasate, gamsate, vantungte leitung na tuamtuamte a kipan a lamdang na tampi kimu den hi. Leitungah ih muhsate sa’ng i muh nailoh na tam zaw tham lai-a, ih mu nate nangawn ih tel tawm mahmah lai hi.

Late 19:1-4 sungah; vantungte in Topa’ minthanna pulak den hi, ci hi. Mipil (Scientist) te’n leitung (planets)te thu a genna khawngah i ngaihsut zawh loh le ih up ngam loh na lian tampitak om a, amau zongin a tel zawh loh le a kan zawh loh uh na tampi tak om lai cih thei uh hi. Khuavak hatna (light travel-time) pen second khat teh tai 186,000 hatin ni (sun) panin leitungah tuazaha hat khuavak hong tun zawh nadingin minutes 8 le lang hun la in, planet gamla pen pluto pan nai 6 sawt dinga. a nai pen aksi pan kum 4 sawt ding hi, ci zen uh hi. (Robert C. Newman & Herman J. Eckelman, Jr.Genesis One and the Origin of the Earth, p.16 ). Tua hi leh hih i universe bangzah takin lian ding hiam cihte i ngaihsut zawh hi nawn lo hi.

Pasian bawl sa nate lianin thupi lua mahmah ahih manin LSTho tungtawna Pasian a zongkha lo mi tampi takin Pasian’ minthanna a kilatna hih nate ni, kha, aksite le mual le guamte bia uh hi. Saturday bang saturn biate nipi hi-a sunday zong ni biate nipi ni hi. Pasian theilote aadingin bel a biaktak lua mahmah na lian na thupi vive hi-a ei Pasian a theikhate aadingin bel Topa bangzah na lian cih tawh minthanna ih puak loh ding ngal a dang om thei nawn lo hi.

Mihingte muhna, ngaihsutna ah minthanna cih pen a sia thei nate tunga kinga hi lel hi. Late 37:20 sungah ih minthan sak leitung na, i kisak theihpih ih mihing hihna khempeuh pen a mangthang pak thei lono le meikhu tawh na genteh hi. Late 49:17 sung ah, leitung hauhnate i sih khit teh bangmah keng thei lo ding na ci leuleu hi.

Sanggam aw, tu in na kisaktheihpih pen in na pilna, na hauhna, na melhoihna, na hatna, lawm le gual hauhna le leitung na khat pepeuh tunga kinga lel a hi kha hiam? Leitung, vantung minthanna khempeuh hong piankhiatna a bulpi pen in tu ni-a i biak Pasian ahih manin mite, milimte le na tuamtuamte minthanna khempeuh beisiang dinga, ih Topa’ minthanna ahih leh a tawntung pan a tawntung dongin om den kip den ding hi. Kua hiam, bang hiam na muan na suan, kua tungah kinga-a, kua minthang sak na hiam?

Vantung i tun ciangin leitung tawh a mangthang a beisiang minthanna hoihna khempeuh ih Topa Jeisu’ sungah i mu ki ding hi (Haleluijah!) Leitung, vantunga om thuneihna khempeuh a neipa in Amah Jesu ahi hi (Matt.28:18).

Kumpite’ Kumpi, topate’ Topa, Kilemna Kumpipa Jeisu in A’ pu David’ tokhom luaha Jerusalem pan leitung khempeuh hong uk kal ding ka ngahlah den hi. Keivom le tuuno in ankuang uumkhawma, kamkei le kelnote lumkhawmin bawngno le humpinelkaite kithuaha naupangno khatin a hawl hialhial hun dingte ka ngaklah hi. Eden huan nopna a thu bek tawh thei hi lo-in a tataka ka theih kal ding ka ngaklah hi. Tanglai mi Siangthote’n Topa Jeisu aw, hong kum ta in, a cih bangin ka gal dondon ta hi.

Leitung in Topa thei kha lo-in a bawlsa na tuamtuamte bia ta se le uh, a lian a kang tokhom mai panin tua minthanna khempeuh, vanpi, leipi kilawnkhia dinga leitung a dam sungun a biaknop loh uh hangin tua huh teh leii khempeuh inTopa phatin khuk khempeuh Topa’ maiah khuk din ding uh hi. Tua khit teh a kingakna uh bulpi in Jesu hi lo ahih manin lamet bei takin Topa’ vangliatna tawh tawntung hell sungah kilawnkhia ding uh hi.

Topa in hibangin ci hi; “Keimah in Topa Ka hi-a, Topa pen Keima’ min ahi hi; pasian dang tungah Keima’ minthanna ka ngah sak kei a, a kisui milimte tungah zong Keimah hong kiphatnate zong ka ngah sak kei hi”.

Hell in kam tawh gen zawh loh a mulkimhuai, tawntung gimthuakna mun hi-a Topa’ liatna, minthanna sungah a lungdam theilo, minthanna khempeuh hong piankhiatna bulpi Pasian a awlmawh lo khempeuhte kikhul nading mun ahi hi.

Leitungah mi tampi in mite phawk den dingin innhoih, lohoih le na tampi tak bawlin sem uha, a sih khit nangawn u teh a kiphawk tawntung nadingin mualsuang phut lai uh hi. Sanggam aw, leitung phawk den dinga kipiang sakte i hi kei-a, Pasian in Ama’ minthan nading beka hong pian sakte ih hi hi. Leitung pian ma pekin nang le kei pian ding Pasian’ ngaihsutnaah om khina a hun tun teh Ama’ minthan nadingin a piangkhia i hi hi. Ih suahna in Pasian’ gelna hi-a i nuntak sung tawntungah lungkimna a ngah nading Ama’ lamet ahi hi. Na neihsa, na pilna, hatna siamnate Topa aadingin na bangci zat hiam? Chris’ minthanna sungah; Lian Za Tuang (USA)